Në kuadër të takimeve me grupe të ndryshme shoqërore, kandidati për kryetar të Komunës së Rahovecit Smajl Latifi, shtroi drekë për familjarët e dëshmorëve, invalidët dhe veteranët e luftës të UÇK-së.

Fillimisht debatin e hapi shefi i Shtabit Zgjedhor në Degën e AAK-së Musa Cena, i cili lavdëroi angazhimet dhe përkushtimet e Smajl Latifit edhe si luftëtar i UÇK-së, edhe si kryetar i komunës. Sipas tij, askush deri më tani nuk ka bërë më shumë se Latifi për ruajtjen dhe kultivimin e vlerave të UÇK-së’’.

Ndërsa, kryetari i Degës së OVL të UÇK-së në Rahovec,  Vajdin Berisha ka shtuar se takimet e këtilla janë mundësi e mirë për të vlerësuar në përputhje me kontributet e secilit prej kandidatëve, ndërsa mbështetja për vlerat e luftës të UÇK-së duhet të jetë e vazhdueshme, pavarësisht se kush do të jetë kryetar i komunës, duke falënderuar kryetarin aktual të komunës Smajl Latifi për ndihmën e dhënë për këto shoqata.

Kurse veterani i luftës dhe vëllai i dy dëshmorëve  Fahredin Hajda, shtoi se askush nuk ka mundur të bëjë më shumë për familjet e dëshmorëve, invalidët dhe veteranët e luftës. Ai është kujdesur që varrezat e dëshmorëve, përmendoret dhe vend rëniet e tyre të jenë të rregulluara si asnjëherë më parë, prandaj besimi për Smajl Latifin duhet të jetë i palëkundur. Ai i ftoi bashkëluftëtarët e tij që të votojnë më 3 nëntor dhe votën e tyre ta japin për Smajl Latifin dhe AAK-në.

Deputeti dhe ish komandanti i UÇK-së në ZOD Daut Haradinaj, u shpreh se askush më mirë se Smajl Latifi nuk e kupton këtë dhembje e këtë krenari, pasi që vet Smajli ishte bashkëluftëtar i bijve tuaj.

Ai tha se jam i bindur se Smajli ka për t’u kujdesur gjithmonë për familjarët e dëshmorëve, invalidët si dhe veteranët e UÇK-së. Prandaj, aspak nuk do të gaboni nëse i jepni edhe një herë mbështetjen tuaj për të qenë kryetar i komunës së Rahovecit në një mandat të plotë.

Kandidati për kryetar të komunës së Rahovecit Smajl Latifi, tha se gjatë mandatit tonë qeverisës kjo kategori e rëndësishme është trajtuar me shumë kujdes dhe respekt. Ne iu kemi kushtuar vëmendjen e merituar këtyre vlerave, sepse gjaku i dëshmorëve, sakrifica e invalidëve dhe përkushtimi i veteranëve të luftës, janë vlera të pamohueshme dhe që na udhëheqin në çdo veprim që bëjmë. Kërkesat e këtyre kategorive janë trajtuar me kujdes dhe shumë prej tyre janë realizuar. Kohëve të fundit kemi nisur të ndërtojmë edhe një shtëpi për këto kategori, pasi që veprimtaria e tyre është afatgjatë, sepse vlerat e luftës atakohen shpesh dhe në çdo kohë. Mbrojtja e këtyre vlerave është obligimi ynë dhe amaneti që na e lanë dëshmorët. Ndër të tjera Latifi tha se kompania e vreshtarisë dhe verëtarisë “StoneCastle” është e gatshme të dhurojë një parcelë toke për ndërtimin e një  godine për strehim të familjarëve të dëshmorëve, veteranëve dhe invalidëve pa strehë. /PrizrenPress.com/

Në Bruksel u mbajt raundi i radhës i bisedimeve teknike për zgjedhjet, në kuadër të dialogut për normalizimin e marrëdhënieve mes Kosovës dhe Serbisë, të ndërmjetësuar nga Bashkimi Evropian. Në këtë takim u vlerësua pozitivisht mbarëvajtja e procesit zgjedhor dhe në veçanti u vlerësua se palët po i kryejnë mirë obligimet zbatuese që dalin nga marrëveshja e Brukselit e 19 prillit 2013.

Fillimisht u diskutua për rrjedhën e fushatës zgjedhore me ç’ rast, zëvendëskryeministrja Tahiri kërkoi angazhim të shtuar të të gjitha palëve, për një fushatë demokratike, në frymën e standardeve ndërkombëtare, si dhe kërkoi që të gjitha palët të kontribuojnë për evitimin e dukurive negative, që kanë të bëjnë me kërcënime të kandidatëve dhe punonjësve të KQZ-së sepse zgjedhjet lokale janë në interes të qytetarëve dhe të zgjedhjeve të përfaqësuesve legal dhe legjitim të komunave.

Në vazhdim, u raportua për procesin e ankimimit në Panelin Zgjedhor për Ankesa dhe Parashtresa (PZAP) ku kryetari i PZAP Shukri Sylejmani, njoftoi se i gjithë procesi i shqyrtimit të ankesave është bërë në bazë të ligjeve të Republikës së Kosovës dhe ka përfunduar me sukses. Ai njoftoi palët se nga 16355 ankesa, 10419 janë refuzuar, ndërsa janë pranuar 5458 ankesa, dhe 349 janë hedhur si të parregullta.

