Ministrja e Arsimit, Arbërie Nagavci ka bërë të ditur se të premten të gjitha shkollat në Kosovë e Shqipëri orën e parë të mësimit do t’ia kushtojnë Lidhjes Shqiptare të Prizrenit.
Nagavci ka bërë të ditur se kjo bëhet për nder të 144 vjetorit të formimit të kësaj lidhje.
“Jam e lumtur që këtë vendim e kemi marrë bashkë me ministren e Arsimit të Shqipërisë, znj. Evis Kushi, për t’ua mundësuar nxënësve tanë në të dyja vendet, që të flasin njëkohësisht për Lidhjen Shqiptare të Prizrenit”, ka shkruar Nagavci.
Postimi i plotë:
Për nder të 144 vjetorit të Lidhjes Shqiptare të Prizrenit, nesër, 10 qershor 2022, të gjitha shkollat në Kosovë dhe Shqipëri do t’ia kushtojnë orën e parë të mësimit kësaj ngjarje të rëndësishme të historisë shqiptare.
Jam e lumtur që këtë vendim e kemi marrë bashkë me ministren e Arsimit të Shqipërisë, znj. Evis Kushi, për t’ua mundësuar nxënësve tanë në të dyja vendet, që të flasin njëkohësisht për Lidhjen Shqiptare të Prizrenit. Kështu, ne po bartim së bashku te gjeneratat e reja veprën frymëzuese të intelektualëve dhe atdhetarëve të kohës dhe lavdinë e historisë shqiptare. /Telegrafi/
