“EC Ma Ndryshe” të premten mbrëma në Prizren ka organizuar debatin “Merr pjesë n’iftar për rininë dhe transparencën!”, në kuadër të cilit aktivitet është publikuar analiza e dytë “Rinia dhe Transparenca: Përparim apo stagnim?”, si vazhdim i analizës së parë “Rinia dhe Transparenca: Të përjashtuar apo të injoruar?”. Gjatë debatit, është prezantuar edhe dokumentari mbi aktivizmin e të rinjve dhe transparencën e komunës, i titulluar “Sa aktiv, aq transparent?”

Në këtë organizim, në cilësinë e panelistëve kanë marrë pjesë Kujtim Gashi, Kryesues i Kuvendit të Komunës së Prizrenit dhe Leotrim Gërmizaj, Kryetar i Këshillit të Veprimit Rinor Lokal në Prizren. Ndërsa pjesëmarrës në diskutime kanë qenë zyrtarët komunal, përfaqësuesit nga organizata joqeveritare, të rinjtë, studentët e Universiteteve dhe nxënësit e shkollave të mesme të qytetit të Prizrenit.

Laura Lutfiu, Koordinatore Projekti në “EC Ma Ndryshe” duke shpalosur analizën ka bërë të ditur se në bazë të perceptimeve të rinjve të Prizrenit dhe të Gjilanit del se në disa sfera që lidhen me transparencën komunale, qeveria lokale e Gjilanit ka një përparësi të lehtë përballë Prizrenit, megjithëse trendët nuk dallojnë në përqindje të madhe. Ajo ka theksuar se anketimi i dytë mbi transparencën komunale tregon se 47 për qind të rinjve të Prizrenit nuk kanë njohuri për vendimmarrjen, derisa 43 për qind e të rinjve kanë njohuri. Në lidhje me transparencën komunale, aktualisht 41 për qind të rinjve të Prizrenit mendojnë se Ekzekutivi lokal është mesatarisht transparent.

Luftiu ka shtuar se mbi 18 për qind të respondentëve të Prizrenit kanë njohuri për mundësinë e përcjelljes së vendimmarrjes komunale përmes medieve sociale dhe se më shumë se çereku i të anketuarve në Prizren, e dinë se mund të iniciojnë peticione online, derisa afër 15 për qind prej tyre kanë njohuri se ankesat e tyre në raport me qeverisjen komunale mund t’i adresojnë në rubrikën “Ankohu” te merrpjese.org, karshi 10 për qind të rinjve prizrenas që e dinë se mund të japin propozime për listën e projekteve kapitale të komunës, në kuadër të rubrikës “Buxhetimi me pjesëmarrje”. Duke u bazuar në rezultatet e hulumtimit, Luftiu ka pohuar se ato tregojnë se në disa aspekte të përfshirjes së rinisë në vendimmarrje si dhe në transparencë ka përparim, në disa segmente ka stagnim, ndërkohë që mediat sociale po zënë vend gjithnjë e më tepër në jetesën e përditshme, trend i cili duhet të përcillet edhe nga institucionet lokale në komunikimin e tyre me publikun.

Gjatë zbatimit, sipas saj projekti ka arritur që të prodhoj disa rezultate modeste, që mund të shërbejnë si udhërrëfyese për zhvillime më pozitive në drejtim të përdorimit të medieve sociale si mjete për pjesëmarrje dhe transparencë në nivel lokal, nga komuna dhe shoqëria civile.

Ky aktivitet është realizuar në kuadër të projektit “Rritja e pjesëmarrjes përmes medieve sociale”, që është përkrahur financiarisht nga Programi për Zhvillim i Kombeve të Bashkuara në Kosovë (UNDP) dhe njëherësh shënon përmbylljen e ciklit të parë të aktiviteteve të projektit. /PrizrenPress.com/

Kryetari i Prizrenit, Ramadan Muja ka vendosur që t’i hapë mbledhjet e drejtorëve të Ekzekutivit. Ai nga java e ardhshme, për herë të parë do t’i ftojë mediat që të jenë prezent gjatë mbledhjes së Ekzekutivit.

