Goran Rakiqit nuk i është dridhur karrigia as pas vendimit të tij që gjysmën e urës qendrore mbi lumin Ibër ta kthejë në “Park të paqes”, një barrikadë kjo që pengon qarkullimin në qytetin e ndarë etnikisht. Përbën shkelje ligjore vendimi i këtij kryetari të komunës së Mitrovicës Veriore për të mos lejuar lirinë e lëvizjes.

Në asnjë nen të tij, Ligji për vetëqeverisje lokale nuk ia jep kompetencën kryetarit të vendosë për mbyllje rrugësh. Këtë kompetencë nuk e ka as Kuvendi Komunal. Megjithëkëtë, ky institucion ka në përgjegjësi të vendosë për planifikimin urban dhe rural.

Emir Azemi, zëvendëskryesues i Kuvendit Komunal të Mitrovicës Veriore, që popullohet kryesisht nga serbët, ka thënë se çështja e “parkut” kurrë nuk është diskutuar në organin ku është i përfaqësuar./Koha Ditore/

Lutfi Haziri thotë se LDK prishi njëanshëm koalicionin me PDK-në për shkak të mosfunksionimit të një koalicioni të madh. Ai mendon se LDK’në dhe VV’në i bashkojnë më shumë pika se që i ndajnë.

Ai kështu i është përgjigjur Doris Pack, e cila kishte thënë se Kosovës i duhet një koalicion mes LDK’së dhe VV’së.

“Eurodeputetja zonja Doris Pack e ka dhënë qëndrimin e vetë, që unë e respektoj, por po e ritheksoj se koalicioni LDK-PDK ka qenë në fuqi dhe është ndërprerë njëanshëm nga LDK. Nuk duhet harruar ky fakt. Këtë fakt edhe zonja Pack e di. Prishja e njëanshme e koalicionit ‘guns n’ roses’ nga ana e LDK-së duhet të shihet si momentum kur është divorcuar politikisht koalicioni i madh në Kosovë për shkak të mosfunksionimit.

Nuk është pengesë që edhe me Vetëvendosjen të bisedohet për partneritet, pse jo? Vetëvendosje është forcë politike parlamentare, forcë politike me ideologji të qartë dhe me kërkesa të qarta. Deri tash është punuar në parime programore dhe në angazhime të përbashkëta. Po punohet më shumë në pikat që përafrojnë sesa në pikat që ndajnë. L.H”, ka shkruar Haziri në Facebook.

Ish deputeti i PDK-së, Nait Hasani ka postuar një fotografi në Facebook, me disa vargje “filozofike”.

“Kam kaluar momente që nuk mendoja se do mund ti kaloja…

Kam jetuar dhimbje që mendoja se po më vrisnin..

Kam përjetuar zhgënjime nga persona që nuk e prisja, pasi atyre vetëm të mira u kisha sjelIur…

Kam pyetje për të cilat nuk kam përgjigje…

Por unë jam këtu, pasi jeta ime nuk ka përfunduar ende, dhe herët apo vonë do vijë dhe dita ime e fitores, sepse unë: UNË NUK DORËZOHEM KURRË..! N.H.”, kashkruan Hasani në Facebook.

Kryetarja e Komisionit Qendror të Zgjedhjeve, Valdete Dala e ka vlerësuar me notat më të larta procesin zgjedhor më 8 qershor, duke thënë se këto zgjedhje ishin më të mirat të mbajtura ndonjëherë në Kosovë dhe se votat janë numëruar në ditën e votimeve.

Daka ka thënë se publiku duhet ta kuptojë që KQZ nuk i numëron votat më. Ajo ka thënë se votat janë numëruar më 8 qershor. Në emisionin “Click” të RTV21 Daka tha se tani në Qendrën e Numërimit dhe Rezultateve (QNR), numërohen vetëm votat që janë me kusht dhe me postë.

“Të vetmet vota që numërohen në QNR janë votat me kusht dhe votat me postë. Duhet me kuptu edhe publiku që ne nuk i numërojmë votat, më 8 qershor janë numru votat”, ka thënë Daka.

