Lëvizja Vetëvendosje! ka shpalosur Alternativën qeverisëse lokale përpara banorëve të fshatrave Marali dhe Pagarushë të Malishevës. Kandidati për kryetar të Komunës, Alban Krasniqi, shprehu atë çfarë synon që të arrijë Vetëvendosje! me këtë program, dhe cili është synimi kryesor.

“Nëpërmjet Alternativës jemi munduar të vendosim një raport të ri me qytetarin, me ju: atë që Komuna është e përbashkëta, në të cilën të gjithë kemi pjesën tonë dhe ata që zgjidhen për të drejtuar janë vetëm shërbëtorë publikë. Jo si deri më tani, që Komunën e kanë trajtuar si pronë private dhe të paarritshme për qytetarin”, tha Krasniqi. Më tej, ai vazhdoi duke shprehur prioritetet e Alternativës në përgjithësi, dhe për fshatin në veçanti. Mbi të gjitha, ai theksoi drejtësinë në qeverisje, e cila mund të arrihet nëpërmjet transparencës, vullnetit pozitiv dhe ndihmës së pazëvendësueshme të qytetarëve. “Në çdo hap të qeverisjes tonë, zotohemi të shoqërohemi nga transparenca, përgjegjshmëria, profesionalizmi dhe shërbimi i drejtë për qytetarët”, u shpreh Krasniqi.

Kandidati i VV-së për kryetar të Malishevës, Krasniqi vazhdoi duke thënë se Alternativa qeverisëse lokale e Vetëvendosjes është shumë e zgjeruar, por tre janë shtyllat kryesore, të cilat do të sigurojnë një zhvillim të madh për Komunën dhe mirëqenie për qytetarin. “Së pari është drejtësia, e cila nënkupton transparencën, institucione publike apartiake dhe përgjegjshmëri në shërbimet ndaj çdo qytetari; së dyti zhvillimi ekonomik i Komunës, nëpërmjet investimeve afatgjata në bujqësi dhe sektorë të tjerë fitimprurës; së treti përkujdesja sociale, duke u zotuar për një shërbim social dinjitoz për çdo qytetar pa përjashtim”, tha ai. Sipas tij, të tre këto shtylla kryesore të programit, të aplikuara në qeverisjen lokale, përkthehet si plotësim, më së pakti, i nevojave më kryesore dhe të rëndësishme për një jetë të dinjitetshme të çdo qytetari të Komunës së Malishevës. “Prandaj, më 3 nëntor ju ftojmë të votoni Alternativën tonë qeverisëse dhe këto tre shtylla kryesore, që do na kthejnë njëherë e mirë kah zhvillimi e prosperiteti shoqëror”, përfundoi Krasniqi.

Profesori i filozofisë, e njëherësh anëtar i strukturave drejtuese të VV-së, Elvis Hoxha, tha se është e nevojshme që një ditë të ndëshkohet me votë krimi dhe korrupsioni në trevat shqiptare, dhe kjo mund të arrihet vetëm nëpërmjet një aleance popullore që ofron Vetëvendosje!. “Në veçanti duhet të jenë të kujdesshëm shqiptarët e Kosovës që nuk duhet të ecin me idenë se fituan ndaj Serbisë, por me idenë që duhet të luftojnë ndaj shqiptarëve që punojnë për Serbinë”, u shpreh Hoxha.

Ndërkaq, bartësi i listës për Asamble Komunale, Muhamet Bytyçi, bëri një paraqitje të veprimtarisë së deritashme të Lëvizjes Vetëvendosje!, gjithmonë përkrah qytetarëve dhe interesit të tyre. “Ne vazhdimisht kemi reaguar dhe demaskuar këtë keqqeverisje që do të mbahet mend gjatë për korrupsionin marramendës, shpërdorimet e detyrës dhe uljen e dinjitetit të qytetarëve të ndershëm”, u shpreh Bytyçi, duke shtuar se kundër-kandidatët janë të njëjtë me njëri-tjetrin, e pavarësisht se në zgjedhje paraqiten të ndarë, krimi dhe korrupsioni është ai që i mban bashkë. /PrizrenPress.com/

Rinia Demokratike e Kosovës në Prizren, në kuadër të fushatës zgjedhore, ka hapur një tendë në sheshin “ Shatërvan” . Tenda do të shfrytëzohet për të shpërndarë materiale njoftuese për kandidatin për kryetar të komunës së Prizrenit, Ramdan Muja.

