Partia Demokratike e Kosovës (PDK), Dega në Therandë, e ka hapur të enjten mbrëma fushatën elektorale për zgjedhjet lokale të 3 nëntorit. Kryeministri i Kosovës, njëherësh edhe kryetar i PDK-së, Hashim Thaçi, duke e prezantuar para qytetarëve të Therandës kandidatin për kryetar të komunës, ka thënë se deputeti i Kuvendit të Kosovës, Ramë Vataj, me ndihmën e ministrit të Punëve të Jashtme të Kosovës, Enver Hoxhajt, do të dalë fitues në zgjedhje te 3 nëntorit.
Thaçi ka thënë më tej se Qeveria e Kosovës ka investuar më se 40 milionë euro në katër vjetët e kaluara, si rezultat i ideve dhe projekteve që kanë dhënë deputeti Ramë Vataj dhe ministri Hoxhaj. Në fjalën e tij Thaçi ka thënë, po ashtu, se PDK-ja do t’i fitojë shumicën e komunave të Kosovës, pa përjashtuar këtu edhe Therandë, dhe i ka porositur qytetarët, simpatizantët e PDK-së dhe aktivistët, që të punojnë më shumë që vota e tyre të jetë vendimtare për fitoren e Ramë Vatajt më 3 nëntor.
“Atë që e prezanton Ramë Vataj dhe ekipi e tij së bashku më ministrin Hoxhaj për qytetin e Suharekës për mandatin e ardhshëm katërvjeçar, çdo projekt qoftë në infrastrukturë, në ndërtimin e shkollave të reja, ambulancave, kanalizimeve ujësjellësit, hapësirave të gjelbërimit, apo projektet e tjera të nevojshme për qytetin dhe çdo fshat, janë të menduara dhe studiuara mirë”, ka thënë Thaçi.
Ndërkaq, në fjalën e tij, kandidati për kryetar të Therandës, Ramë Vataj, ka thënë se PDK-ja është e vendosur fuqishëm për t’i fituar zgjedhjet në Therandë, sepse, sipas Vatajt, PDK-ja ka çka t’u ofrojmë qytetarëve të Therandës.