Duke pas parasysh vendimin e djeshëm gjyqësor, shpalljen fajtor të kryetarit të Prizrenit Ramadan Muja për keqpërdorim të pronës publike, qendra e Lëvizjes Vetëvendosje në Prizren kërkon dorëheqjen e menjëhershme të tij dhe ekipit qeverisës një pjese e së cilës poashtu janë dënuar për bashkëpjesëmarrje në këtë veprim. Ky Vendimi gjyqësor e bën të pavlefshëm fitoren e tij në zgjedhje dhe poashtu e delegjitimon pushtetin e tij.
“Pas këtij vendimi prof. Ramadan Muja dhe ekipi i tij më nuk kanë autoritet moral dhe legal për udhëheqjen e komunës tonë. Ai prej sot nuk është kryetar i qytetit dhe nuk ka të drejtë për ushtrimin e detyrave dhe kompetencave si kryetar i qytetit. Prandaj kërkojmë dorëheqjen e menjëhershme, kurse nga presidentja e Republikës së Kosovës kërkojmë shpalljen e zgjedhjeve të menjëhershme për kryetar te Prizrenit.
Kohë për të humbur më nuk kemi, nëse profesori dhe ekipi i tij i akuzuar është i interesuar të ankohet ne vendimin e gjyqit le ta bëjë, është e drejtë e tij, por kësaj here mos të thirret në emër të qytetarëve. Ne si qytet nuk duam të bëhemi peng i problemeve të tij me ligjin. Ditët në vijim janë fund i një qeverisjeje te papërgjegjshme, të cilën ne vazhdimisht e kemi kundërshtuar. Për këtë dje edhe drejtësia e dha fjalën e vet”, ka thënë Arbër Rexhaj.
“Dëshirojmë te njoftojmë bashkëqytetarët tanë se nëse prof. Ramadan Muja nuk e jep dorëheqjen e menjëhershme Qendra e Vetëvendosje në Prizren së bashku me qytetarët e Prizrenit dhe partitë tjera te interesuara do te përdorë te gjitha kapacitetet e saj institucionale dhe publike qe Prizreni më në fund të lirohet nga ky pushteti i cili na mori pronat, dinjitetin dhe fytyrën e qytetit tonë”, përfundon ai.