Ideja e shtyrjes së zgjedhjeve lokale, po shihet të jetë e pa nevojshme, nëse vihet në nivel respektimi i masave në fuqi kundër pandemisë Covid-19, shkruan arbresh.info.
Për këtë kanë reaguar njohësit e proceseve zgjedhore, duke thënë se shtyrja e zgjedhjeve është e vështirë, pasi që mund të evitohen tubimet e mëdha të njerëzve, ndryshe nga dasmat dhe ahengjet e ndryshme që ishin lejuar, duke ndikuar në rritjen e rasteve.
Ish-kryetari i Komisionit Qendror të Zgjedhjeve, Mazllum Baraliu, për arbresh.info tha se shtyrja e zgjedhjeve nuk është opsionale, si parësore duhet të jetë vetëdijesimi i qytetarëve për respektimin e masave në zgjedhje.
“Meqë është caktuar data dhe është afruar data e zgjedhjeve nuk ka gjasa që të ketë ndryshime të mëdha, por duhet një kujdes më të mirë nga ana e Qeverisë dhe qytetarëve pasi që po shihet që mungon respektimi i masave, edhe normal mungon vetëdija e qytetarëve dhe kujdesit që duhet ta kenë në bazë të masave të marra dhe numrat janë alarmant, gjendja është e rëndë andaj duhet analizua dhe me veprua”, tha Baraliu.
Ndërkaq analisti Shkodran Ramadani, për arbresh.info, e quajti të vështirë kërkesën për shtyrjen e zgjedhjeve kjo pasi që e njëjta do duhej të ndodhte edhe me zgjedhjet nacionale.
“Është shumë e vështirë me u shty zgjedhjet. Duhet me u ruajt më shumë pasi që edhe në vitin e kaluar nuk janë shtyrë zgjedhjet nacionale. Fushata duhet të jetë më e kujdesshme, më e monitoruar, të mos bëhen takime në ambiente të mbyllura, duhet të respektohet distanca. Do të jetë e vështirë për t’u realizuar në përpikëri, por sidoqoftë nuk besoj që zgjedhjet janë më të rrezikshme se dasmat e kanagjegjet, kjo pasiqë nuk ka grumbullime të mëdha në zgjedhje apo fushat, janë gjithë kohës në qarkullim gjatë gjithë ditës nuk e shoh problem të madh, që të shtyhen zgjedhjet”, tha Ramadani.
Ramadani komentoi po ashtu edhe kërkesën e kryeparlamentarit, Glauk Konjufca, e sipas tij kjo vjen si shkak i rënies së Lëvizjes Vetëvendosje, që ka kapluar të gjitha komunat.
“Konjufca besoj që e ka kërkuar këtë pasi që LVV-je është shumë poshtë me rejting, si shkak i menaxhimit të dobët të pandemisë, qytetarët në njëfarë mënyre e kanë parë nivelin e tyre të kompetencës dhe besoj që pikërisht kjo është arsyeja se pse kërkohet edhe shtyrja e zgjedhjeve. Betejat politike shpesh herë bëhen shkaktar që gjërat të kalkulohen mirë”, deklaroi Ramadani.
Ditë më parë u diskutua edhe shkurtimi i ditëve të fushatës së zgjedhjeve e që kjo sipas juristëve është e jashtëligjshme.
Albert Krasniqi nga Demokracia Plus, për arbresh.info, ka thënë se kërkesa për shkurtimin e fushatës zgjedhore është e pamundur kjo pasi që për ta bërë këtë do duhej të ndryshojë edhe Ligji për zgjedhjet lokale.
“Periudha e fushatës zgjedhore nuk mund të shkurtohet për shkak se ka pasur edhe kërkesa në publik që kjo të jetë më e shkurt, në rastet kur ka zgjedhje të rregullta siç janë këto zgjedhjet lokale për kuvende komunale dhe kryetar të komunave, fushata është e përcaktuar me ligj dhe është 30 ditë, e kjo nuk mund të ndryshohet pa ndryshim të ligjit, kështu që do të mbetet për 30 ditë”, tha Krasniqi.
Ditë më parë presidentja, Vjosa Osmani, ka takuar kreun e KQZ-së, Kreshin Radoniqi, me të cilin u tha se është diskutuar pë Zgjedhjet Lokale 2021, por pa u specifikuar detaje.
Kundër shtyrjes së zgjedhjeve janë deklaruar edhe partitë opozitare parlamentare./arbresh.info/