16 gushti do të jetë dita përfundimtare për të gjithë ata që deri tash kanë përfituar miliona nga pirateria që të pajisen me autorizime përkatëse nga mbajtësit e të drejtave.

Në tregun kosovar, sipas Ministrisë së Kulturës janë rreth 100 pika të shitjes, të cilat përmbajnë produkte pa leje të autorit, raporton KTV. Mirëpo, sipas zyrtarëve të kësaj ministrie, kjo gjendje pritet të ndryshojë, pasi që 16 gushti do të jetë dita përfundimtare për të gjithë ata që deri tash kanë përfituar miliona, që të pajisen me autorizime përkatëse nga mbajtësit e të drejtave. Në të kundërtën, të gjitha ata që nuk do ta zbatojnë këta afat, do të dënohen konform ligjit për të drejtën e autorit. Prandaj, u bëhet thirrje atyre që sa më parë të largojnë nga tregu të gjitha materialet që nuk janë të pajisura me kontrata apo autorizime përkatëse.

Deri tash, në vendin tonë, për shkak të dyshimeve për cenim të të drejtave të autorit dhe falsifikim të dokumenteve është arrestuar muajin e kaluar nga Policia e Kosovës, Emrush Thaçi, pronar i kompanisë diskografike ‘Emra Com’. Ai ishte arrestuar pas një padie të bërë nga grupi humoristik ‘Stupcat’.

Premiera e filmit dokumentar “Gjermant ma kanë pak tuten” nga Alban Muja, do të jepet në kuadër të festivalit “Dokufest” në Prizren të hënën prej orës 21:00 në Kino Europa Pllato.

Sipas një njoftimi nga Qendra Kinematografike e Kosovës (QKK), thuhet se filmi “Gjermant ma kanë pak tuten” në regji të Alban Mujës dhe producent të Mumin Jasharit është prodhim i “MF Production”, dhe i njëjti është subvencionuar nga Qendra Kinematografike e Kosovës.

“Vdekja e një Mbretëreshe” monodrama e shkruar nga Rexhep Qosja, që ka në qendër personazhin e mbretëreshës ilire, Teuta, do të vijë në sezonin e ri artistik që pritet të nisë në muajin shtator.

Vepra në skenë vjen me regji dhe interpretim nga Arjeta Dhima, e cila deri më tani për publikun është e njohur për disa vepra teatrore që ka sjellë në teatër, por nuk ka munguar dhe si aktore duke sjellë personazhe dhe role nga më të ndryshimit për publikun. Regjisore dhe aktore, Arjeta Dhima për herë të parë do të prezantohet në skenë para publikut me një monodramë. Ajo e quan një zhanër të vështirë, dhe sipas saj, për këtë vepër kërkohet një punë e madhe, pasi “Vdekja e një Mbretëreshe” është shkruar nga një autor i madh shqiptar, veprat e të cilit janë vlerësuar shumë në skenën teatrore.

“E zgjodha këtë herë monodramën, sepse më pëlqen të përballem me vështirësitë, me të bukurën dhe me atë që është atraktive. Monodrama është zhanri më i vështirë i interpretit. Kjo monodrame vjen nën interpretimin tim dhe nën regjinë time. Si regjisore kisha një imazh të qartë, ndërsa e mendoja dhe vizionoja në mendje. Por kur filloja të kritikoja veten në lidhje me interpretimin, më dukej se kisha të bëja me dy Arjeta. Një herë merrja autoritetin e regjisores dhe një herë kisha përulësinë e aktores”, pohon Arjeta Dhima, regjisore dhe aktore në veprën që mban emrin e akademikut të shquar Rexhep Qosja.

Këtë herë monodrama nuk do të jetë në skenat e teatrove, por po mendohet për një mjedis tjetër artistik, dhe regjisorja pohon se në vjeshtë vepra do jetë në skenë duke dhuruar jo pak emocione për publikun.

“Pas disa punëve të tjera artistike, do të vijë edhe monodrama “Vdekja e një Mbretëreshe”, dhe besoj se në vjeshtë për publikun kjo vepër teatrore që mban ermin e Rexhep Qoses do të përcjellë jo pak emocione”, shton më tej Dhima, regjisore dhe aktore, transmeton Sotnews.

E ndërsa në skenën teatrore prej vitesh është pohuar se duhet të ketë më shumë vëmendje ndaj dramaturgjisë shqipe, në skenën e Tiranës pritet të vijë monodrama e akademikut Qosja, vepër që ka fituar shumë vlerësime, dhe tashmë do të jetë dhe pjesë e shfaqjeve teatrore që vijnë për publikun me nisjen e sezonit të ri artistik. Para dy vitesh monodrama “Vdekja e një Mbretëreshe” për publikun erdhi me regji të Inis Gjonit dhe interpretim të aktores Eni Jani, por disa javë më pas publiku do ta shikojë me një tjetër interpretim nga Arjeta Dhima.

