Ministri i Mjedisit dhe Planifikimit Hapësinor (MMPH), Dardan Gashi ka njoftuar se disa nga objektet e rrënuar në aksionin e premtes në Prevallë janë pronë e disa nga zyrtarëve në politikën kosovare.

Ai nuk ka dashur të flas me emra se ndërtimet e kujt janë rrënuar.

Gashi ka thënë se i vetmi prej skenës politike që e ka objektin në emër të vetë në Prevallë është, kandidati i LDK-së për komunë të Prizrenit, Eqrem Kryeziu.

Ai ka thënë se Kryeziu ka tejkaluar lejen e ndërtimit që ia kishte dhënë vetit në kohën sa ishte kryetar i Komunës.

“Asnjë nga figura politike nuk i kanë në emër të vetë ndërtimet në Prevallë, përveç Eqrem Kryeziut, as Ardian Gjini nuk e ka në emër të vetë lejen e ndërtimit dhe këtu po i kemi problemet më të mëdha”, ka thënë Gashi në emisionin Interaktiv të KTV-së, citon Orainfo.

Ai ka thënë se edhe Kryeziut edhe Gjinit do t’u rrënohen objektet në të ardhmen nëse nuk do të rrënojnë atë që kanë ndërtuar pa leje.

Gashi ka paralajmëruar se do të rrënohen të gjitha objektet pa leje në Prevallë, pavarësitë rezistencës që mund të kenë nga pronarët e këtyre objekteve.

Ai ka bërë të ditur që gjatë aksionit të sotëm tek Kampi Veror në Prevallë janë larguar nga përdorimi rreth 90 për qind të objekteve.

Gashi ka thënë se komuna e Prizrenit ka dështuar të parandalojë ndërtimit në këtë zonë.

Gjatë aksionit që ka filluar sot për zbatimin e vendimit për rrënimin e ndërtimeve pa leje në Prevallë ka edhe të arrestuar, është shprehur për Kosovapress, ministri i Mjedisit dhe Planifikimit Hapësinor, Dardan Gashi.

Ministri Gashi ka thënë se aty është ndërtuar pa leje, është uzurpuar toka e shtetit dhe se ka ndodhur një degradim i skajshëm i asaj pjese të natyrës.

“Fatmirësisht një pjesë e qytetarëve kanë filluar të bashkëpunojnë dhe kanë filluar t’i largojnë vetë, disa të tjerë kanë rezistuar. Me ta është marrë policia. Me dijeninë time janë arrestuar disa prej tyre, tash me ta do të merret do të thotë gjyqësia”, ka thënë ministri Gashi.

Objektet e ndërtuara atje nuk kanë pasur as rrjet të kanalizimit të ujërave të zeza, as rregullim të mbeturinave.

Në zonën më të mbrojtur në Kosovë, ministri Gashi, ka thënë se kanë ndodhur degradimet më të mëdha.

Ai ka pranuar se ka pasur kundërshtime disa orë, të organizuara nga njerëz të cilët e kanë krijuar këtë gjendje, por që me ta është marrë Policia e Kosovës.

Ky aksion do të vazhdojë dhe kompanitë kanë përsipër rrënimin dhe largimin e mbeturinave në pjesën ku 100 për qind është ilegale dhe shpenzimet sipas ministrit Gashi do t’i bartin vetë ndërtuesit, por që aktualisht i mbulon MPH.

“Vendimi si i tillë do të implementohet. Ju e dini se ka pas tentativa edhe ma herët, nuk janë zbatu dhe kështu si duket njerëzit kanë mendu se kurrë shtetit nuk do të veprojë atje. Ne i kemi paralajmëru disa herë dhe ky është ai premtim që i kemi dhanë. Shteti do të lëvizë jo vetëm në Prevallë, por duke fillu me Prevallën”, ka thënë Ministri Gashi.

Pas përfundimit të këtij aksioni, ministri ka treguar se do të vazhdohet me pjesën tjetër, ku pjesërisht kanë leje, por ku ka tejkalim të lejeve.