Kryetari i Rinisë Demokratike e Kosovës në Prizren, Shkodran Kryeziu, tha se demokratët e Prizrenit me anë të këtij aktiviteti simbolik janë duke dëshmuar edhe gjatë kësaj fushate elektorale se ka qenë dhe do mbetet pjesë integrale e Partisë Demokratike të Kosovës. “Prandaj, fuqia e saj do të shihet me datën 3 nëntor me fitoren e Mujës”, tha Kryeziu.

RDK-ja në Prizren, po ashtu sonte organizon edhe një mbrëmje rinore, e cila do mbahet në Hotel “Theranda”, duke filluar nga 20:00 .

Në këtë mbrëmje rinore do të merr pjesë edhe kryeministri i Republikës së Kosovës njëherësh kryetar i PDK-së, z. Hashim Thaçi.

“Ftoj të gjithë të rinjtë e qytetin e Prizrenit, që të bëhen pjesë e këtij organizimi rinor, ku kryetari Muja, do shpalos platformën politike të PDK-së për rininë e qytetit tonë”./PrizrenPress.com/

Kandidati i koalicionit AAK-LDD për kryetar të Prizrenit, Lulzim Kabashi, është takuar me anëtarët e Organizatës Komunale të Pensionistëve në Prizren. Ai njoftoi përfaqësuesit e kësaj organizate se kërkesa e tyre për të ngritur çështjen e ligjit për pensionistët në Parlamentin e Kosovës, është përcjell tek lideri i AAK-së Ramush Haradinaj.

“Haradinaj do të deklarohet edhe publikisht në përkrahje të këtij ligji për të mbrojtur të drejtat e kësaj kategorie”, tha Kabashi.

Ai premtoi se Qeveria e ardhshme komunale e koalicionit AAK-LDD, do të jetë krah i kësaj kategorie, që sipas tij, deri më tash është lënë pas dore.

Kryetari i Organizatës Komunale të Pensionistëve dhe Invalidëve të Punës në Prizren, Musa Jorganxhiu, falënderoi Kabashin për gatishmërinë e tij, për të dëgjuar hallet dhe brengat e pensionistëve duke shprehur mirënjohje edhe për liderin e AAK-së Ramush Haradinaj për qëndrimin e tij në përkrahje të ligjit të pensionistëve.

Jorganxhiu, theksoi se miratimi i këtij ligji do të ndikojë në përmirësimin e gjendjes aktuale me të cilën po ballafaqohen pensionistët./PrizrenPress.com/

Kandidati i PDK-së për kryetar të Komunës së Prizrenit, Ramadan Muja është takuar me elektoratin në fshatin Medvec. Ai edhe në këtë fshat ka marrë përkrahje të fuqishme .

Muja, premtoi se në të ardhmen do investohet edhe më shumë në këtë fshat. “ Edhe në të ardhmen do të investohet, vetëm e vetëm që të dëshmohet se PDK-ja nuk punon sipas bindjeve politike, por sipas kërkesave të qytetarëve”

Ai ka shpalosur edhe një pjesë të programit zgjedhor. “Në mandatin e ardhshëm do të ketë më tepër investime në bujqësi, sepse ka ardhur koha që Kosova pos që do të pranohet në Evropë si shtet, Evropa do t’ua hapë edhe dyert prodhimeve bujqësore të Kosovës që janë të cilësisë së lartë.
Kandidati i PDK-së Ramadan Muja në këtë fshat është shoqëruar nga Ministri i Ministrisë së Jashtme Enver Hoxhaj dhe deputeti i Parlamentit të Kosovës, Nait Hasani.

”Të gjitha fshatrat e Prizrenit, po mbështesin kryetarin Ramadan Muja. Në fshatin Mevdec fitorja e madhe e PDK-së po ndihet qysh sot. Fitoren e PDK-së po e shoh në mendjen dhe zemrat e banorëve, të cilët po mbështesin fuqishëm vizionin e PDK-së për Prizrenin Evropian.”

