Në ambientet e objektit të papërfunduar të shkollës “Zef Lush Marku” në fshatin Velezhë të komunës së Prizrenit, është përkujtuar në 18 vjetorin e rënies heroike dëshmori, Pal Paluca, si dhe është shënuar 53 vjetori i institucionit arsimor të këtij lokaliteti.
Për të përkujtuar jetën dhe veprën e dëshmorit Pal Paluca dhe në shënimin e ditës së shkollës, përveç banorëve të Velezhës dhe fshatrave përreth, stafit dhe nxënësve, ishin të pranishëm familjarë të dëshmorëve, veteranë, invalidë e drejtues të shoqatave të dala nga lufta, oficerë të FSK-së, dhe zyrtarët më të lartë të komunës së Prizrenit.
Drejtori i shkollës, Ndue Çollaku, përvjetorin e 18 të rënies së dëshmorit Pal Paluca e quajti përvjetor të lavdisë së historisë sonë më të re.
“Në mesin e shumë dëshmorëve që dhanë jetën për lirinë e Kosovës është edhe dëshmori ynë Pal Paluca dhe sot përkujtojmë rënien e tij në luftë të drejtpërdrejtë me armikun gjakatar serb. Krahas këtij përvjetori shënojmë edhe 53 vjetorin e themelimit të shkollës që mban me krenari emrin e atdhetarit, Zef Lush Marku”, tha ai.
Kryetari i Prizrenit, Ramadan Muja, në fjalën e tij tha se shkolla e Velezhës ka nxjerrë nga gjiri i saj emra të respektuar në fusha të ndryshme, dhe se
“Këto troje nëpër shekuj kanë dhënë figura të ndritura të kombit tone, në mesin e të cilëve ishte edhe dëshmori, Pal Paluca”, tha ai.
Për jetën dhe veprën e dëshmorit, Pal Paluca, ka folur mësimdhënësi i kësaj shkolle, Ludovik Përgjokaj, i cili tha në mes tjerash tha se atdhedashuria e dëshmorit është e lidhur ngushtënë brumosjen e tij patriotike të familjes Paluca nga Trepetica.
“Pali, në luftën e lavdishme të UÇK-së, u shqua në shumë beteja anëkënd Kosovës, deri në rënien e tij heroike në afërsi të fshatit Piranë pak para se të shporreshin hordhitë gjakatare”, theksoi ai.
Për të gjithë të pranishmit, nxënësit e shkollës së fshatit Velezhë performuan një program të pasur me këngë, valle e recitime. /TV Prizreni/