Paul Pogba nuk do të jetë pjesë e Manchester United për sezonin e ardhshëm. “Djajt e kuq” njoftuan të mërkurën përfundimin e bashkëpunimit me francezin.
Edhe pse ngjarja ishte paralajmeruar më herët, dje erdhi zyrtarizimi. Megjithatë largimi i dytë me parametra zero i Pogba-s nga United, nuk ka qenë si ai i pari në aspektin ekonomik.
Kur mesfushori të largohet më 30 qershor, ai do të përfitojë një bonus besnikërie prej 3.78 milionë paundesh, sipas kontratës.
Pogba u largua nga United fillimisht në vitin 2012, kur ende nuk ishte pjesë fikse e skuadrës së parë. Ai u bashkua me Juventus-in, skuadër e cila ia shiti “Djajve të kuq” në vitin 2016 për shifrën e 89 milionë paundëve.
Te United, Pogba u pagua sezonin e parë 8.61 milionë paund neto. Në vitin e dytë përfitoi 7.75 milionë, të cilave iu shtua edhe bonusi i besnikërisë.
Gjithashtu francezi përfitoi 2.87 milionë paund në vit nga të drejtat e imazhit, si dhe 1.875 milionë për çdo një nga katër kualifikimet e United në Champions League.
Fatura totale që United shpenzoi për Pogba-n shkon në rreth 218.93 milionë paund. E thënë ndryshe, mesfushori i kushtoi klubit rreth 970 mijë paund për secilën nga 226 paraqitjet e tij dhe rreth 5.6 milionë për çdo një nga 36 golat e shënuar.
/Albanianpost.com