Lëvizja Vetëvendosje ka bërë thirrje që të ndihmohet Suhareka, pas përmbytjeve që kapluan qytetin që nga mbrëmë.
Sipas kësaj partie, në Suharekë gjendja vazhdon të jetë e njëjtë për shkak të shiut që vazhdon të bjerë.
“Në këto rrethana të jashtëzakonshme ne i bëjmë thirrje qytetarëve të Therandës, por edhe të komunave përreth që t’u dalin në ndihmë lagjeve e vendbanimeve të Therandës. Po ashtu, ne i bëjmë thirrje edhe gjithë anëtarësisë së Lëvizjes Vetëvendosje në Therandë që të jenë në ndihmë të vendbanimeve në nevojë në mënyrë që sa më parë e sa më lehtë të tejkalohet kjo fatkeqësi”, thuhet në thirrjen e Vetëvendosjes.
Sipas kësaj partie, Qeveria e Republikës së Kosovë nuk mjafton që vetëm ta presë bilansin e dëmeve në fund, por duhet që menjëherë t’i dalë në ndihmë Komunës së Therandës me të gjitha kapacitetet e nevojshme për ta lehtësuar sa më shumë këtë gjendje të rëndë atje.