Ndërkaq u tha se në bazë të ligjeve të Kosovës, palët e refuzuara mundë t’i drejtohen edhe instancës më të fundit në këtë proces, respektivisht Gjykatës Supreme të Republikës së Kosovës.

Më pas u diskutua për rëndësinë që siguria të jetë në nivelin e duhur gjatë fushatës dhe ditës së zgjedhjeve, ku në veçanti OSBE-ja njoftoi se janë të angazhuar të tri mekanizmat e sigurisë, Policia e Kosovës, EULEX-i dhe KFOR-i, që në kuadër të misioneve të tyre të ofrojnë siguri maksimale për këtë proces.

Po ashtu Kryetarja e KQZ, Valdete Daka njoftoi palët për afatet ligjore për votim nga jashtë Kosovës, duke specifikuar që afati i fundit për votim është data 1 nëntor.

Koordinatori i Grupit, Qemajl Marmullakaj, edhe kësaj radhe insistoi që konkluzionet dhe marrëveshjet e çdo takimi, duhet të reflektojnë në konsekuencë përmbajtjen e diskutimeve, si një kontribut qenësor për dialogun dhe zbatimin e plotë të marrëveshjes./PrizrenPress.com/

Koalicioni AAK – LDD në Prizren, ka akuzuar partinë në pushtet(PDK) se po bënë fushatë të pandershme zgjedhore. Sipas këtij koalicioni partia në pushtet po mundohet që në forma të ndryshme të manipulojë me votat e qytetarëve.
“Qeveria Muja’ duke pasur në dispozicion katër vite të plotë për rregullimin e infrastrukurës në qytet dhe fshatra, ka pritur këto tri javë të fushatës zgjedhore për të mbushur gropat e hapura, për të shtruar me zhavor rrugë rurale e diku, diku edhe me kubëza betoni pa shikuar fare se a duhet sëpari të jetë kanalizimi apo jo, me rëndësi është të shtrohet rruga me kubëza betoni. Kjo gjë ka indinjuar shumë thellë qytetarët prizrenas, të cilët këtë indinjatë e shprehin gjatë takimeve që kanë me ne, sepse janë mësuar që këto punë të lëna për fushatë janë një kërkim vote në mënyrën më jo njerëzore, një kushtëzim që nëse nuk e japin votën nuk do t’u shtrohet rruga, dhe e dinë shumë mirë se një rrugë për t’u rregulluar si duhet nuk mjafton një javë, sa kanë mbetur deri në fund të fushatës”, thuhet në komunikatën për media të koalicionit AAK-LDD në Prizren.

Sipas këtij koalicioni, kjo nuk është e vetmja formë e manipulimit me votat e qytetarëve prizrenas që bën Partia Demokratike e Kosovës. “Kryeministri i Kosovës, Hashim Thaçi më shumë ka qenë kryetar partie sesa kryeministër i një vendi, më shumë kalon kohën në Prizren duke bërë fushatë për Ramadan Mujën se në Prishtinë. Për të arritur kulminacionin e veprimeve të pandershme që bën kjo parti për të ruajtur pushtetin në Prizren, vuri në lojë edhe dy kryeministra të dy shteteve tjera dhe një numër të madh të qytetarëve prizrenas. Thaçi i vuri para një akti të kryer kryeministrin e Turqisë , Erdogan dhe kryeministrin e Shqipërisë Rama. Ne e dimë shumë mirë se Erdogan dhe Rama kanë ardhur për të përuruar terminalin e ri në aeroportin e Prishtinës dhe se Erdogan është qytetar nderi i Prizrenit, por PDK-ja shfrytëzoi këtë rast për të bërë fushatë, duke e ditur se as Erdogan, e as  Rama nuk do të refuzojnë ftesën për të vizituar Prizrenin. Kryeministri Thaçi këtë vizitë e shndërroi në një fushatë elektorale të PDK-së, duke mos ftuar as edhe një këshilltar të Asamblesë së qytetit, kur e dimë se ata këshilltarë janë që kanë ngritur dorën për të shpallur qytetar nderi kryeministrin e Turqisë, duke mos ftuar asnjë subjekt politik që vepron në këtë qytet dhe duke thënë hapur se Ramadan Muja është dhe do të jetë kryetari i ardhshëm i Prizrenit.

“Ky është një mashtrim, andaj ne si koalicion kërkojmë nga qytetarët e Prizrenit, sidomos nga qytetarët turq që jetojnë në Prizren, që të mos mashtrohen nga ky gjest i ulët i PDK-së, të cilët kanë hapur dezinformata se Erdogan dhe Rama i kanë ardhur në ndihmë Ramadan Mujës për të fituar Prizrenin, kanë ardhur për t’u thënë qytetarëve prizrenas të votojnë Ramadan Mujën. Jo vetëm Prizreni, por e tërë Kosova e ka parë se Erdogan e Rama as edhe një fjalë nuk e kanë thënë për fushatë, nuk kanë përmendur asnjëherë zgjedhjet e as kandidatin Muja”/PrizrenPress.com/