Rektori i Universitetit të Prishtinës, Ramadan Zejnullahu ka marrë një vendim “sui generis”. Katër studentë të fakultetit të Mjekësisë do të regjistrohen në vitin e ardhshëm akademik, pra në vitin akademik 2015/2016 me “automatizëm”. Kjo “falë” një vendim të rektorit të UP-së, Ramadan Zejnullahu.
Gazeta Blic ka arritur që ta siguroj një kopje të këtij vendimi, ku thuhet se ky vendim i rektorit është marrë pas rekomandimeve që i ka dhënë Inspektorati i MASHT-it, ku këta studentë kishin bërë ankesë se u është bërë e padrejtë. Mirëpo, është interesant fakti, se këta studentë nuk janë pranuar për këtë vit akademik, por për vitin e ardhshëm 2015/2016.
Një praktikë e tillë nuk ka ndodhur asnjëherë në të kaluarën.Në arsyetimin e vendimit të rektorit thuhet se ky rekomandim i Inspektoratit të MASHT-it, në këtë fazë nuk mund të implementohet, prandaj regjistrimi i tyre do të bëhet me automatizëm në vitin e ardhshëm akademik.
Rektori i UP-së, Ramadan Zejnullahu ndërkaq, ende nuk ka marrë vendim se si do të vendoset me studentët e familjeve që vijnë nga veteranët dhe invalidët e luftës së UÇK-së, përkundër vendimit që kishte marrë ministri i Arsimit, Shkencës dhe Teknologjisë, Ramë Buja.