“Albanian Week Film Festival”, që do të nisë prej 8 deri më 14 nëntor në New York të SHBA-ve, ka përfshirë në edicionin e dytë të këtij festivali filma të metrazhit të gjatë, të shkurtë dhe dokumentarë nga të gjitha trojet shqiptare, por edhe të regjisorëve që veprojnë në shtete të ndryshme të botës. Mrika Krasniqi, organizatore e këtij festivali, ka thënë për “KultPlus”, se organizimi i këtij festivali në Amerikë ka një rëndësi të veçantë, për faktin se prezantohet kombi shqiptar  nëpërmjet projeksioneve filmike. “Kjo është mënyra më e fuqishme për të depërtuar dhe për të ndikuar tek audienca në atë se si e kupton apo e percepton botën shqiptare”, ka thënë Krasniqi. Ky festival përpos që do të prezantojë filmat shqiptarë, do të ketë edhe rëndësinë e takimit të regjisorëve dhe aktorëve shqiptarë anekënd botës, pasi që, sipas Krasniqit, në këtë ngjarje do të jenë të pranishëm edhe filmbërësit e këtyre projekteve.

“Në këtë ngjarje do të jenë prezentë regjisorët: Robert Budina, Agim Sopi, Joni Shanaj , Orges Bakalli, Eneida Koreshi, Roland Uruqi, Paul Kurti…, sikurse edhe aktorët: Astrit Alihajdari, Vlora Dema…”, ka thënë Krasniqi, por duke mos përjashtuar as prezencës e kineastëve ameriknë duke përfshirë edhe regjisorë, aktorë, producent, sikurse janë: Larry Moroe, Martin Rost, Oliver Horvat, Edimy Michel.

Në këtë festival do të prezantohen 30 filma të kinematografisë shqiptare, 24 prej tyre prodhime të viteve 2012- 2013, duke u përfshirë filmat artistik të metrazhit të gjatë, atij të shkurtë dhe filmat dokumentarë. Mirëpo, ky edicion ka edhe specifikën tjetër pasi do të prezantohen edhe filmat në retrospektivë të kinematografisë shqiptare duke i futur në programin “White and Black”.

Krasniqi krejt këtë angazhim e sheh edhe nga një prizëm tjetër, pasi që, sipas saj në këtë formë mund edhe të depërtojë filmi shqiptarë në Amerikë.

“AFW” ka një rëndësi të madhe në veçanti për depërtimin e filmave shqiptarë në Amerikë. Ne do të përpiqemi sinqerisht të jemi një urë lidhëse në mes të artistëve shqiptarë kudo në botë, dhe artistëve të tjerë të cilët mund të krijojnë ide dhe bashkëpunime të reja. Ky është edhe një shteg i hapur më shumë për depërtimin e autorëve shqiptarë në ndonjë projekt kinematografik, apo edhe të aktorëve të cilët do të kenë mundësi të promovohen në këtë event”, ka thënë Krasniqi.

Në këtë festival që në përmbyllje do të ndahen tri çmime: për filmin më të mirë të gjatë, për filmin më të mirë të shkurtë dhe filmin më të mirë dokumentarë, nuk ka pas ndonjë kriter selektimi të filmave duke u bazuar në tema apo në ndonjë kriter tjetër, duke u bazuar në atë, se kinematografia shqiptare nuk ka aq shumë prodhime sa të vihen edhe kriteret. “Kushtet e vetme kanë qenë që projektet filmike të jenë profesionale dhe të jenë të realizuar gjatë dy viteve të fundit”, ka thënë Krasniqi.

Ndërkohë, duke u bazuar në edicionin paraprak, Krasniqi ka thënë se temat e filmave shqiptarë janë mjaftë interesantë për audiencën jo shqiptare, gjithnjë duke u bazuar në origjinalitetin e filmave dhe rrethanat se si është paraqitur filmi. “Ky interesim do të hapë një perspektivë të re për artin dhe artistët shqiptarë në përgjithësi”, ka thënë Krasniqi.

Ceremonia e hapjes së Javës së Filmit Shqiptarë do të zhvillohet në teatrin prestigjioz të NY “SVA Theatres”, më 8 nëntor, në orën 19:00. Festivali do të hapet me filmin artistik të metrazhit të gjatë “Agon”, me regji të Robert Budinës, ndërkaq pjesëmarrës nga Kosova në kategorinë e filmave të gjatë është ai “Agnus Dei”, i regjisorit, Agim Sopi. Themelues të këtij festivali janë Mrika Krasniqi dhe Ariot Myrtaj.

Festivali pos që është mbështetë nga Ministria për Kulturë, Rini dhe Sporte e Kosovës dhe ajo e Diasporës ka edhe sponsorë të tjerë.

Një fushatë e mrekullueshme ka nisur këto ditë në rrjetin social Facebook, faqet e të cilit janë mbushur me një njoftim, ku kërkohet ndihmë me libra Abetareje dhe të Gjuhës Shqipe, për fëmijët shqiptarë të shkollave shqipe në Selanik dhe Janica.

