Kandidati i Lëvizjes Vetëvendosje! për kryetar të Prizrenit Arbër Rexhaj, është kandidati më i ri, që në zgjedhjet e nëntorit garon për kryetar të një komune në Kosovë. Ai thotë se ndihet i priveligjuar që në nivel të Republikës së Kosovës në këto zgjedhje është i pari në valën e ndryshimeve të perceptimit shoqëror mbi brezat e rinj. “Fillimisht jam trembur pak, sepse të dallohesh për diçka, në nivel republike, nuk është dic e vogël, por, tani pasi e kam menduar më mirë këtë punë, ndihem i privilegjuar. Sidomos për faktin se mund të jem i pari në valën e ndryshimeve të perceptimit tonë shoqëror mbi brezat e rinj. Besoj se ndryshimi nuk vjen vetëm si plejadë e re, në kontekstin e brezit të moshës, por më shumë si një frymë e re”, thotë Rexhaj për “PrizrenPress”.

Sipas tij, energjinë rinore nuk duhet parë vetëm si puls ekspresiv, por edhe si mundësi për ndryshime më të mëdha. “Mendoj që edhe tek subjektet tjera ka vlera të respektueshme në mesin e të rinjve, por ende nuk kam parë ndonjë kandidat të dal nga to. E kam përshtypjen se të rinjtë janë të spostuar që të presin në radhë. Megjithatë Vetëvendosja nuk e bën këtë ndarje, prandaj jam edhe kandidat për kryetar komune”, shprehet Rexhaj.

Ai thotë se Lëvizja Vetëvendosje! në Prizren, me kandidaturën e tij, tashmë e ka thyer këtë klishe shoqëror. “Mendoj që këtë klishe shoqërore më e kemi thyer, falë guximit tonë dhe falë përkrahjes së aktivistëve të qendrës sonë. Të rinjtë tek ne nuk janë të ngulfatur me hendikepet e moshës, por ata kanë alternativë, vullnet dhe guxim. T’ju them të drejtën kur jam kandiduar jam ndier tepër me përgjegjësi dhe menjëherë gjëja e parë që kam bërë ka qenë biseda me gjyshin tim. Ai fillimisht më ka ngacmuar për moshën e re, por më pas më ka inkurajuar duke më thënë se e ardhmja u përket të rinjve, por kjo e ardhme fillon tash”.

Rexhaj tregon se moshën e re të tij nuk e sheh si hendikep në këto zgjedhje, por si përparësi. “Si i ri që jam e kam fuqinë e perceptimit të ndiej nevojat e brezave më të moshuar, por po ashtu e ndiej edhe energjinë e atyre që janë më të rinj se unë. Kam parasysh dhe respektoj përvojën e moshës, por ka ardhur koha që edhe të rinjtë të jenë pjesë aktive e vendimmarrje. Derisa varrezat e dëshmorëve janë të mbuluar me trupat e të rinjve tanë, mosha mesatare e ushtarëve tanë në luftën e fundit nuk kapërcen moshën 19, pse atëherë duhet të ekzistojnë barriera dhe paragjykime sa i përket aftësive të të rinjve për udhëheqje dhe qeverisje”, thotë ai.

Në zgjedhjet lokale të nëntorit për kryetar të Komunës së Prizrenit garojnë gjashtë kandidatë. Të gjithë kandidatët e tjerë janë shumë më të moshuar se sa kandidati i VV-së Arbërë Rexhaj. Madje, disa prej tyre mund të jenë edhe gjyshër i Rexhajt.“Unë jam shqiptar dhe e respektoj traditën tonë. Për gjyshërit tanë përherë kemi pasur respekt dhe jemi ndier krenar për ta. Mirëpo për këta gjyshër, dy doktor që kanë keq-qeverisur me Prizrenin pos respektit që ka të bëjë me moshën, nuk mund të them të njëjtën sa i përket dallimeve tona konceptuale dhe alternativave që ne përfaqësojmë. Ndihem i barabartë në garë. Por ndihem më shumë se i barabartë konceptualisht dhe në vizion, sepse alternativa që do ta përfaqësoj i tejkalon ata. Ne do ta japim shembullin e qeverisjes së mirë kur ta fitojmë garën zgjedhore”, shprehet Rexhaj.

Ai thotë se në këto zgjedhje do të garojë si alternativë për qytetin e Prizrenit. Sipas tij, Vetëvendosje! alternativën e vet do të prezantohet në fushatë e tera. “ Ne kemi nisur pjesë të veçanta t’i paraqesim edhe tani. Alternativa jonë bazohet në ekonominë lokale si prioritet bujqësinë, kulturën si ekonomi, arsimin e shëndetësinë, më pastaj edhe të rinjtë përmes pjesëmarrjes në jetën institucionale dhe përmes veprimtarive të ndryshme shoqërore. Megjithatë, duhet ta ceki se alternativa jonë e ka për synim ta dëshmojë se mund të kujdesemi, në mënyrë të barabartë, për të gjitha kategoritë e shoqërisë sonë. Ne si lëvizje, themel të ideologjisë sonë e kemi drejtësinë sociale dhe dhënien e rasteve të njëjta për të gjithë. Mendoj se në këto dy elemente fuqizohet edhe ideja jonë madhore për një shtet të fuqishëm, si fazë të parë, dhe bashkim kombëtar, si përmbyllje e natyrshme e projektit tonë”, thotë Rexhaj. /PrizrenPress.com/

