Ideja e themelimit të një Tribunali Ndërkombëtar për krime lufte të kryera në Kosovë është provokim irritues për Kosovën.
Kështu vlerëson eksperti kushtetues, Riza Smaka, i cili thotë për KTV-në se themelimi i një tribunali të tillë do të rrënonte imazhin dhe reputacionin e Kosovës. Smaka thotë se Qeveria me rezistencë do të duhej të kundërshtonte atë që do të ishte goditje e rëndë për shtetin. Por, Smaka ka frikë se institucionet e Kosovës do të lëshojnë pe dhe për këtë thotë se i ka për bazë kompromiset e mëdha që i kanë bërë deri tash.
Ndërkohë, njohësi i çështjeve të sigurisë, Florian Qehaja, thotë se krijimi i një tribunali të tillë do ta bënte Kosovën të vetmin vend në rajon me një nivel të lartë të gjyqësorit. Ai tha se argumentet që vijnë për këtë, se ka dështuar gjyqësori kosovar, janë të papranueshme sepse kompetencat ekzekutive në gjykimet e këtyre rasteve i ka pasur prania ndërkombëtare.
Në mesin e kësaj jave, kundër themelimit të tribunalit ishte deklaruar edhe vetë ministri i drejtësisë, Hajredin Kuçi dhe nënkryetari i Kuvendit, njëherësh deputet i PDK-së, Xhavit Haliti.