Kancelarja gjermane, Angela Merkel, viziton sot Shqipërinë, ndërsa mesazhin e saj për shtetin shqiptar pritet ta japë në takim me krerët e lartë institucionalë.
Ajo do të mbërrijë në Tiranë, në Aeroportin “Nënë Tereza”, rreth orës 13:50.
Në shkallët e Kryeministrisë, Kancelares do t’i rezervohet pritja shtetërore e nivelit më të lartë në orën 14:15, për të vijuar një takim kokë më kokë me Kryeministrin Edi Rama, e më pas për 45 minuta takimi mes dy delagacioneve që do t’ia lërë radhën konferencës së përbashkët për shtyp Rama-Merkel.
Në 16:15 parashikohet takimi i Kancelares me Presidentin Bujar Nishani, për t’ju drejtuar më pas konferencës së ekonomisë në “Tirana Business Park”, ku Merkel do të ketë një fjalë përshëndetëse, që shënon edhe fundin e vizitës.
Drejtoria e Policisë Tiranë ka publikuar masat që do të marrë për garantimin dhe mbarëvajtjen e vizitës së Kancelares Merkel.
Vizita e Kancelares Merkel do të zhvillohet nën masa të forta sigurie.
Policia e Shtetit ka njoftuar planin e masave, ku përfshihen ndalimi qarkullimit të mjeteve nga ora 10:30-14:30 në aksin rrugor Rinas në drejtim të Kasharit. Nga ora 13:30-14:30 segmenti rrugor nga Superstrada Vorë – Tiranë, duke filluar nga mbikalimi i Kasharit – mbikalimi i Kamzës dhe rrugët dytësore do të jenë të bllokuara.
Në vazhdim segmenti rrugor nga mbikalimi Kamëz – Sheshi “Shqiponja” – Rruga e “Durrësit”, segmenti rrugor Sheshi “Skëndërbej” – Bulevardi “Dëshmorët e Kombit”- Sheshi “Nënë Tereza”, rrugët lidhëse me to, nuk do të lejohet parkimi i mjeteve, si edhe do të bllokohet në momente të caktuara.