Zëdhënësi i Komunës, Ymer Berisha tregon se kryetari Muja ka marrë vendim që t’i hapë mbledhjet me media edhe pse ligji nuk obligon një gjë të tillë.

“Nga java e ardhshme do të ftohen edhe mediat që t’i përciellin mbledhjet e drejtorëve të Ekzekutivit”, konfirmoi Berisha.

Forumi “Transparenca” i ka bërë thirrje kryetarit Ramadan Muja që t’i hapë mbledhjet dhe të tregohet më transparentë në raport me mediat dhe qytetarët.

Përfaqësuesit e këtij forumi patën paralajmëruar se do t’i përdorin të gjitha mekanizmat për të detyruar Mujën që t’i hapë mbledhjet dhe të tregohet më transparent në marrjen e vendimeve për qytetarët.

Zëdhënësi Ymer Berisha thotë ndërkaq se hapja e mbledhjeve nuk do të bëhet për shkak presioneve të Forumit “Transparenca”.

“Komuna e Prizrenit është njëra ndër komunatë në Kosovë që është treguar transparente me qytetarët, prandaj kryetari Muja ka vendosë që të rritë transparencën edhe aty ku ligji nuk e obligon”, thotë Berisha. /PrizrenPress.com/

Edhe pse është konstituuar Kuvendi i Kosovës, nuk dihet se kur do të mblidhet për të vazhduar seancën parlamentare për zgjedhjen e tre nënkryetarëve të tjerë të Kuvendit dhe trupat e tjerë punues.

Mandati i Kuvendit, sipas nenit 11 të Rregullores së punës së Kuvendit, fillon nga dita e mbajtjes së mbledhjes konstituive, e cila mbahet brenda 30 ditëve nga dita e shpalljes së rezultateve të zgjedhjeve.

Ndërkaq, Neni 16 i Rregullores së punës së Kuvendit, pika 2 e tij, thotë se Kryetari i Kuvendit e thërret mbledhjen e Kryesisë, nëse kërkohet nga një grup parlamentar ose së paku nga pesë (5) për qind, përkatësisht nga gjashtë (6) deputetë të Kuvendit.

Kurse pika tre e nenit 16 thotë se vendimet e Kryesisë merren me konsensus. Në mungesë të konsensusit vendoset me shumicë votash të atyre që votojnë.

Në rast të votave të barabarta, vendos vota e Kryetarit, dhe pika 5 thotë se Kryesia e Kuvendit, për çështje të caktuara, i fton në mbledhjet e Kryesisë edhe kryetarët e grupeve parlamentare.

Duke qenë i zgjedhur nga shumica legjitime e pjesëmarrësve në seancë konstituive dhe pranimin e detyrës së kryetarit të Kuvendit, Isa Mustafa, ka marrë me seriozitet dhe me përgjegjësi që të kryejë obligimet e marra nga përfaqësuesit legjitimë të popullit, ndërsa të premten ai ka marrë rrugën për në Kuvend për të filluar ditën e pare të punës si kryetar i Kuvendit.

Tani mbetet të shihet se cilët do të jenë hapat pasues të kryetarit të Kuvendit, Mustafa, nëse do të thërrasë mbledhje të Kryesisë para se Gjykata Kushtetuese të jep interpretimin e saj, për mandatin e tij, apo edhe do të respektojë procedurat sipas Rregullores së punës.

Thirrja e mbledhjes së Kryesisë, mbase mund të neglizhohet për faktin se pas seancës konstituive, PDK-ja, e cila u mundua të ‘kontrabandojë’ zgjedhjen e kryeparlamentarit, lëshoi sallën në shenjë proteste, meqë Grupi parlamentar LDK-AAK-Nisma, nuk kanë të drejtë të propozojnë kandidatë për kryeparlamentar, ndërsa për këtë ata tashmë i janë drejtuar Gjykatës Kushtetuese për të kërkuar ‘pezullimin’ e procedurës së zgjedhjes së kryparlamentarit.

Kjo ankesë në Gjykatën Kushtetuese, mbase mund të pengojë edhe punën e legjislativit, sikur edhe veprimin e Presidentes për të marrë vendimin për mandatarin e formimit të Qeverisë.