Njoftimi u shpërnda fillimisht nga kolegia jonë, gazetarja Anila Jole, e cila është pjesë e stafit të mësuesve që japin mësim vullnetarisht në shkollën e Selanikut. Prej dy ditësh njoftimi i saj është shpërndarë në mënyrë të rrufeshme në FB, nga miq të saj, por edhe miq të miqve, të njohur ose të panjohur, në Shqipëri dhe jashtë, ku njerëz të ndryshëm bëjnë thirrje për të dhënë kontribut.

Në njoftim sqarohen detajet për nevojat që kanë shkollat e Selanikut dhe Janicasë, për tekste të Abetares dhe Gjuhës Shqipe 2,3,4,5,6 si dhe vendi ku duhet të dorëzohen ndihmat. Kaq ka mjaftuar, që dashamirësit e parë të dhurojnë librat e blerë prej tyre, në ndihmë të ruajtjes së Gjuhës Shqipe në vend të huaj. Ata që janë ofruar për të ndihmuar dhe kanë ndihmuar, nuk jetojnë vetëm në Shqipëri. Edhe nga SHBA dhe Kanadaja miqtë e dashamirësit kanë kërkuar të japin kontribut.

Anila Bisha, drejtore e MediaPrint, e cila ofroi tekstet e Abetares me çmim më të ulët për ata që do të bëheshin pjesë e kësaj fushate dhe ofroi zyrën e saj si pikë grumbullimi për donacionet, thotë se shumë të tjerë kanë telefonuar duke kërkuar t’iu rezervohet një numër caktuar librash.

Nga ana tjetër, gazetarja Valbona Sulçe që u përfshi aktivisht në këtë fushatë në Tiranë, ka siguruar ndër të tjera përfshirjen e një shkolle 8 vjeçare, fëmijët e së cilës po dhurojnë librat e Gjuhës Shqipe për bashkëmoshatarët e Selanikut dhe Janicasë.

Të njëjtën përpjekje po bëjnë edhe gazetarët e News24 dhe Balkanweb dhe mediave të tjera, për të afruar rreth kësaj nisme shkolla të ndryshme në Tiranë dhe për të mbledhur sa më shumë libra, me dëshirën e mirë që edhe nëse nevojat tejkalohen, në Greqi të ketë më shumë nxënës që dëshirojnë të mësojnë gjuhën shqipe.

Pse lindi domosdoshmëria e kësaj iniciative?
Në qytetet e Selanikut dhe të Janicasë, në Greqi vazhdon për të 9-in vit, cikli i mësimit vullnetar të gjuhës shqipe, për fëmijët e emigrantëve shqiptarë, organizuar nga mësuesit e Shoqatës së emigrantëve Shqiptarë “Nënë Tereza”. Kjo shoqatë organizon mësimin vullnetar të gjuhës shqipe për fëmijët e emigrantëve shqiptarë, me mbështetjen e mësuesve vullnetarë, të diplomuar në Universitetet shqiptare. Mësimi zhvillohet në mjediset e ofruara nga Fakulteti Pedagogjik në Universitetin “Aristoteli” në Selanik dhe në Shkollën publike fillore nr.3, në Janica.

Numri i nxënësve në këto shkolla rritet çdo vit e më shumë, po ashtu dhe nevojat didaktike të mësimdhënies. Sipas asaj që na tregojnë mësuesit, vitet e fundit Ministria e Arsimit të Shqipërisë ka ofruar, edhe pse me vonesë, librat e duhur. Sivjet, numri i nxënësve po afron shifrën 200, por ata janë ende pa tekste të Abetares dhe Gjuhës shqipe. Anila Jole thotë se “pas kërkesave të vazhdueshme zyrtare të Shoqatës “Nënë Tereza” drejtuar ministrisë së Arsimit gjatë muajve të verës, nuk pati asnjë lëvizje konkrete. Duke patur parasysh edhe ndërrimin e qeverive, ne pritëm mjaft, por koha nuk pret. Kështu na duhej të gjenim mënyra të tjera, sërish vullnetare, për të siguruar librat e nevojshëm”.

Në këto kushte filloi fushata sensibilizuese në FB për sigurimin vullnetar të teksteve shkollore, libra të Abetares dhe Gjuhës Shqipe. Lutja iu drejtohet grupeve apo individëve, shkollave publike apo private, biznesmenëve ose nëpunësve, miqve e shokëve në Shqipëri, ose jashtë saj, kujtdo që vlerëson e respekton ruajtjen e së drejtës së fëmijëve për të mësuar gjuhën shqipe edhe pse rriten larg Shqipërisë.

“Gjuha shqipe ka nevojë për ndihmën tonë. Dhuroni një Abetare që fëmijët tanë në vend të huaj të mos e harrojnë gjuhën e nënës!” Kjo është edhe thirrja jonë!(Daniela Bonollari Balkanweb)