Një tryezë diskutimi kundër dhunës ndaj gruas u mbajt në Suharekë, në vendin ku Zejnepe Bytyqi më 23 tetor vdiq nga dhuna e ushtruar prej burrit të saj.
Tryeza u organizua në kuadër të fushatës “16 Ditë të Aktivizimit Kundër Dhunës ndaj Gruas”.
Drejtori i Qendrës Kryesore të Mjekësisë Familjare Milit Elshani tregoi rastet e kërkimit të ndihmës mjekësore nga dhuna në familje në Komunën e Suharekës.
“Vetëm deri në muajin tetor janë paraqitur 43 raste të dhunës në familje në Qendrën e Mjekësisë Familjare, e cila është shumë shqetësues për një komunë të vogël si Suhareka. Ne i kemi lajmëruar policinë për këto raste, por se çka ka ndodhur me të nuk jemi në dijeni,” tha Elshani.
Por Policia e Suharekës nuk ishte në dijeni se çka ka ndodhur me këto raste.
Numri i madh i rasteve të dhunës në familje u vlerësua shqetësues edhe nga zyrtari ligjor i Komunës së Suharekës Avni Bytyqi që tha se kjo dhunë duhet të merret seriozisht nga organet e drejtësisë që të mos ketë përfundime tragjike.
Flurie Bytyci, kryesuese e grupit të Grave të Asamblesë të Komunës së Suharekës tha se ka mundur të ndodhë parandalimi i vdekjes së Zejnepe Bytyçqt.
“Te zonja Zejnepe Bytyqi është një lëshim nga organet e policisë që e kanë ditë se rasti ka qenë që 6 vjet dhe mua po më doket se ka qenë njëfarë lëshimi, nëse e kanë ditur është dashur me parandaluar, me thirrë, me biseduar më shpesh, me pas një intervenim te ai person,” tha asamblistja Bytyçi.
Por togeri në Policinë e Kosovës Bashkim Krasniqi tha se policia në rastin e të vdekurës nga dhuna e bashkëshortit, ka kryer punën e saj.
“Për dy rastet e Zejnepes që i ka pasë një në vitin 2002 dhe tjetrin në vitin 2012 për dhunë në familje ne punën tonë e kemi kry, pasi i kemi nisë për prokurori,” tha Bashkim Krasniqi.
Tryeza u organizua nga OSBE-ja në bashkëpunim me Komunën e Suharekës, ndërsa morën pjesë edhe përfaqësues të organeve të rendit dhe drejtësisë.
16 ditët e aktivizimit nisën të mërkurën në Prishtinë, ndërsa edhe aty u fol për rastin e Zejnepe Bytyçit. /Kallxo.com