Behar Semimi, ish shef i Policisë së Kosovës, e ka pasur “nën komandë” Nenad Gjuriqin. Për bindjen e tij, Gjuriq që tani është emërtuar drejtor policor i katër komunave të veriut, do të duhej të ndiqej penalisht. Selimi i cili tani është deputet në Kuvendin e Kosovës nga radhët e PDK-së, ka thënë se gjatë gjithë kohës sa Gjuriqi ka qenë në Policinë e Kosovës u ka shërbyer vazhdimisht strukturave paralele serbe.

Mirëpo, rrethanat politike sipas tij kanë imponuar që ai jo vetëm të mos ndiqet, por të kthehet në Policinë e Kosovës. “Ai në kohën time, u ka shërbyer me besnikëri strukturave ilegale në veri, prandaj edhe është emëruar. Emërimi i tij është politik, prandaj duhet vlerësuar në këtë kontekst.

Ndryshe në rrethanat normale, besojë që nuk do të emërohej nga MPB-ja”ka thënë Selimi për Kohën ditore. Selimi ka thënë se në rrethanat tjera, të shtetit që s’ka nevojë nevojë të negociojë asgjë të brendshme, me sovranitet të plotë, ai jo vetëm që nuk do të kthehej, por edhe do të ndiqej penalisht. Megjithëkëtë, rrethanat e Kosovës, sipas tij janë krejt ndryshe dhe vendimet si ky kapërcejnë standardet që kërkohen nga procedurat. Por edhe kërkesat ligjore, në emër të qëllimeve strategjike shtetërore

Kryetarja e Komisionit Qendror të Zgjedhjeve (KQZ), Valdete Daka, është e vetëdijshme se nuk do ta kenë të lehtë organizimin dhe mbajtjen e zgjedhjeve në veri, por është shprehur e bindur se zgjedhjet lokale të 3 nëntorit do të rezultojnë me sukses.

Ajo ka thënë se qytetarët serbë në veri nuk kanë arsye të mos dalin në zgjedhje, pas është krijuar një klimë e mirë për arritjen e marrëveshjes në Bruksel mes Kosovës dhe Serbisë për normalizimin e raporteve fqinjësore.

Daka ka thënë për Epoka e Re se brenda tre-katër ditëve do të arrihet marrëveshja me OSBE-në për ta ndihmuar procesin e zgjedhjeve enë veri.

Përfaqësuesja e Lartë për politikë të jashtme e BE-së, Catherine Ashton do të udhëtojë të martën në Beograd, ku do të takohet me krerët e Serbisë, me të cilët do të bisedojë për përparimin e zbatimit të Marrëveshjes së Brukselit.

Një ditë më vonë Ashton do të vijë për vizitë edhe në Prishtinë.“E mirëpres vazhdimin e bisedimeve me liderët serbë dhe kosovarë, në mënyrë që të çojmë para dialogun dhe zbatimin e marrëveshjeve të arritura deri tash”, ka thënë Ashton,trasmeton Telegrafi

Në kabinetin e saj, të hënën, më 8 korrik do të mbahet raundi i 13-të i dialogut mes kryeministrave Hashim Thaçi dhe Ivica Daçiq.

Zëvendës-ndihmës sekretari amerikan i Shtetit, Philip T. Reeker, duke komentuar veprimet e fundit të Lëvizjes Vetëvendosje, në Kuvendin e Kosovës, ka thënë se palaçot duhet të din se ato veprime nuk janë të mira për vendin.
Sekretari organizativ i Lëvizjes Vetëvendosje, Dardan Molliqaj, duke komentuar këtë deklaratë, ka thënë se ky epitet u takon subjekteve tjera.

“Jo të gjithë anëtarëve të atyre subjekteve, por atyre që ndërrojnë qëndrimin brenda dite”, ka thënë Molliqaj për Klan Kosova.

Sipas tij, javën tjetër VV do t’i dërgojë një letër Sekretarit John Kerry.

“Është kjo një gjuhë jodemokratike. Nuk ndërtohet autoriteti amerikan mbi ofendimin e një subjekti politik”, ka thënë Molliqaj.

Profesor Naser Bresa, është zgjedhur kryetar i Degës së AKR-së në Prizren. Pas marrjes së pozitës së kryetarit, Bresa premtoi se do të angazhohet që AKR-ja të jetë forcë kryesore politike në Prizren. “ I falenderoj të gjithë ata që ma dhanë besimin që unë ta drejtoj AKR-në në Prizren”, tha Bresa.