Mbetet të shihet se cilat do të jenë veprimet e këtyre dy institucioneve në ditët në vijim. /Botapress/

Kreu i Lidhjes Demokratike të Kosovës, Isa Mustafa, tashmë edhe kryetar i Kuvendit të Kosovës, ka thënë se beson në paanshmërinë dhe profesionalizmin e Gjykatës Kushtetuese për lëndën e parashtruar nga PDK-ja.

Lexojeni postimin e plotë në Facebook:

Miq të nderuar,

Kosovës i nevojitet që sa më shpejt të themelohet Qeveria e dalë nga këto zgjedhje. Kancelarja Merkel dje kishte deklaruar se kjo duhet të ndodhë urgjentisht.

Partia Demokratike e Kosovës e uzurpoi me veprimet e saj dhe përmes deputetes Flora Brovina konstituimin e Kuvendit të Republikës së Kosovës më 17 qershor, prandaj e drejta e 83 deputetëve të cilët vazhduan mbledhjen për t’i zgjedhur organet e Kuvendit ishte pasojë e këtij uzurpimi të paparë deri më tani në jetën parlamentare të Kosovës.

Unë mora 65 vota për Kryetar të Kuvendit nga 83 deputetë sa ishin në sallë. Falënderoj edhe deputetët e Lëvizjen Vetëvendosje për qëndrimin e tyre konstruktiv dhe shtetëformues. Ndërkaq, votën e tyre e respektoj si votë të vullnetit politik.

Kam besim të plotë se Gjykata Kushtetuese do ta trajtoj në mënyrë të paanshme dhe profesionale lëndën e parashtruar nga PDK. Por jam shumë i bindur se PDK do të duhej ti adresohej vetvetes, dhe t’ia shtroj pyetjen: pse nuk i pati me veti 83 deputetë për ta përkrahur, por mbeti vet me 37 deputetë. Këtë përgjigje nuk mund ta merr nga Gjykata Kushtetuese, sepse kjo është përgjigje politike.

Grupi Parlamentar LDK AAK Nisma e ndjen veten të fuqishëm me përkrahjen e 83 deputetëve dhe me votën që e mori në seancën Konstituive të Kuvendit. Unë kam përgjegjësi ndaj votës së deputetëve që përfaqësojnë vullnetin e sovranit dhe do të punojë për mbarëvajtjen e punës së Kuvendit të Republikës së Kosovës.

Jam I bindur se çdo ndërhyrje politike dhe çdo jo konsekuencë në këtë proces, vetëm sa do ta prolongoj konstituimin e Qeverisë dhe punën normale të Kuvendit, por se rezultat do të jetë mobilizimi edhe më i madh dhe partneriteti i të gjitha forcave që nuk pajtohen me këtë sjellje dhe qeverisje të PDK-së, përkatësisht i LDK-së, VV, AAK-së, Nismës dhe deputetëve që përfaqësojnë popullatën jo shumicë.

Rreth 100 mijë qytetarë të Kosovës e kanë nënshkruar peticionin nëpërmjet të cilit kërkohet drejtësi ndërkombëtare për gratë e dhunuara gjatë luftës në Kosovë.

Përfaqësuesi i sekretariatit organizativ të peticionit, Visar Xani, bërë me dije se në fillim të muajit gusht do të bëhet dorëzimi i këtij peticioni në OKB në mënyrë që të ketë drejtësi për gratë e dhunuara gjatë luftës së fundit në Kosovë.

“Procesi i mbledhjes së nënshkrimeve në përgjithësi ka ecur shumë kënaqshëm. Deri disa orë para përmbylljes së procesit të nënshkrimit të peticionit, pa përfshirë ekipet mobile që i kemi pasur në terren, janë mbledhur rreth 100 mijë nënshkrime”, ka treguar Xani për “Epokën e re”.

Ai ka thënë se qytetarët i kanë dhënë mbështetje të fuqishme peticionit prandaj, sipas tij, edhe lobimi në OKB do të jetë më i lehtë.