Një grup prej 20 personave, me aftësi të kufizuara, kryesisht gra ma aftësi të kufizuar nga Malisheva, po qëndrojnë në Shqipëri, në një ekskursion disa ditorë. Ky ekskursion është mbështetur nga kryetari i Malishevës, Isni Kilaj dhe është në vazhdën e mbështetjes së vazhdueshme për këtë qendër rehabilituese.

Koordinatorja e Qendrës së Rehabilitimit “Hanidkos” në Malishevë, Feride Hoxha, tha qëllimi i këtij ekskursioni, është vizita e vendeve kulturore dhe historike në Shqipëri”.

“Unë e falënderoj Komunën e Malishevës dhe Kryetari Kilaj, për mbështetjen e vazhdueshme që na ka dhënë si qendër rehabilituese, si dhe për mbështetjen, në këtë organizim”, ka thënë Hoxha.

Kryetari Kilaj, si çdo vit, edhe këtë vit, kishte nënshkruar një marrëveshje mirëkuptimi, për mbështetjen e Qendrës Rehabilituese “Handikos” në Malishevë./PrirenPress.com/

Dita e Dëshmorëve shënohet sot me aktivitete të shumta në Prizren. Fillimisht në ora 10:00 do të bëhen homazhe në Varrezat e Dëshmorëve në Landovicë, për të vazhduar me vizita para shtatorëve të dëshmorëve në qytet. Në ora 12:00, do të bëhet gurthemeli i bustit të dëshmorit “Xhevat Berisha” në Shkollën Fillore “Xhevat Berisha” në Tusuz

Në kuadër të shënimit të Ditës së Dëshmorëve, sot po ashtu do të bëhet edhe përurimi i rrugës “Xhevat Berisha” në Tusuz.

Në shënimin e Ditës së Dëshmorëve në Prizren do të marrë pjesë edhe kryeministri i Kosovës, Hashim Thaçi. Ai do të bëjë gurthemelin e bustit të dëshmorit Xhevat Berisha./PrizrenPress.com/

Në seancën e djeshme të Parlamentit të Kosovës kushtuar kryeministrit të Shqipërisë Edi Rama për një moment u duk që është bërë edhe një hap drejt pajtimit të serishëm të Jakup Krasniqit dhe kryemintrit Thaçi.

Për këtë dorështrëngim që shihet edhe në foto kryeparlamentari Krasniqi i deklaroi portalit Indeksonline se ka qenë një përshëndetje dhe se nuk mban inate.

“Nuk kam inate sa mos me fol sa mos me i’a dhënë dorën qofte kryetarit partisë qoftë edhe anëtarëve të tjerë të PDK-së”, tha Krasniqi.

Sidoqoftë, bindjet e tija politike nuk kanë ndryshuar, ndërsa përshëndetjen e ka karakterizuar si akt njerëzor.

“Shikoni, mendimet e mia politike dhe qëndrimet e mia nuk kanë lëvizur asnjë milimetër. Mos e ngatërroni këtë përshëndetje njerëzore që fundi fundi ne mendimet i kemi ato që janë por nuk ka ndonjë lëvizje në atë drejtim”, tha Krasniqi, kështu duke mohuar të ketë ndonjë ribashkim të mundshëm në prag të zgjedhjeve të 3 Nëntorit.

Ende asnjëra prej iniciativave serbe të veriut nuk është certifikuar për të marrë pjesë në zgjedhjet lokale të 3 nëntorit.

Sonte vonë përfundon afati ligjor i Zyrës për Regjistrim të KQZ_së për të dhënë rekomandimet për 33 subjektet e mbetura, në mesin e të cilave janë edhe iniciativat e veriut, ka thënë për Radion Evropa e Lirë, Drejtoresha e kësaj zyre Miradije Mavriqi.

“Deri më tash janë certifikuar 70 subjekte politike, ndërsa ende në procesim e sipër janë edhe 33 subjekte, në mesin e të cilave janë edhe iniciativat serbe të veriut që ju po pyesni”, ka thënë përmes telefonit, Mavriqi, transmeton Rel.

Ndonëse afati ligjor i kësaj zyre përfundon sonte për të verifikuar nëse janë plotësuar mangësitë e vërejtura herën e parë në dokumentacionin e subjekteve që kërkojnë certifikim, kjo nuk do të thotë se sonte përfundon afati nëse 33 subjektet e mbetura do të certifikohen apo jo.

Sonte vonë, Zyra për Regjistrim të subjekteve politike i dorëzon rekomandimet KQZ-së e cila më pas ka të drejtë të vendos.