Në ambientet e Universitetit të Evropës Juglindore u promovua romani “Dymbëdhjetë” i autorit Arben Çejku, ish ambasadori i Shqipërisë në Maqedoni
Shtimi i mjeteve të komunikimit dhe varfërimi i komunikimit e kanë shtyrë Çejkun për ta shkruar këtë roman të veçantë. “Shtytje për ta shkruar këtë roman u bë vëllai im. Pas disa vitesh ne po kalonim pushimet bashkë. Në ndërkohë që ne ishim aq pranë unë e ndjeja atë shumë larg. Ai gjatë gjithë kohës rrinte dhe komunikonte në internet. Unë isha pranë tij, ndërsa ai qeshte me persona të tjerë të cilët nuk ishin aty….Aty më lindi ideja për të shkruar. Pasi më duket se është vendosur një mur, një perde mes njerëzve. Si do të jetë e ardhmja e komunikimit?”, tha autori, shkruan gazeta lajm nga Maqedonia. Ai sqaroi se romani i tij nuk është autobiografik, por e ka fut lexuesin në kurth.
Rektori i UEJL-së, Zamir Dika tha se duke e njohur personalisht autorin nuk ka asnjë dyshim se edhe libri është i veçantë.
Ndërsa redaktorja e romanit Alma Bardhyli tha se në prozën bashkëkohore shqipe, ky libër vjen ndryshe. Mbi romanin “Dymbëdhjetë” foli profesor Fatmir Sulejmani, i cili tha se romani i kapërcen pritjet e zakonshme.
Romani “Dymbëdhjetë” u promovua së pari në panairin e librit në Tiranë, ndërsa të premten ai do të promovohet në Prishtinë.
Diplomati shqiptar shërbeu si ambasador deri në nëntor të këtij viti. Ai është një nga ambasadorët më të spikatur shqiptarë në Maqedoni.