Është suspenduar nga puna prokurorja britanike e EULEX-it, Marie Bamieh.
Këtë suspendim e ka konfirmuar për KTV-në vet EULEX-i, pasi që Koha Ditore kishte nisur publikimin e shkrimeve për përfshirjen e prokurorëve dhe gjykatësve të EULEX-it në kurdisjen e gjykimeve. EULEX-i ka konfirmuar se ka suspenduar nga puna prokuroren britanike Maria Bamieh, e cila ka siguruar provat për këto çështje.
EULEX-i pranon se prokurorja është suspenduar, por thotë se kjo është bërë javën e kaluar, raporton KTV.
Në një komunikim elektronik të KTV-së me zëdhënësen e EULEX-it, Dragana Nikoliq-Solomon, është bërë e ditur se suspendimi i Bamieh ka ardhur për shkak të rrjedhjes së materialeve të ndjeshme.
Maria Bamieh është prokurorja e cila ka siguruar prova se dy prej zyrtarëve me të lartë të EULEX-it kanë marrë ryshfet për të mbyllur të paktën tri raste të mëdha kriminale. Ata besohet se janë përfshirë në afera për mbylljen e rastit penal kundër Fatmir Limajt, Ilir Tolajt dhe në rastin e shpërthimit në lokalin “Sekiraça”.