“Duke pasur parasysh situatën e ndjeshme, siç është periudha e verës dhe situatave të tjera, mendoj se është një numër i kënaqshëm i këtyre nënshkrimeve, por numri real i nënshkrimeve mbetet të shihet vetëm pasi të bëhet verifikimi i nënshkrimeve. Qytetarët janë përgjigjur në mënyrë masive, kështu që është një vetëdije e mirë për këtë çështje, sepse ka ardhur një mbështetje e fuqishme, prandaj lobimi ynë do të jetë më i lehtë”, ka deklaruar Xani, duke shtuar se gjatë javës së ardhshme do të bëhet verifikimi i këtyre nënshkrimeve në mënyrë që kërkesat drejtuar OKB-së të jenë korrekte dhe serioze.
“Presim që këto nënshkrime javën e ardhshme të vlerësohen nga ekspertët e statistikave në mënyrë që të jemi sa më korrektë karshi OKB-së dhe kërkesa jonë të jetë më serioze”, është shprehur ai.

Në këtë kontekst, Xani ka thënë se në fillim të muajit gusht peticioni me nënshkrime të verifikuara do t’i dorëzohet OKB-së.
“Kjo pritet të bëhet varësisht prej terminëve dhe kohës së përshtatshme si për lobim, ashtu edhe për çështje të tjera teknike, por shpresoj se fillimi i muajit gusht do të jetë periudha kur do ta fillojmë dorëzimin e nënshkrimeve dhe lobimin me qëllim që peticioni dhe kërkesat tona të realizohen deri në fund. Pra, vetë nënshkrimi i peticionit në mënyrë të suksesshme na bënë optimistë se përfundimi i këtij procesi do të jetë i suksesshëm”, ka thënë Xani.

Ai ka shprehur optimizëm se OKB-ja do t’i ketë parasysh kërkesat e tyre dhe do t’i dërgojë në Kosovë përfaqësuesit e saj për ta hetuar këtë çështje.

“Presim që OKB-ja t’i marrë parasysh kërkesat tona dhe t’i dërgojë përfaqësuesit e saj në Kosovë për ta hetuar deri në fund këtë çështje në mënyrë që të ketë drejtësi për gratë e dhunuara gjatë luftës së fundit në Kosovë, për të cilat ka fakte. Edhe pse është një proces i gjatë, megjithatë është në rrugë të mirë për të pasur sukses”, ka theksuar Xani.

Më 19 korrik të vitit 1998, si pasojë e një sulmi të forcave serbe, në Rahovec pati shumë të vrarë e të plagosur. Në Tehqen e Sheh Myhedinit në Rahovec janë masakruar shumë gra, fëmijë dhe pleq që kishin kërkuar strehim në këtë institucion fetar.

Te vendi i quajtur “Tuba” u gjetën të masakruar dy profesorë si dhe gjashtë trupa të karbonizuar, identiteti i të cilëve nuk u mësua, ndërsa gjithsej u regjistruan 150 persona të vrarë.

Dëshmitarët që kishin arritur t’i shpëtojnë këtij krimi tregojnë se ushtria, policia dhe paramilitarët serb kanë ekzekutuar civilë shqiptarë arbitrarisht.

Gjatë kësaj ofensive u morën peng u zhdukën e u kidnapuan shumë shqiptarë, për fatin e të cilëve nuk dihet asgjë. Organet e pushtetit serb në Prizren, më 22 korrik, në varrezat e këtij qyteti hapën dy gropa të mëdha dhe varrosën shumë shqiptarë të vrarë gjatë ofensivës në Rahovec.

Nënkryetari i PDK-së, Memli Krasniqi, ka shprehur optimizëm se Gjykata Kushtetuese do të vendosë në favor të lëndës së kësaj partie për vlerësimin e shkeljes së Kushtetutës në seancën konstituive të Kuvendit, në të cilën Isa Mustafa është zgjedhur kryeparlamentar.

Në një intervistë për “Epokën e re”, Krasniqi ka thënë se kanë ofruar argumente të mjaftueshme të cilat do ta bindin Kushtetuesen se gjatë kësaj seance janë shkelur Kushtetuta dhe Rregullorja e Kuvendit.

