Kandidati i LDK-së për kryetar të Prizrenit, Eqrem Kryeziu, e ka porositur kryeministrin e Kosovës, Hashim Thaçin, që të mos përzihet në profesionin e tij. Ai tha se batutat i përdorë për relakës, e jo për fyrje.

“Batutat i përdori për relaks dhe jo për fyrje siç po i marrin disa të tjerë. Kryeministri Thaçi nuk duhet të hyjë në profesionin tim”, tha Kryeziu në një emision në TV Prizren.  Kryeministri i Kosovës, Hashim Thaçi, dje e ka sulmuar me batuta kandidatin e LDK-së për kryetar të Prizrenit, Eqrem Kryeziun. Ai në vend të pseodenimit “Eqë”, Kryeziun e ka quajtur “Zeqë”.

Ndërkaq, Kryeziu tërthorazi ia ka kthyer batutën Thaçit, ndonëse nuk ia ka përmendur emrin. “Nuk dua t’ia kthej sonte edhe pse kam çka t’i them. Unë e di që shumë njerëz që kanë pozita në institucionet e Kosovës, kanë probleme me rrokje dhe gjuhën shipe, prandaj jam i lumtur që po hapen Universitetet nëpër qytetet e Kosovës. Është fatkeqësi e madhe mos me e njoft gjuhën tënde”, tha Kryeziu. /PrizrenPress.com/

Mbrojtja e Fatmir Limajt dhe nëntë bashkëluftëtarëve të tij për rastin Kleçka ka marrë sot vendimin edhe në formë të shkruar për lirimin e tyre. Aktgjykimi për lirimin tyre qe marrë më 17 shtator, por ai nuk u dorëzua me shkrim deri në ditën e sotme.

Menjëherë pas kësaj, prokurori i EULEX-it, Maurizio Salustro është ankuar ndaj vendimit të Gjykatës Themelore. Salustro ka deponuar sot në Gjykatën Supreme të Kosovës një ankesë ndaj vendimit të Gjykatës Themelore në Prishtinë për lirimin e Fatmir Limajt dhe nëntë bashkëluftëtarëve të tij nga akuzat për krime lufte. Prokurori pretendon në ankesë se vendimi i Gjykatës Themelore kishte mangësi “duke shkelur, sipas tij, procedurën penale dhe vërtetimin e gabuar të gjendjes faktike.

Mirëpo si deklaroi për Koha.net avokati mbrojtës i Limajt, Tomë Gashi, deponimi i ankesës së Salustros nuk i brengos avokatët.

“Ankesa e Salustros nuk na brengos ne avokatët mbrojtës pasi në aktgjykimin lirues të gjyqtarit Malcolm Simons, në afro 290 faqe është sqaruar në hollësi çdo pikë e aktakuzës”, deklaroi Gashi.

Në tubimin përmbyllës të Partisë Demokratike të Kosovës në Prizren, lideri i PDK-së, Hashim Thaçi, ka thënë se Prizreni është i PDK-së, dhe se në balotazhin e 1 dhjetorit, fitues do të jetë Ramadan Muja.

Thaçi tha se, më 3 nëntor, Muja fitoj me 8 mijë vota, derisa sipas tij, fitorja e 1 dhjetorit do të jetë me mbi 16 mijë vota.

Ndërkohë Thaçi, ka folur edhe për koalicionin LDK-BD, të cilin e ka cilësuar si çift të dëshpëruar politik dhe humbës./Kosovapress/

Koalicioni për Rahovecin AAK-LDK mbajti tubim të madh përmbyllës në sallën e qendrës së kulturës “Mensur Zyberaj”, me ç’rast u rikonfirmua bashkëpunimi i ngushtë ndërmjet këtyre dy subjekteve. Kandidati për kryetar të komunës nga AAK Smajl Latifi tha se ne do të vazhdojmë të bashkëqeverisim me qytetarët, ashtu siç kemi bërë deri më tani. Në vazhdim Latifi shpalosi projektin e tij qeverisës, duke u fokusuar në mbështetje të sektorit të bujqësisë dhe ekonomive të vogla familjare.

