Hashim Thaçi, i cilit sot mban postin e zëvendëskryeministrit dhe ministrit të Punëve të Jashtme të Kosovës, ka ndarë disa momente të shpalljes së Deklaratës së Pavarësisë së Kosovës, të cilën e kishte lexuar më 17 shkurt 2008 para deputetëve të Kuvendit të Kosovës.
Thaçi ka thënë se shpallja e pavarësisë, leximi i Deklaratës së Pavarësisë, pastaj momenti i nënshkrimit të deklaratës ishin momente që sillnin në mendje dhimbjen, mallin, admirimin dhe përuljen për të gjithë ata që kishin punuar dhe që ishin flijuar për këtë synim madhor.
Ministri i Jashtëm tha se për këto shtatë vjet Kosova ka ecur më shumë sesa që ka mundur të mendojë dikush.
“Shteti i ri është konsoliduar brenda dhe jashtë dhe sot është burim i stabilitetit për tërë rajonin dhe më gjerë si dhe shembull për pjesët e tjera të botës për atë se si të tejkalohen dhimbja dhe shkatërrimi i luftës. Shpeshherë harrojmë rrugëtimin e rëndë që ka bërë Kosova deri këtu…”, tha ndër të tjera, Thaçi.