“Padyshim se në materialin që dorëzuam kemi përshkruar të gjitha faktet, të mbështetura në argumentet tona, përfshirë edhe dokumentet përcjellëse. Normalisht se është në kompetencë të Gjykatës Kushtetuese të dërgojë edhe më tutje dokumentacione apo materiale shtesë nga institucionet e tjera”, ka thënë Krasniqi.

Në këtë kontekst, Krasniqi e ka akuzuar koalicionin LDK-AAK-Nisma, i cili sipas tij ka tentuar ta uzurpojë Kuvendin e Kosovës.

Ai ka shprehur optimizëm se Gjykata Kushtetuese do të vendosë në favor të kësaj parashtrese.

“Unë besoj se, mbi të gjitha, është e qartë se të enjten me të vërtetë kishte tentim për ta uzurpuar institucionin e Kuvendit. Dhe jam i sigurt se një gjë e tillë do të pengohet edhe nëpërmjet aktgjykimit që ne besojmë se do të merret nga Gjykata Kushtetuese. Do të jetë në linjë me vlerësimin që i kemi dhënë ne si grup i deputetëve”, është shprehur Krasniqi, duke shtuar se në seancën konstituive është vendosur se kush është grupi më i madh parlamentar.

“Në seancën konstituive, në pjesën e parë të zhvillimit të punimeve me 117 vota për, pa asnjë kundërshtim dhe asnjë abstenim, është miratuar raporti i Komisionit të përkohshëm për verifikimin e mandateve dhe imuniteteve të deputetëve, sipas të cilit, grupi i parë parlamentar është grupi i cili udhëhiqet nga PDK-ja, pastaj vijnë grupet e tjera ashtu siç KQZ-ja i ka certifikuar rezultatet e zgjedhjeve”, ka deklaruar Krasniqi.

Ai ka thënë se mosurimi i shteteve mike lidhur me zgjedhjen e Isa Mustafës si kryeparlamentar është dëshmia më e mirë se ka pasur shkelje të çdo norme juridike.

“Mendoj se kjo është një dëshmi shtesë se ka një kontestim të përgjithshëm dhe universal për procesin e pashembullt me të cilin është tentuar ta imponojë zgjedhjen e Isa Mustafës si kryetar i Kuvendit”, është shprehur Krasniqi.

Ai ka thënë se presin përgjigjen nga Gjykata Kushtetuese, në mënyrë që PDK-ja t’i drejtoj dy institucionet si parti fituese e zgjedhjeve të 8 qershorit.

“PDK-ja do ta propozojë kandidatin e vet, i cili do të zgjidhet kryetar i Kuvendit dhe atëherë do ta formojë edhe Qeverinë e re”, është shprehur Krasniqi.

I pyetur nëse vendi mund të shkoj në zgjedhje të reja, për shkak të këtij ngërçi politik, Krasniqi ka thënë se zgjedhjet e parakohshme tani për tani nuk janë zgjidhje e mirë.

“Unë nuk mund ta paragjykoj një situatë të tillë, edhe pse diçka e tillë parashihet me Kushtetutë dhe me ligje. Besoj se zgjedhjet e parakohshme nuk janë një zgjidhje e mirë tash për tash. Ka edhe shumë hapa të cilët do ta mundësojnë të zgjidhjet ky ngërç politik në të cilën tani gjendemi të gjithë”, ka thënë Krasniqi.

Kandidatja për kryeprokurore të Shtetit, Laura Pula, nuk ka marrë të premten vota të mjaftueshme as për ushtruese të detyrës së kryeprokurorit të Shtetit.

Katër nga shtatë anëtarët e Këshillit Prokurorial kanë votuar kundër propozimit dhe insistimit të kryeprokurorit në largim, Ismet Kabashi.

Nga 5 gushti 2014 shteti do të mbetet pa kryeprokuror, për shkak të pensionimit të Ismet Kabashit, dhe anulimit nga Gjykata Kushtetuese të zgjedhjes së pasuesit të tij, Aleksandër Lumezi. Procesi është kthyer në pikën zero. Për të mos e lënë shtetin pa kryeprokuror, Këshilli Prokurorial ka provuar ta emërojë një ushtrues detyre, ani se ligjet dhe Kushtetuta nuk parashohin emërimin e ushtruesit të detyrës së kryeprokurorit./koha ditore/