Ndërsa Nait Hasani pasi ka falënderuar banorët, për mbështetjen që po i bëjnë vizionit të PDK-së ka theksuar se puna e madhe që ka bërë PDK-ja për fshatrat e Përdrinisë, “na detyron të gjithëve që fuqimisht me 3 nëntor ta votojmë numrin 99, ta votojmë kryetarin Ramadan Muja”

“PDK-ja është oferta më e mirë në këto zgjidhje, për të cilën ofertë veç janë përcaktuar jo vetëm banorët e Medvecit, por të gjithë Përdrinisë”./PrizrenPress.com/

Kandidati i Lëvizjes Vetëvendosje! për kryetar të Komunës së Malishevës, Alban Krasniqi, i shoqëruar nga profesori i filozofisë së Universitetit të Tiranës, Elvis Hoxha dhe nga përfaqësuesit tjerë të VV-së, kanë mbajtur një tubim publik me të rinjtë e Malishevës, për të shpalosur Alternativën qeverisëse lokale.

Krasniqi shprehu vizionin dhe mënyrën sesi e konsideron VV-ja rininë. “Ne nuk e shohim rininë njëjtë si parti e tjera, si një barrë të cilës është vështirë për t’i gjetur punë a angazhim shoqëror. Përkundrazi, e shohim si aleaten tonë më të fortë në rrugën për zhvillimin e vendit. Në këtë aspekt, ne e shohim edhe zhvillimin e Malishevës vetëm përmes ndihmës dhe kontributit tuaj”, tha ai.

Më tej, Krasniqi shpalosi Alternativën qeverisëse, komponentët më të rëndësishëm të saj, e sidomos ata të fokusuar tek të rinjtë. “Në programin e VV-së janë menduar shumë hapësira dhe mundësi për aktivizimin e të rinjve, të cilat kanë të bëjnë me: hapjen e vendeve të reja të punës; punën praktike në institucionet publike, që do ia mundësojmë çdo të riu që ka nevojë dhe dëshirë për punë; punën e përbashkët vullnetare, si një komponent i rëndësishëm i zhvillimit; projektet e tjera që synojmë të mundësojmë gjatë qeverisjes tonë; krijimin e terreneve sportive dhe funksionalizimin e aktiviteteve kulturore”, tha ai.

Në fund, Krasniqi u bëri apel të rinjve jo vetëm për mbështetje e zgjedhje të Alternativës qeverisëse të Vetëvendosjes, por edhe për angazhim sa më të madh politik e shoqëror të tyre, angazhim që sipas tij do t’i ketë kurdoherë të hapura dyert e VV-së. “Ajo që çdo shoqëri pret nga rinia, si pjesa më vitale dhe aktive e saj, është angazhimi, sepse rruga e zhvillimit shoqëror, jo vetëm për të tashmen, por sidomos për gjeneratat e ardhshme, mund të jetë e sigurt vetëm nëpërmjet angazhimit dhe veprimtarisë së rinisë”, përfundoi Krasniqi.

Profesori i filozofisë së Universitetit të Tiranës, njëherësh edhe anëtar i strukturave drejtuese të Lëvizjes Vetëvendosje!, Elvis Hoxha, u shpreh para të rinjve se Vetëvendosje! nuk duhet parë si çdo parti e zakonshme, nga e cila priten vetëm premtime klienteliste, por si një Alternativë politike në të cilën të rinjtë duhet ta shohin veten mbi të gjitha si kontribues në të mirë të vendit. Më tej, Hoxha u bëri thirrje të rinjve që ta vlerësojnë dhe mbështesin programin e Lëvizjes Vetëvendosje!. “Kjo Alternativë përmban për rininë, rivitalizimin e të gjithë atyre komponentëve që i kanë munguar kësaj pjese të shoqërisë në trojet shqiptare për shumë vite me radhë: jetën kulturore, sportive e shoqërore”, tha Hoxha. Në këtë vijë mendimi, Elvis Hoxha tha përpara të rinjve që mos të pranojnë “dhuratat” e vogla të momentit, që ofrojnë partitë pushtetare, por të zgjedhin projektet strukturore afatgjata që ofron Vetëvendosje!.

Ndërkaq, bartësi i listës për Asamble Komunale, Muhamet Bytyçi, tha se Lëvizja Vetevendosje!, si forcë e ndryshimit shoqëror, ka lindur prej të rinjve dhe mbështetet në veçanti tek të rinjtë, duke qenë se këta të fundit janë shpresa afatgjatë e shoqërisë. “Vetëvendosje!, e mbi të gjitha Kosova në përgjithësi, sot kanë nevojë për angazhimin politik dhe qytetar të të rinjve, si forca më vitale dhe përparimtare e saj, e cila sot ndodhet në kushte jo të favorshme për shkak të politikave të mbrapshta pushtetore”, tha Bytyçi./PrizrenPress.com/