Me bluza të zeza e mbishkrime të bardha rreth “Dokufestit”, përfaqësues të festivalit kanë mbajtur një konferencë për media. Edicioni i 12 me radhë i “Dokufestit” do të mbahet nga 17 deri më 25 gusht, siç e do tradita, në qytetin e Prizrenit.

“Tema e festivalit sivjet është “Kufijtë” apo “Breaking Borders” dhe për imazhin vizual të festivalit kemi punuar me artistin Daniel Muroi, që e ka krijuar emblemën e festivalit sivjet, një aeroplan i letrës si një mjet poetik për kapërcimin e kufijve, po ashtu edhe ngjyrat e festivalit sivjet janë e kuqe, e kaltër dhe e gjelbër, me të cilat mbulohen të gjitha monitorët e televizioneve”, ka thënë Nita Deda, drejtuese e komunikimit.

Për 9 ditë sa do të zgjasë festivali, pjesëmarrës do të jenë 250 filma, që sipas Veton Nukollari, drejtor artistik i festivalit, është programi më i madh që festivali ka pasur ndonjëherë.

“Është një program prej 250 filmave, ku përfshihen 106 filma, 7 programe garuese dhe afër 150 filma në 13 programe që janë jashtë konkurrencës, përfshirë edhe një program që është falas dhe që është kuruar enkas për shfaqjen e filmave eksperimentalë në një ambient të ri”, ka treguar Nukollari.

Në programin garues do të ketë filma të rinj premierë në festival, por do të ketë edhe filma që janë fitues të çmimeve të ndryshme si të “Cannes”, “Sundance”, ndërkaq do t’i kushtohet hapësirë edhe filmave siç janë quajtur “Focus nordik”.

“Programi që është jashtë konkurrencës, është kuruar në bashkëpunim me 5 institute të filmit të shteteve nordike, që e kemi quajtur “Focus nordik” dhe në vete përmban mbi 40 filma që vijnë nga 5 shtete nordike, Suedia, Danimarka, Finlanda, Islanda dhe Norvegjia”, ka thënë më tej Nukollari, shkruan Zëri.

“Presim që këtë vit Prizrenin ta vizitojnë së paku 200 filmbërës, producentë, njerëz të filmit, përfaqësues të instituteve të filmit, mysafirë direkt të lidhur me programin e festivalit, përveç asaj presim natyrisht edhe një fluks të madh të njerëzve që të vijnë për festival, për të shijuar filmin, por edhe në aktivitete të tjera”, ka vazhduar ai.

Sivjet “Doku Festin” e karakterizon aplikimi i një numri të madh të filmave të shkurtër, gjithsej 1200 filma, prej të cilëve në program janë futur 33 filma. Festivali do t’i ketë 8 premiera në kategorinë ndërkombëtare dhe 6 në atë kombëtare, ndërsa do të jenë 4 filma shqiptarë në konkurrencën ndërkombëtare.

“Vlen të përmendet filmi premierë i Antoneta Kastratit, dhe filmi i regjisorit Daniel Mulaj, që si personazh ka aktoren Arta Dobroshi, kemi edhe filmin e Meriton Zinxhiria me filmin e tij “Kamomil”. Në kategorinë kombëtare ku vlen të veçohet filmi i artistit Alban Muja, që do të shfaqet të hënën në mbrëmje”, ka treguar Samir Karahoda, programator i filmave të shkurtër.

Duke qenë se është rritur numri i filmave, organizatorët e “Dokufestit” kanë shtuar numrin e kinemave. “Lumbardhi”, “Bahçe”, “Kino në Lum” “Kono në Kala”, e të tjera janë kinematë ku do të shfaqen filmat këtë edicion.

Sponsor gjeneral i “Dokufestit” është “Pro Credit Bank”, ndërsa sponsorë të tjerë janë Ministria e Kulturës, Rinisë dhe Sportit, IPKO, grupi “Koha”, kompania e sigurimeve Dardania dhe “Kosovo 2.0”.

Ajo që do t’i paraprijë festivalit, është ekspozita e fotografit të mirënjohur Pep Bonet, i cili e ka fituar çmimin “Wall Press” për këtë vit. Kjo ekspozitë do të hapet më 16 gusht dhe është kuruar nga koordinatori i “Dokuphotos” për këtë vit, fotografi Jetmir Idrizi.