Edhe Nahit Elshani, kryetar i degës së LDK-së theksoi nevojën e rritjes së kapaciteteve qeverisëse në nivel komunal dhe rikonfirmoi se Koalicioni për Rahovecin është i fokusuar në fitoren e Smajl Latifit, ndërsa thashethemet se, koalicioni është prishur është vetëm fushatë për të hutuar votuesit. Ne qëndrojmë fuqishëm parapa marrëveshjes së arritur dhe besojmë se së bashku do të ndërtojmë një strukturë të fortë e profesionale qeverisëse në interes të të gjithë qytetarëve pa dallime, shtoi Elshani. Në mbështetje të kandidatit Latifi doli edhe lideri i AAK-së Ramush Haradinaj, i cili tha se Smajli është ikonë e ndershmërisë dhe neve na ka bërë nder të madh duke pranuar të jetë kryetar i Rahovecit. Me fitoren e tij fitojnë të gjithë, dhe jo vetëm partnerët e koalicionit. Me Smajl Latifin kryetar përfitojnë dhe mbështetësit e PDK-së, shtoi Haradinaj, duke u zotuar se së shpejti edhe ai do të jetë në gjendje të ndihmojë komunën e Rahovecit në cilësinë e kryeministrit të vendit.

Kryetarja e AGK-së Donika Kadaj-Bujupi tha se në takimet që ka pasur me zyrtarë të lartë shtetëror në Mbretërinë e Bashkuar, ka dëgjuar të flitet mirë dhe me re4spekt vetëm për një kryetar të një komune në Kosovë, dhe ky është Smajl Latifi. “Atje më kanë thënë se në Rahovec e kemi takuar një kryetar energjik dhe të ndershëm. Kemi parë se aty qeveriset mirë dhe pa korrupsion, prandaj një kryetar i tillë ju duhet edhe shumë komunave të Kosovës,” citoi fjalët e zyrtarëve anglezë deputetja Kadaj-Bujupi.

Në tubim morën pjesë edhe strukturat drejtuese të degës së LDK-së dhe ish kryetari i degës së LDK-së Ibrahim Kryeziu, për të cilin rivalët e koalicionit kishin propaganduar se i është bashkuar kundërkandidatit të koalicionit./PrizrenPress.com/

Eqrem Kryeziu dhe Zafir Berisha i kanë dërguar selame nga Prizreni kryeministrit të Kosovës Hashim Thaçi. Eqrem Kryeziu, kandidat i LDK-së për Prizren, ka thënë se Thaçi, nga frika e humbjes në Prizren, ka dalë nga takti. Ai ka thënë se kritikat që ka bërë Thaçi ndaj koalicionit LDK-BD, janë logjikë shumë e ulët e kryeministrit të Kosovës.

Kryeziu sërish ka thënë se tallja më e madhe që i bëhet qytetarëve të Prizrenit dhe vetë Prizrenit është kandidimi i Ramadan Mujës, nga radhët e PDK-së për kryetar të Prizrenit.

Kandidati i LDK-së për këtë qytet, ka thënë se Muja, jo vetëm që duhet të hetohet për procesin me të cilin është duke u ballafaquar, por edhe për veprimtarinë e tij, prej kohës sa ka qenë i ri e deri te largimi i regjimit të Milosevicit.

Ai ka thënë se Muja, U ka bërë shumë të zeza bashkëvendasve të tij dhe shumicës së banorëve të Prizrenit.

E Zafir Berisha i BD-së, ka thënë se është për keqardhje, ditëve të fundit, niveli që ka rënë kryeministri Hashim Thaçi. Ai ka thënë se ky nivel i tij, po tregon se kush është duke qeverisur me Prizrenin.

Berisha, u ka bërë thirrje të gjithë miqve të tij, siç e ka thënë ai, që kanë mbetur në ndonjë qosh të PDK-së, që të bashkohen me Bashkimin Demokratik, siç u shpreh, sa nuk është bërë shumë vonë./kosovapress/