Në Kampionatin Ballkanik për seniorë, i cili u mbajt në Oradea të Rumanisë, Ekipi i Taekwondosë së Kosovës ka arritur një sukses të jashtëzakonshëm duke fituar katër medalje.
Jon Gashi shkëlqeu në kategorinë -80 kg, duke siguruar medaljen e artë, ndërsa Bleron Ademi u stolis me medaljen e argjendtë në kategorinë -58 kg.
Gjithashtu, Elion Agushi dhe Rona Gashi fituan medalje të bronzta, përkatësisht në kategoritë -74 kg dhe -57 kg./PrizrenPress.com/
Fletët e zbehta e të përgjumura
Kalamenden, e humbin sigurinë,
Anohen, hepohen e posht bijnë
Në çilimin e vakët që e valëvit era.
S’është ky det i vdekur
Që e vajton vit e stinë;
Janë mbyllur llogaritë e verës
Stinë e pjekur sytë na i ngin.
Kujdes! Pashtriku vuri plisin e bardhë
Një këshillë e një kumt nga goja do t’i dalë:
“Bëhuni gati, o ju të pasur e bujarë
Të varfërit janë gati, ofrojani dorën e mbarë”.
Unë dhe vjeshta jemi moshatarë,
Shetisim bashkë e përshpërisim në vesh
Ajo mua shtatëdhjetë e tetë urime
Unë asaj vetëm përtërirje të mbarë.
Sa llogari dhashë për pranverë e verë
Deri sa e shkarkova trastën me pemë
Do doja ta dija për shijen që kishin,
Koha sa aromë do kishte përherë.
Aty dy të rinj mbahen të shtrënguar,
I shoh me zili dhe më duken si një
S’di pse në vjeshtë i fshihen pranverës
Do ta kalojnë dimrin me afshe të nxehta.
Nga frika se po e humbin përgjithmonë gjelbërimin
Tërë bota murrtohet, hesht e zbehet,
Vetëm plaku në sheti dredh mustakun
Pushon mbi shkop, ofshan e në kujtime prehet.
Umberto Eco përveç veprave të tij autoriale, la pas vetes edhe një koleksion të madh librash.
Shkroi letërsi, kritikë letrare, tekste akademike mbi semiotikën, por edhe studime për gjithçka, nga estetika mesjetare deri te media moderne.
Shkroi shumë. Por edhe lexoi shumë. Hapeni cilindo kapitull vepreje të tij. Fanepseni nga dija, informacioni dhe formimi i gjithanshëm.
Umberto Eco dëshmoi një mendje të thellë, por një Mendja e tillë kërkon një bibliotekë ose biblioteka të pasura.
Mund të imagjinojmë sa kala të tilla dijeje ka vizituar Eco në udhëtimet e tij nëpër botë. Ndërsa atë që ai e ndërtoi vetë, mund ta shohim në videon e mësipërme.
Edhe pse jo e pafundme si biblioteka e të gjithë librave të mundshëm të imagjinuar nga Borges, biblioteka private e shtëpisë së Ecos duket, nga këndvështrime të caktuara, pothuajse po aq e madhe.
Kamera e ndjek Umberto Econ teksa kalon raft pas rafti.
Thuhet se biblioteka e Ecos përmbante 30,000 libra dhe prirej t’i ndante vizitorët në dy kategori.
Ata që reagojnë me “Uau! Z. Eco, çfarë bibliotekë keni! Sa prej këtyre librave keni lexuar?” dhe të tjerët – një pakicë shumë e vogël – të cilët kuptojnë se një bibliotekë private është një mjet kërkimi.
Librat e lexuar janë shumë më pak të vlefshëm se ato të palexuara.
Në faqet e librit të tij, “Pse librat zgjasin jetën” ai thotë diçka proverbiale.
“Kush nuk lexon, në moshën 70-vjeçare do të ketë jetuar vetëm një jetë: të vetën. Lexuesi do të ketë jetuar 5000 vjet: që kur Kaini vrau Abelin, kur Renzo u martua me Lucian, kur Leopardi admironte pafundësinë… sepse leximi është një pavdekësi”
Në testamentin e tij, vetë shkrimtari ka lënë porosi që një pjesë e librave të bibliotekës së tij t’i dërgohen Arkivit të Universitetit të Bolonjës. Librat e literaturës klasike ia ka lënë Bibliotekës Kombëtare të Brera-s në Milano./ObserverKult/
Një shtetas i Shqipërisë është arrestuar dje në Vërmicë.
Sipas policisë ai në veturën e tij kishte dy femra shtetase të Tajlandës pa dokumentacion përkatës dhe dyshohet se ishin duke u kontrabanduar.
“Është arrestuar i dyshuari mashkull shtetas i Shqipërisë, pasi që në veturën e tij kishte dy femra shtetase të Tajlandës pa dokumentacion përkatës dhe dyshohet si ishin duke u kontrabanduar nga i dyshuari. Rasti është duke u hetuar”, thuhet në raportin e Policisë.
Pas tri javësh si mysafirë, Bashkimi rikthehet në palestrën e tij për derbin e qytetit kundër Proton Cable Prizreni, në kuadër të xhiros së 10-të të Pro Credit Superligës.
Ndeshja do të zhvillohet sot, më 17:00, në palestrën “Sezai Surroi” në Prizren.
Të dyja skuadrat do të kërkojnë fitoren në një përballje të fortë që pritet të ndezë atmosferën mes tifozëve vendas./PrizrenPress.com/
Instituti Hidrometeorologjik i Kosovës ka bërë të ditur se moti sot do të jetë kryesisht i vranët, me reshje shiu dhe bore.
Në njoftimin e këtij instituti bëhet e ditur se temperaturat minimale do të lëvizin ndërmje -1 deri 1 gradë Celsius.
“Të shtunen parashihet të mbajë mot kryesisht i vranët dhe me reshje shiu dhe bore.Temperaturat minimale do të lëvizin ndërmje -1 deri 1 gradë Celsius, ndërsa maksimalet e ditës parashihen të lëvizin ndërmjet 1-3 gradë Celsius. Do të fryjë erë kryesisht nga verilindja me shpejtësi 1-9m/s”, thuhet tutje në njoftimin e IHMK-së.
Çmimet e produkteve ushqimore, qytetarëve po u duken të larta. Si rrjedhojë, një pjesë e konsumatorëve thonë se zakonisht presin që gjatë festave t’i mbushin shportat ushqimore, për shkak të zbritjeve.
Të dhënat e Agjencisë së Statistikave të Kosovës flasin për rritje të çmimeve të konsumit gjatë muajit tetor, krahasuar me periudhën e njëjtë të vitit të kaluar.
Për 11.3% janë rritur çmimet e kafesë dhe të çajit, për 6.2% të ujit mineral e lëngjeve, për 3.7% çmimet e qumështit, djathit dhe të vezëve, ndërsa për 3.1% ato të mishit, raporton RTK.
Lulzim Beqiri, njohës i ekonomisë, thotë se institucionet duhet të fokusohen në mbikëqyrjen e çmimeve në treg.
Për të diskutuar rreth Inspektoratit Qendror të Mbikëqyrjes së Tregut dhe Ligjit për Mbrojtjen e Konsumatorit, të martën u mblodh Komisioni Parlamentar për Ekonomi. Mbledhja dështoi, në mungesë të kuorumit.
