Kryeprokurori i Task Forcës që po i heton pretendimet e raportit të Dick Martyt, në fund të këtij muaji do të publikojë një raport ku do të tregojë për rezultatet e hetimeve të tij. Si rezultat i hetimeve pritet që të ketë edhe disa aktakuza. Por, më shumë se sa efekte juridike, raporti i Williamsonit pritet që të krijojë efekte politike në Kosovë.

Kosova duhet që në shtator të ndryshojë kushtetutën për të mundësuar funksionalizimin e Gjykatës Speciale.

Kësisoj pritet që shtetet mbështetëse të Kosovës në vijë me kërkesën e kancelares gjermane Merkel, që qeveria të bëhet sa më shpejt, të kërkojnë nga qeveria e ardhshme të jetë edhe gjithëpërfshirëse.

Një qeveri PDK+LDK+AAK me një kryeministër teknik, po shihet si stabiliteti. Në një situatë të tillë të tria partitë pa Sërpska-n do të kishin mbi 80 votat që kërkohen për kalimin e çfarëdo vendimi, përfshirë ndryshimit të kushtetutës./Tribuna/.

Fillimi i punës së noterëve në Prizren ka ndikuar në lehtësimin e punës së Gjykatës Themelore (GJTH), duke shkarkuar një numër të lëndëve, të cilët për vite, me apo pa dashje janë grumbulluar në sirtarët e gjykatës.

Mentor Krasniqi nga Prizreni, tha se për një kohë të shkurtër ka bërë bartjen e trashëgimisë së një prone, përkundrazi referuar asaj çfarë kishte dëgjuar më parë nga babai i tij kishte llogaritur të humbte më tepër kohë.

“Pasi ia dorëzova dokumentet, noteri e ka kryer pa ndonjë vonesë”, tha ai.

Fillimi i funksionalizimit të noterisë, në vitin 2012 është vlerësuar si ndihmesë e madhe për sistemin gjyqësor. Çështjet që kanë kaluar prej Gjykatës tek noterët janë ato që kanë të bëjnë me trashëgiminë, kontratat dhe me legalizimin. Në Prizren tashmë janë të licencuar shtatë noterë.

Zëdhënësja e GJTH-së, Afërdita Kicaj, tha për “Zërin” se funksionalizimi i noterisë ka reflektuar pozitivisht në punën e Gjykatës, që tashmë është liruar nga ngufatja që ka pasur nga lëndët e kësaj natyre, që tashmë janë punë e noterëve.

Mbështetur në shënime, del se në fund të vitit 2012, në GJTH përafërsisht kanë qenë rreth 14 mijë lëndë, që kanë të bëjnë me legalizimin, ndërsa 381 prej tyre i kanë takuar çështjeve të trashëgimisë.

“Në vitin 2014 në GJTH janë pranuar vetëm dy lëndë të cilat janë kthyer nga Gjykata e Apelit sipas ankesës së palëve, edhe këto dy lëndë janë të kryera. Kjo tregon se ka një shkarkim nga lëndët që kanë të bëjë me legalizimin e dokumenteve, kontratave e të ngjashme, të cilat kanë kaluar tek noterët”, tha ajo.

Orhan Gashi, njëri nga noterët prizrenas, tha për “Zërin” se qytetarët kanë nisur të mësohen me shërbimin e ri, të cilin ai e vlerëson si një lehtësim të madh për ta, meqenëse për një marrëveshje, kontratë apo autorizim është dashur të presin në radhë nëpër gjykata.

Javën e ardhshme do të publikohet raporti final i kryeprokurorit të Task Forcës Speciale Hetuese, Clint Williamson, i cili do t’i pasqyrojë të gjeturat e hetimit rreth trevjeçar mbi dyshimet e raportit të seantorit Dick Marty, se ka pasur trafikim të organeve njerëzore në Kosovë.

Gjatë takimeve me përfaqësuesit shtetëror të Kosovës, prokurori amerikan Williamson ka diskutuar për funksionimin e Taks Forcës dhe bashkëpunimin e ndërsjellët me organet e Drejtësisë, shkruan Epoka e Re.

Gjatë kësaj jave pritet që Këshilli i Evropës të publikojë raportin e radhës, sa i përket liberalizimit të vizave për Kosovën.
Përkundër faktit që gjatë takimit të fundit ndërmjet qeverisë së Kosovës dhe zyrës së Bashkimit Evropian në Kosovë, procesi u përshkrua si mjaft optimist, njohësit e integrimeve evropiane shprehen se nuk pritet që ky proces të përfundojë shpejt, shkruan gazeta Lajm. Sipas tyre, nuk duhet që të ndikohemi nga fakti që zyra e Bashkimit Evropian në Kosovë, apo që edhe institucionet tona e vlerësojnë si pozitiv rrjedhën e procesit dhe nuk pritet që do të ketë ndonjë raport pozitiv këtë javë nga Këshilli i Evropës.

