Lëvizja Vetëvendosje!, pas takimit të sotëm të PDK-së, ku u diskutua për Gjykatën Speciale, ka vlerësuar se çdo tendencë e Qeverisë për rikthimin e kësaj gjykate është shkelje e papranueshme e parimit bazë të demokracisë.
VV-ja përmes një deklarate për media ka përsëritur se vendimi i Kuvendit të Kosovës për refuzimin e amendamenteve kushtetuese për themelimin e Dhomave të specializuara dhe Zyrës së Prokurorit të Specializuar (Nenin 162) është legjitim, fuqiplotë dhe i pandryshueshëm.
Vetëvendosje! në komunikatën e saj thotë se cilado tendencë e Ekzekutivit për ta riproceduar dhe rivotuar këtë amendament është shkelje e papranueshme e parimit bazë të demokracisë dhe ndarjes së pushteteve.
Kjo pasi sipas VV-së, e rrezikon pakthyeshmërisht integritetin institucional të vendit dhe fuqinë e vendimeve të organit më të lartë legjislativ në vend, Kuvendit si dhe paraqet shkelje të votës së lirë të deputetëve.
“Kundërshtimi i themelimit të Dhomave të Specializuara dhe Zyrës së Prokurorit të Specializuar përmes këtij Amendamenti kushtetues është i drejtë, legjitim dhe në mbrojtje të drejtësisë universale dhe sovranitetit të Republikës e integritetit institucional të saj. Një mbrojtje e tillë e integritetit institucional dhe parimeve universale karshi drejtësisë selektive është detyrë e secilit deputet pavarësisht subjektit që i përket a qëndrimit të tyre politik karshi çështjes. Aq më tepër bëhet e rëndësishme në këtë kohë të shpërfilljes flagrante që Ekzekutivi po ia bën autonomisë së Legjislativit dhe vendimeve të tij”, thuhet në komunikatë.