KQZ nuk ka obligim që të kujdeset për skenën politike, por të nxjerrë rezultate të sakta, të pranueshme për të gjithë. Nuk është faji i KQZ-së pse rezultatet kanë dalë ashtu si kanë dalë. Ka pasur spekulime se po rregullohen rezultate.

“Dita e nesërme do të tregojë nëse ka pasur manipulime kur të shohim ndryshimet në rezultat”, tha ajo.

Ajo tha se nga rinumërimi i votave ka pak lëvizje sa u përket partive por se ndryshime ka pasur në votat e kandidatëve, disa prej të cilëve

“Nuk ka manipulime si në vitin 2010, ishin zgjedhjet më të mira të organizuara pas luftës”, tha Daka në “Click” në RTV 21.

Ndërkohë ajo tha se “zgjedhje perfekte nuk ka askund” por se këto zgjedhje ishin mjaft të mira për kushtet e Kosovës.

Kryetari i Këshillit Kombëtar të NISMA për Kosovën, Jakup Krasniqi, është i bindur se koalicioni opozitar, i cili po synon ta krijojë Qeverinë, pas zgjedhjeve të 8 qershorit, nuk do të jetë kundër dialogut me Serbinë dhe ai nuk lëshon pe në këtë pikë.

Në një bisedë për Politiko.net, ai thotë se është interesi i Kosovës dhe Rajonit të që problemet ekzistuese të zgjidhen dhe marrëdhëniet të normalizohen.

Sa u përket kushteve të vetëvendosjes për këtë çështje, Krasniqi mendon se as koalicioni dhe as Qeveria nuk duhet të lidhen me asnjë kushtëzim.

“Ne nuk jemi kundër dialogut. Ne jemi për dialog. Është edhe interes i Kosovës edhe i Rajonit që problemet ekzistuese të zgjidhen me dialog. Pastaj, cila do të jetë vajtja e dialogut, mendoj se është një çështje krejt tjetër. Por, realisht, as koalicioni, as mundësia e formimit të Qeverisë së re, nuk duhet të lidhet me asnjë kushtëzim. Mendoj se për këto çështje duhet të bisedohet dhe që kjo qeverisje të jetë një platformë e përbashkët” ka thënë ai.

Krasniqi ka thënë se askush nuk duet të jetë kundër dialogut.

“ Mendoj se askush nuk duhet të jetë sot kundër dialogut. Pse me qenë kundër dialogut, kur çështjet duhet të shtrohen dhe pala shqiptare duhet të ketë të qartë çka duhet të bisedojë dhe cili është interesi. Ne jemi të bindur se interesi ynë dhe i gjithë rajonit është për t’i normalizuar marrëdhëniet me të gjitha vendet fqinje, përfshirë edhe Serbinë” ka thënë ai.

Kryeparlamentari në detyrë duke komentuar mundësinë e prishjes së koalicionit për shkak të dialogut për shkak të refuzimit të VV-së, ka thënë se kjo nuk është në interes të Kosovës.

“Kjo nuk dihet, realisht, varet shumë prej tyre. Por, një gjë e di që nuk është interesi as i Qeverisë, as i Koalicionit dhe as i Kosovës që të kundërshtohet paraprakisht dialogu. Dialogu duhet të zhvillohet, por ai duhet të jetë i përgatitur mirë” ka thënë ai.

Krasniqi ka thënë se VV në një mënyrë a në një tjetër e ka mbështetur koalicionin.

Është vështirë të themi, unë nuk jam pjesë e bisedimeve në këtë fazë, natyrisht ne jemi duke vazhduar me bisedime, por këto janë çështje që duhet të bisedohen mes subjekteve politike që e kanë shpallur Koalicionin dhe Vetëvendosjes e cila në një formë ose një tjetër ka pranuar që të jetë mbështetëse e këtij koalicioni. Do të varet shumë nga udhëheqësit kryesorë të Koalicionit. /Politiko.net/