Njohësi i integrimeve evropiane, Emrush Ujkani ka thënë për gazetën “Lajm” se liberalizimi i vizave për Kosovën nuk pritet që do të ndodhë shpejt, pasi që sipas tij, institucionet kanë ende punë për të bërë.

Ai po ashtu ka thënë se nuk duhet që të ndikohemi nga fakti që zyra e Bashkimit Evropian në Kosovë, apo që edhe institucionet tona e vlerësojnë si pozitiv rrjedhën e procesit dhe nuk duhet të pritet që do të ketë ndonjë raport pozitiv këtë javë nga Këshilli i Evropës.

Sipas Ujkanit, janë dy gjëra të cilat duhet të nënvizohen në këtë fazë, të cilat në një farë mënyre do të ndikojnë në këtë proces. “Vetë gjendja politike në Kosovë do të ndikojë në këtë proces, në një farë mënyre dhe tjetra është që, vetë BE-ja është në procesin e rikrijimit të institucioneve të veta të reja dhe që realisht do të ndikojë në këtë proces”, është shprehur ai.

Ndërsa, sa i përket raportit të radhës që Këshilli i Evropës pritet të publikojë gjatë kësaj jave, ai ka thënë se ende do të ketë rekomandime deri tek vendimmarrja e Këshillit të Evropës, lidhur me këtë proces, gjë e cila nuk do të jetë e shpejtë.

Gjithashtu, Ujkani ka ripërsëritur edhe njëherë, që nuk duhet të ndikohemi nga fakti që në takimin e fundit ndërmjet qeverisë së Kosovës dhe zyrës së BE-së në Kosovë, procesi i liberalizimit të vizave është përshkruar me tone optimiste, për arsye se në asnjë moment Bashkimi Evropian nuk ka thënë se gjoja në Kosovë nuk po bëhet progres. Sipas tij, ka pasur vërejtje konkrete gjatë ecjes së këtyre proceseve dhe realisht nuk pritet që do të ketë ndonjë befasi për të mirë edhe në këtë raport. “BE-ja natyrisht që do të vlerësojë për arsye se në disa sektorë ka pasur një progres të evidentuar, neve nuk kemi nevojë që të presim raportin e BE-së, kur jemi vetë në gjendje që të shohim se ka pasur një përkushtim më të madh të institucioneve tona në këtë drejtim”, ka theksuar Ujkani.

Mirëpo përkundër kësaj, sipas tij, Bashkimi Evropian do të evidentojë edhe disa gjëra të reja, që tash do të mbetet dhe do të shikohet. ” Por ka ende punë për të bërë nga ana e institucioneve tona që BE-ja të vendosë për të na dhënë liberalizimin e vizave për Kosovën”, ka deklaruar njohësi i integrimeve evropiane, Emrush Ujkani.

Nga ana tjetër, Dren Doli, nga Grupi për Studime politike dhe juridike, është shprehur se raporti i liberalizimit të vizave do të përfshijë raportin e vlerësimit të BE-së dhe komisioneve të tyre të eksperteve në mënyrën se si Kosova i ka menaxhuar kriteret individuale. Sipas tij, në bazë të udhërrëfyesit të liberalizimit të vizave për Kosovën, një numër prej 90 kërkesash individuale përfshijnë një numër standardesh të cilat Kosova është dashur t’i plotësojë. “Ky raport do të reflektojë gjendjen se si institucionet e deritanishme kanë menaxhuar me kërkesat individuale.

Natyrisht një çështje e rëndësishme në ketë vlerësim do të hyjë edhe çështja e menaxhimit dhe mbajtjes së zgjedhjeve, siç kemi thënë edhe më herët zgjedhjet kanë një rëndësi të veçantë në procesin e liberalizmit të vizave, por edhe themelimi i qeverisë”, ka thënë ai.