Ai tha se AKR-ja në Prizren, do të angazhohet që të gjithë qytetarët të ndihen shumë më të dinjitetshëm, ashtu siç edhe meritojnë.

Kryetari Bresa tha se nga data 5 maj 2013, AKR-ja në Prizren ka organizuar mbi 200 takime individuale dhe grupore në tërë territorin e Prizrenit. “ Në të gjitha lokacionet, jemi pritur jashtëzakonisht mirë”, tha Bresa. Ai tregoi se gjatë kësaj kohe, poashtu AKR-ja ka arritur të formojë 22 nëndegë të tjera në qytet dhe fshatra./PrizrenPress.com/

Kryetari i Bashkimit Demokratik (BD), Zafir Berisha ka akuzuar pushtetin lokal të Prizrenit, se me anë të hapjes së tenderëve, po tenton të manipulojë me qytetarët. Ai tha se PDK-ja me taksat e qytetarëve është duke u munduar t’i ruajë votat tashmë të humbura.

“Hapja tenderëve këto ditë nga partia në pushtet është vazhdimësi e lojës me buxhet për mashtrim të qytetarëve për shkak se jemi në prag të zgjedhjeve”, tha Berisha.

Sipas tij, kjo lojë e partisë është e rrezikshme për keqpërdorimin e taksave të qytetarëve të Prizrenit. “Këtu ka disa të meta, sepse së pari hapen tenderët e veçanërisht në infrastrukturë pa zotime të mjaftueshme financiare, që është në kundërshtim me ligjin e Prokurorimit”, tha Berisha.

Ekzekutivi i Prizrenit, ka marrë vendim që të lejojë shpalljen e tenderëve për ndërtimin e kanalizimit në rrugën “Raguza”,“Hajdar Shala” dhe “Skender Latifi” në Prizren, ndërtimin e rrugës në fshatin Nashec-Lagjja Gutaj, ndërtimin e rrugës lokale në fshatin Jabllanicë, ndërtimin e rrugës “Salajdin Berisha 3,4”, rruga “Beamir Memaj”, ”Emin Abazi-1”,”Elbasani-1”, ndërtimin e rrugës në lagjen Badallaj të Prizrenit, ndërtimin e rrugës në lagjen Badallaj të Prizrenit si dhe rrugët lokale në fshatrat “Gjonaj dhe Kushnin-Has”.

Kryetari i BD-së, Zafir Berisha tha se tenderët po hapen pa planifikim, dhe investimet do të behën “shkel e shko”.

“E keqja më e madhe është se tenderët që po hapen po dëmtojnë firmat të cilat po marrin punët, sepse mjetet nuk janë të zotuara sic është rasti me rrugën e fshatit Paslisht, ku projekti kushton 340 mijë ero, ndërsa firmës nuk i janë lëshuar 30 mijë ero”, tha Berisha .

Sipas tij, ky pushtet i ka dëmtuar në masë të madhe firmat e ndërtimit, pikërisht për shkak hapjes së tenderëve pa zotimin e mjeteve. “ Përveç firmave po dëmtohen edhe punëtorët të cilët punojnë, sepse në mungesë të mjeteve nuk marrinë paga nga frirmat që tashmë ky pushtet i ka futur në kolaps”, tha Berisha.

Sipas tij, punimet e fundit janë duke u realizuar në ato zona ku pushteti lokal mundohet ti ruajë votat. “Ka vendbanime që edhe oborret janë në gjendje me ua shtruar me qëllimin manipulimi “, tha Berisha.

Qytetarët e Prizrenit, sipas tij, tashmë e kanë kuptuar politikën e partisë në pushtet. “Me 3 nëntor qytetarët do t’i japin fund këtyre manipulimeve dhe krimit të organizuar që është instaluar në pushtet”, tha Berisha./PrizrenPress.com/

Lideri i LDK-së, Isa Mustafa , do të qëndrojë të shtunën në Prizren. Zëdhënësi i LDK-së, Nderim Gashi njofton se Mustafa do të marrë pjesë në taimin e anëtarëisisë së Korishës.
“Lidhja Demokratike e Kosovës në Prizren,të shtunën me 6 korrik në orën 19 e 30 organizon takim me anëtarësinë e Rajonit të Korishës. Takimi mbahet në shkollën e fshatit Korishë. Në këtë takim do të marrë pjesë edhe lideri i LDK-së Isa Mustafa, dhe zyrtarë të tjerë të lartë partiak nga Qendra dhe nga Dega e LDK-së në Prizren”, njoftoi Gashi./PrizrenPress.com/