Programi zhvillimore dhe proceset tarifore kanë qenë temë e dëgjimit publik që u mbajt në organizim të Kompanisë Rajonale të Ujësjellësit „Hidroregjioni jugor“ . Përveç anëtarëve të Këshillave Konsultative të Konsumatorëve të regjioneve të caktuara, morën pjesë edhe përfaqësuesit e Zyrës së rregullatorit. Në fillim të këtij dëgjimi publik Fadil Berisha paraqiti një historik të shkurtër të kompanisë, duke u ndalur në dhënien e hollësive të menaxhimit, realizimit të projekteve dhe inkasimit në vitin e fundit. Në këtë takim zyrtari i zyrës së Rregullatorit Hysni Feka tha se në përcaktimin e tarifave merren parasysh shpenzimet që duhet t’i mbulojë Kompania që të ketë furnizim të qëndrueshëm dhe cilësor me ujë të pijes.

Disa qytetarë të pranishëm kanë paraqitur shqetsimin e tyre për mungesë ujit në një pjesë të retë lagjes Arbanë, për të cilën zyrtarët e Kompanisë Hidroregjioni jugor thanë se janë të njoftuar, por në atë pjesë të lagjes Arbanë tha Rexhë Uka shtëpitë e reja po ndërtohen përditë, prandaj s’ka rrjet të ujësjellësit por Kompania tha ai e ka parasysh dhe shumë shpejtë do të reagojë edhe në këtë pjesë.

Edhe zyrtari tjetër I Kompanisë Rajonale të Ujësjellësit Hidroregjioni jugor, tha se Kompania është në përpjekje të vazhdueshme për të siguruar furnizim të qëndrueshëm dhe cilësor.
Qytetarët janë interesuar se cila do të mund të jetë rritja e tarifave për ujë dhe kanalizim në të ardhmen, por zyrtari I zyrës së rregullatorit tha se ndonjë rritje eventuale nuk mund të dihet, sepse tarifat varen nga shpenzimet që duhet t’I mbulojë Kompania që të ketë furnizim të qëndrueshëm dhe cilësor me ujë të pijes. /Tv Opinion/

Partia Demokratike e Kosovës është në pritje të certifikimit të rezultateve nga ana e Komisionit Qendror të Zgjedhjeve dhe në pritje të interpretimit të Gjykatës Kushtetuese për çështjen e mandatarit për formimin e qeverisë së re të Kosovës. Kështu ka thënë për Gazetën Blic njeriu i dytë i PDK-së, Hajredin Kuçi.
“Jemi në pritje të certifikimit të rezultateve dhe në pritje të kushtetueses”, ka thënë Kuçi.

Sipas tij, pasi të ndodhin këto dy procese, PDK do të veprojë. Megjithatë, ai ka thënë se cilido qoftë interpretimi i Gjykatës Kushtetuese të Kosovës për çështjen e mandatarit për formimin e qeverisë, partia e tij do ta respektojë.

Ndërkohë që në medie është raportuar se Kuçi mund të jetë ndër pretendentët për kryeministër të ardhshëm të vendit, në rast se Gjykata Kushtetuese e vendit do t’ia njoh të drejtën vetëm PDK-së ta formoj qeverinë, por një gjë të tillë e ka mohuar vetë ai.

“As ndërmend nuk e kam”, ka thënë Kuçi për Gazetën Blic.

Pas zgjedhjeve të 8 qershorit, LDK, AAK dhe Nisma për Kosovën, me mbështetjen edhe të Lëvizjes Vetëvendosje, kanë arritur një marrëveshje për formimin e qeverisë së re të Kosovës, duke e lënë kështu në opozitë PDK-në e Hashim Thaçit, ndonëse kjo e fundit në zgjedhje doli si partia e parë me 30 për qind.

Presidentja e vendit, Atifete Jahjaga duke mos dashur që vetë të marrë vendim se kënd ta nominoj për kryeministër, Hashim Thaçin apo Ramush Haradinajn, këtë çështje e ka dërguar për interpretim në Gjykatën Kushtetuese të Kosovës.

Mësohet se gjatë kësaj jave Gjykata Kushtetuese e Kosovës do t’i përgjigjet Jahjagës në kërkesën e saj./Gazeta Blic/