Deputeti nga ‘Nisma’ për Kosovën, Zafir Berisha, ka nënvizuar se zgjidhja më e mirë për tërë këtë katandisje që po ndodh në Kosovë, do të ishte që së pari të pastrohej politika dhe përmes saj edhe drejtësia që është e kapur nga politika, derisa siç tha jemi dëshmitarë se drejtësia në Kosovë është e kapur nga politika dhe për rrjedhojë ajo nuk mund që ta pastrojë politikën, pasi ato janë si dy hallka të një zinxhiri.
Por, sipas Berishës, për ta ndryshuar këtë gjendje të brishtë dhe aspak të mirë në drejtësi dhe në institucionet e tjera shtetërore, duhet fillimisht të gjykohet nga qytetari përmes votës dhe pastaj të futet në mënyrë thelbësore që të pastrohen organet e drejtësisë.
“Duke e ditur se vetë politika është e kriminalizuar dhe implikuar edhe në organet e drejtësisë, nuk mund të pritet ndonjë ndryshim i nevojshëm dhe domosdoshëm për qytetarin nga kjo kastë politike. Andaj, vetëm zgjedhjet do të mund të bënin ndryshime për të mirë, ngase për rrjedhojë, duke ndërruar kastën politike do të ndryshonin më pastaj për të mirë edhe gjërat edhe në fushën e drejtësisë”, ka deklaruar për gazetën “Kosova Sot” deputeti Zafir Berisha
(Kosova Sot)