Një grup prej 10 studentësh të Fakultetit të Edukimit të Universitetit të Prishtinës, do të nisen nesër për në Shtetet e Bashkuara të Amerikës, ku në Universitetin e Teksasit do të bëjnë praktikë për pedagogji.

Kjo praktikë do t’u shërbejë studentëve që të përfitojnë eksperienca të ndryshme, duke sjellë në Kosovë praktika të shteteve tjera për sistemin tonë arsimor. Ky projekt është realizuar në bashkëpunim me Ambasadën Amerikanë në Prishtinë.

Qëllimi i udhëtimit të studentëve nga Kosova për në Universitetin e Teksasit në SHBA, është që ata të marrin përvoja të mira, të shkëmbejnë njohuri, duke parë se si shkon procesi i edukimit në një shtete tjetër.

Dekani i Fakultetit të Edukimit në Universitetin e Prishtinës, Et’hem Çeku, tha për Radio Kosovën, se studentët të cilët do të udhëtojnë për në SHBA, janë përzgjedhur në bazë të notës mesatare dhe njohjes së gjuhës angleze. Ai theksoi se kjo do t’i shërbejë Fakultetit për të pasur më shumë përvoja të reja në bashkëpunim me universitetet e shteteve të ndryshme.

“Të gjitha përpjekjet e stafit akademik janë që ne të bëjmë ç’është e mundur që të kemi një arsimtar, i cili i nevojitet vendit, shtetit, kombit tonë, që të hyjë në një proces të edukimit çfarë i nevojitet edhe sistemit të arsimit tonë në Kosovë.”

Për studentët kjo është një përvojë që do t’u shërbejë në të ardhmen për karrierën e tyre. Durim Bytyqi dhe Edita Krasniqi, thanë se eksperiencën e tyre atje do ta sjellin në Fakultetin e Edukimit që mund t’u shërbejnë edhe studentëve të tjerë.

“Kjo përvojë për mua do të jetë një eksperiencë e madhe për të ardhmen time, punën time si mësues në të ardhmen. Është një përvojë e mrekullueshme për ne, sepse ne si mësimdhënës të ardhshëm kemi nevojë që të fitojmë sa më shumë përvoja, në mënyrë që nesër të dimë të ballafaqohemi me situata të ndryshme”, thotë njëri nga studentët.

Praktika e studentëve të Programit Fillor në Fakultetin e Edukimit, do të zgjasë rreth katër javë, ku tri javë do të organizohet në Universitetin e Teksasit, ndërsa java e fundit do të organizohet duke bërë vizita nëpër shkolla të vendeve rurale. Ky projekt ka kushtuar rreth 40 mijë dollarë, i cili është mbështetur nga Ambasada Amerikane në Prishtinë.

Për rreth 10 mijë vende të lira sa janë shpallur në konkursin për regjistrimin e studentëve të rregullt në Universitetin e Prishtinës, deri të mërkurën kanë aplikuar rreth 18 mijë të rinj të cilët synojnë regjistrimin në një nga drejtimet e UP-së.

Drejtori i IT-së, Isak Shabani, ka thënë për KosovaPress se numri i aplikimeve e ka kaluar 18 mijëshen, derisa ka shtuar se aplikimi po vazhdon.

Sipas Shabanit, më së shumti aplikime deri tani ka në Fakultetin Ekonomik në të cilin kanë aplikuar rreth 3 mijë vetë, derisa më së paku i kërkuar këtë vit është Fakulteti i Shkencave Aplikativë, dega në Ferizaj ku kanë aplikuar rreth 200 vetë.

Afati i aplikimit në UP është deri të premten në ora 16:00, derisa provimi pranues pritet të mbahet të hënën më 21 korrik, si dhe të martën më 22 të këtij muaji, për disa fakultete ku ka më shumë aplikues.

Këtë verë reperi i suksesshëm “Big Basta” po e shfrytëzon për të reflektuar mbi pasionin e tij, që tashmë e ka kthyer në profesion. Teksa bisedon me të, kupton se ai jo vetëm e do muzikën, por kujdeset për të dhe për këtë arsye e analizon me detaje. Basta nuk nguron t’u japë këshilla kolegëve e të kërkojë ndihmë nga qeveria që muzika shqiptare të përsoset gjithnjë e më shumë. Sakaq ai rrëfen me një pasion edhe më të madh, për një tjetër dashuri. E ka emrin Vesa Luma, dhe nga fjalët e rrepistit në këtë intervistë për “Summer Pages” kuptojmë se ai ka gjetur shpirtin binjak.

Big Basta ku të kanë gjetur ditët e freskëta të korrikut? Si po shkon kjo verë?
Ditët e freskëta të korrikut më kanë gjetur në radhë të parë duke u gëzuar, sepse Gjermania fitoi botërorin. Ndërsa pjesa tjetër ka qenë veç punë, dhe jo vetëm me këngët, por me projektet e reja që po realizoj, mbi të gjitha ‘MCN Radio’ e para dhe e vetmja radio që transmeton 24 orë ‘hip hop’ në Ballkan.

Përveç angazhimit në radio, me se po merresh tjetër?

Përveç radios po punoj në advancë për këngët e mia të reja, të cilat dua t’i publikoj bashkë me videoklipe në muajt e ardhshëm. Por për momentin kam vendosur të qetësohem dhe të shoh më qartë evoluimin e tregut shqiptar.

Si e konsideron sezonin që lamë pas? Ka qenë më shumë i lodhshëm apo i suksesshëm?

Ka qenë një sezon i lodhshëm dhe plot investime. Albumi i Vesës ishte një sipërmarrje e madhe për mua dhe studion time ‘042 Zone’ që ka veç një vit që është hapur zyrtarisht. Gjithashtu ishte viti i reflektimit. “Lufta” në ‘Youtube’ dhe heqja e videove të mia nga ish-bashkëpunëtorët e mi, më bëri t’i futem studimeve të njohurive në këtë fushë, dhe ajo çfarë kuptova dhe arrita të zbuloj ishte shokuese për mua, dhe jo vetëm për mua deri në momentin që e vërteta do të dalë në shesh.

Çfarë ke zbuluar? Për çfarë bëhet fjalë?

Për momentin kam zgjedhur të mos e them. Pak më vonë. Do vijë koha e duhur që do të merret vesh. Tani mund të them vetëm se ajo çka kam zbuluar, është frymëzimi im për t’u futur prapë në lojë edhe më fuqishëm.