U mbajt debati publik për orarin e punës së bizneseve në Prizren

Në sallën e Kuvendit Komunal në Shtëpinë e Bardhë sot nën organizimin e Drejtorisë së Turizmit dhe Zhvillimit Ekonomik (DTZHE) u mbajt debati publik me qytetarë, për të diskutuar lidhur me “Rregulloren për Orarin e Punës së Subjekteve Afariste, Hoteliere, Zejtare dhe Shërbyese në Komunën e Prizrenit”.

Debatin e hapi dhe e kryesoi drejtoresha e Drejtorisë së Turizmit dhe Zhvillimit Ekonomik, Sevil Kazaz, e cila njoftoi se me këtë rregullore do të përcaktohet fillimi dhe mbarimi i orarit të punës për veprimtaritë tregtare, zejtare, hoteliere e restorante, sportive, nëpër tregje, kafene, organizime, evente e të tjera, të cilat veprojnë apo ushtrojnë veprimtarinë e tyre ekonomike në territorin e komunës së Prizrenit.

Në debat të pranishëm ishin edhe nënkryetari i Komunës Eshref Memaj, nënkryetarja për Komunitete Memnuna Ajdini si dhe një numër i madh i përfaqësuesve të subjekteve afariste, hoteliere, zejtare, OJQ-ve dhe institucioneve të ndryshme, të cilët dhanë komentet dhe sugjerimet e tyre për këtë draft rregullore.

Komisioni i cili ka përgatitur këtë draft-rregullore do t’i shqyrtojë kërkesat dhe rekomandimet e pjesëmarrësve të këtij debati, ndërkaq rregullorja më pas do të kalojë për miratim edhe në Kuvendin Komunal, e më pas në Ministrinë e Administrimit të Pushtetit Lokal.