Kurse, sa i përket gjendjes aktuale politike në Kosovë, Doli ka deklaruar që kriza politike nuk besoj që do të jetë një segment i cili do të reflektojë aq shumë në procesin e liberalizimit të vizave. “Natyrisht, është e rëndësishme që Kosova t’i adresojë të gjitha problemet dhe nëse problemet që kanë të bëjnë me procesin e liberalizimit të vizave nuk adresohen për shkak të mungesës së Qeverisë, atëherë kjo mund të jetë një çështje që BE-ja do të shprehë shqetësimin e saj, duke argumentuar që mungesa e qeverisë ka bërë që një numër i madh kriteresh të mos adresohen nga qeveria e kaluar dhe po vonohen që të adresohen nga qeveria e tashme”, ka deklaruar Doli, duke shtuar më tej se si rrjedhojë Bashkimi Evropian, nuk mund të shohë të gatshme Kosovën për të hapur dyert për qytetarët e saj që të lëvizin lirshëm në zonën schengen.

Ndërkohë, gjatë takimit të fundit në mes zëvendësministrit Gëzim Kasapolli dhe shefit të zyrës së BE-së, Samuel Zhbogar, procesi përshkruhet me nota mjaft optimiste.

Sipas Besnik Vasollit, koordinator teknik për liberalizimin e vizave në këtë ministri, procesi është duke vazhduar dhe Kosova po shkon drejt realizimit të tij. Gjatë kësaj jave, përkatësisht, më 23 ose 24 korrik, pritet që Këshilli i Evropës do të dalë me raportin e radhës sa i përket liberalizimit të vizave”, ka thënë Vasolli.

Procesi në Gjykatën Kushtetuese në lidhje me procedurat që janë ndjekur për zgjedhjen e Isa Mustafës në postin e kryetarit të Kuvendit nuk pritet të rrezikojnë mandatin apo të qojnë këtë legjislaturë në shpërbërje.

Ekspertët e çështjeve juridike e politike rikujtojnë se bëhet fjalë për kontestimin e zgjedhjes së organeve të Kuvendit, kryetarit dhe kryesisë, por jo edhe të konstituimit të organit më të lartë ligjvënës në vend.

Fisnik Korenica nga Grupi për Studime Juridike dhe Politike, ka vlerësuar se Kuvendi mund të konsiderohet i konstituuar që nga momenti kur deputetët dhanë betimin. Kurse kontesti në kushtetuese vazhdon për organet drejtuese, kryetarin dhe kryesinë./Tribuna/.

Anëtari i Kryesisë së Nismës për Kosovën, Bilall Sherifi, ka thënë se do t’i qëndrojnë besnik koalicionit me LDK-në dhe AAK-në.

Ai ka shprehur optimizmin se koalicioni LDK-AAK-Nisma do ta formojë qeverinë e re. Sherifi ka deklaruar se pas zgjedhjes së kryeparlamentarit, ky koalicion i ka numrat edhe për formimin e qeverisë.

Në këtë drejtim ai ka thënë se nuk është e nevojshme që të shkohet në zgjedhje të reja.

“Zakonisht në zgjedhje shkohet kur askush nuk arrin t’i bëjë numrat për formimin e qeverisë. Në këtë drejtim ne në seancën konstituive kemi dëshmuar se i kemi së paku 65 vota”, ka thënë Sherifi për Epokën e Re, duke shtuar se janë shumë të interesuar që pjesë e Qeverisë të jetë edhe Lëvizja Vetëvendosje.

Deputetja e LDK-së, Vjosa Osmani, ka thënë se PDK-në nuk e do më askush në institucione.

“Askush nuk e do më PDK-në në institucione. Tashmë është qartësuar se PDK nuk i ka votat kurse ne të tjerët i kemi”, ka thënë Osmani në “Interaktiv” të KTV-së.

Sa i përket kërkesës së PDK-së në Kushtetuese, ajo ka thënë se Kushtetuesja nuk interpreton vendimet e Kryesisë së Kuvendit, pasiqë ka pasur raste të tilla edhe në të kaluarën.

“Gjykata Kushtetuese tashmë ka shembujt nga vetë ajo ku nuk i interpreton vendimet e Kryesisë së Kuvendit”, ka thënë Osmani.

“Deri tani zakonisht Gjykata Kushtetuese gjithmonë i respekton vendimet e saj paraparake. Se çka nënkupton me grup parlamentar, gjithmonë definohet në rregullore të Kuvendit, deputetët e vendosin dhe është një kompetencë autonome e Kuvendit të Kosovës”, ka thënë Osmani.

“Asgjë që përfshinë 2/3 e deputetëve të Kuvendit, nuk mund të konsiderohet ilegale. Nuk mundet kryesuesja e një seance, në një mënyrë arbitrare të imponojë vullnetin e një partie politike tek 2/3 e deputetëve. Këto janë rrethana faktike. Ne nuk e kemi bojkotuar seancën, kryesuesja ka qenë e njoftuar që ne po dalim në një pauzë për konsultime”, ka thënë ajo.