Thuajse të gjithë e kanë ditur, por të gjithë e kanë nënvlerësuar dhe nuk bënë asgjë që të shmangej masakra në familjen Fiqi në periferi të Korçës.
Edmond Fiqi ka lënë të vrarë në krevatin bashkëshortor Albinën dhe djalin që nuk kishte mbushur ende një vjeç, dhe për të cilin kishte gëzuar aq shumë kur kishte lindur, pas disa shtatzënive të shkuara keq, me aborte të pavullnetshme të 40-vjeçares.
Në grindjet e tre ditëve të qëndrimit në Shqipëri, për motive xhelozie, Edmondi arrinte deri aty sa të dyshonte dhe akuzonte Albinën edhe për atësinë e fëmijës së tyre.
Fill pas krimit, Edmond Fiqi ka dalë nga dhoma në korridor dhe pasi ka zbritur shkallët për t’u larguar, nuk ka mundur të shkojë më shumë se pragu i portës, ku ka drejtuar armën drejt kokës dhe është vetëvrarë.
Familjet e Edmondit dhe Albinës, të cilët i kanë patur të ngrira marrëdhëniet për shkak të debateve të çiftit, tragjedia i ka ndarë përfundimisht. Albina dhe foshnja do prehen në Durrës, ndërsa Edmondi pranë varrezave të familjes në Korçë.
Sipas policisë kjo është tragjedia e dytë e ngjashme e ndodhur në familjen Fiqi. Në vitin 2001, vëllai i tij Alfredi ka vrarë gjyshin, vjehrrin dhe veten. /Shqiptarja/