Pas raportimit në medie se Partia Demokratike Shqiptare (PDSH) mund të hyjë në Qeveri, ka reaguar zëdhënësi i Bashkimit Demokratik për Integrim (BDI), Bujar Osmani. Ai në profilin e tij në Facebook, ka bërë me dije se kjo çështje nuk është trajtuar në asnjë formë në mes partnerëve të koalicionit.
“Në pamundësi për t’iu përgjigjur një për një interesit të gazetarëve për ndryshimin e përbërjes së qeverisë, gjej rastin në profilin tim për të dhënë qëndrimin e BDI-së. Deri në këtë moment, kjo çështje nuk është hapur dhe trajtuar në asnjë formë në mes partnerëve të koalicionit. Ne mbetemi në qëndrimin se jemi kundër përcaktimit të një zgjidhjeje përfundimtare për daljen nga kriza, si p.sh qeveria teknike, pa u krijuar kushtet për fillimin e dialogut të mirëfilltë politik, me ndërmjetësim ndërkombëtar, ku do të bisedohej hapur për të gjitha çështjet”, ka thënë Osmani.
E përditshmja maqedonase “Utrinski Vesnik” shkruan se PDSH-ja së shpejti do të bëhet pjesë e qeverisë aktuale të udhëhequr nga kryeministri Nikola Gruevski.
Sipas kësaj gazete, negociatat që kanë vazhduar këtyre ditëve midis liderit të PDSH-së Menduh Thaçi dhe atij të VMRO-DPMNE, Nikola Gruevski kanë përfunduar me marrëveshje dhe se ajo do të bëhet publike ditëve të ardhshme.
Kryeministri Gruevski thuhet se është i hapur për një qeveri të zgjeruar, që ta ketë përkrahjen në projektet qeveritare.