(E plotësuar) Burime brenda policisë në Prishtinë i kanë konfirmuar Koha.net-it, se tre të arrestuarit në Han të Elezit, të dyshuar për terrorizëm tashmë janë sjellë në Prishtinë dhe se ka nisur intervistomi i tyre.
Ata dyshohen për lidhje me grupet terroriste në disa vende islamike, ku veprojnë organizata të tilla.
Aksion i PK-së kundër terrorizmit- tre në pranga, një në kërkim!
Të premten, mediat patën raportuar për kosovarët e lidhur me Shtetin Islam të Irakut dhe Shamit që mund të kryenin sulme kamikaze në Kosovë, në Policinë e Kosovës (PK) kishte mbërrit një listë prej 5 personash që duheshin të arrestoheshin për organizim të tyre.
Arrestimi i tyre dështoi të premten, pasi që ata kishin ikur nga Kosova. Destinacioni i tyre publik i fundit ka qen Durrësi.
Ata janë kthyer dje në Kosovë.
Këta persona janë kryesisht nga Kaçaniku dhe rrethina, derisa mbajnë lidhje të drejtpërdrejta me Lavdrim Muhaxherin.
Burime brenda policisë i kanë thënë Koha.net se në Han të Elezit janë arrestuar tre të dyshuar për terrorizëm, ndërsa një tjetër po kërkohet. Burimi nuk ka mundur të saktësojë se ku pikërisht janë arrestuar, e as të japë emrat e tyre.
Lajmin për arrestime e ka konfirmuar edhe zëdhënësi i Policisë Rajonale, në Ferizaj, Agim Gashi. Por ai nuk ka mundur të japë hollësi, “meqë rasti po ndiqet nga Njësiti Antiterrorist në Prishtinë, edhe ata i kanë të dhënat”.
Zëdhënësi i Policisë së Kosovës, Baki Kelani ka thënë se tash për tash as mund ta konfirmojë, as ta mohojë lajmin , porse për këtë do të mund të flasë më vonë, pasi të marrë njoftime nga sektorët përkatës.