Kandidati i Lëvizjes Vetëvendosje! për kryetar të Prizrenit, Arbër Rexhaj, vlerësoi se me fitoren e VV-së do të demokratizohet pushteti në këtë qytet.

“Synimi ynë në këto zgjedhje është fitimi i besimit të qytetarëve se ne duam dhe mund t’ia dalim të përfaqësojmë vullnetin dhe mbrojmë interesat e qytetarëve. Me Lëvizjen Vetëvendosje! brenda institucioneve do të demokratizohet pushteti dhe qytetari do ta ketë mundësinë të jetë pjesë e pandashme e tij”, tha Rexhaj në një takim që ka zhvilluar me strukturat e VV-së.

“Prandaj, ne do të angazhohemi për një mision, i cili i tejkalon dëshirën e marrjes së pushtetit. Ne do të angazhohemi që pushtetin t’ia kthejmë qytetarit. Ky është synimi ynë. Kjo është përpjekja jonë”./PrizrenPress.com/

Partia Konservatore e Kosovës ka filluar fazën e re të fushatës duke vizituar zejtarët, afaristët dhe qytetarët e Prizrenit nëpër shitoret, bizneset dhe shtëpitë e tyre me moton “Ndryshimi troket nëpër dyert e shtëpive tuaja”.

Vizitat derë më derë të Partisë Konservatore të Kosovës kanë zgjuar interesim të shtuar të qytetarëve të Prizrenit duke u njohur me Beni Kizollin, kandidatin për kryetar të Prizrenit dhe kandidatët tjerë për asamblenë komunale të Prizrenit.

Gjatë këtyre takimeve është prezantuar vizioni dhe plani i Partisë Konservatore të Kosovës për të dalë nga kriza ekonomike dhe krijimi më i volitshëm i kushteve për veprimtaritë e përgjithshme të zejtarëve dhe afaristëve të Prizrenit.

“Pas një stagnimi të zhvillimit ekonomik dhe ngufatjes së zejtarëve dhe afaristëve të Prizrenit nga qeverisja e dobët jo vizionare dhe nga papunësia e madhe, qytetarët tani kërkojnë një qeverisje të re, të ndërgjegjshme dhe transparente ku për synim parësor do të ketë zhvillimin e qytetit në baza të shëndosha duke evituar fenomenet negative dhe korrupsionin kronik.
Këto porosi të qytetarëve janë të qarta dhe të sinqerta dhe përputhen me vizionin dhe programin e Partisë Konservatore të Kosovës. Dhe kjo është po ashtu njëra nga arsyet kryesore se pse Partia Konservatore e Kosovës do të fitojë në këto zgjedhje, sepse qytetarët kanë besim tek ne, pasi që janë të sigurt se ne jemi ndryshe”, tha Kizolli.

Ndërsa për lehtësimin e afarizmit të zejtarëve të Prizrenit, Nderim Pasuli, kandidati për asamblenë komunale të Prizrenit theksoi se “Krijimi i kushteve më të volitshme dhe lehtësirat konkrete që do të ofrojmë për afarizmin tuaj do të mundësojnë që ju ti zgjeroni veprimtaritë tuaja dhe të punësoni më tepër punëtorë. Nëse 1000 shitore në Prizren punësojnë nga një punëtor më tepër do të lehtësonte padyshim papunësinë në Prizren. Prandaj veprimtaria juaj është shume e çmuar dhe Partia Konservatore e Kosovës këtë potencial tuajin do të vlerësoj me investime konkrete në këtë fushë. Pasurimi juaj do të thotë edhe pasurimi i qytetarëve dhe i komunës së Prizrenit”.

Dita e 16 e fushatës ka iniciuar edhe kapitullin e ri për fushatën elektorale të Partisë Konservatore të Kosovës me moton “Ndryshimi troket nëpër dyert tuaja” sepse Partia Konservatore e Kosovës në krye me Beni Kizollin është ndryshe./PrizrenPress.com/

Kandidati i Bashkimit Demokratik për kryetar të Komunës së Prizrenit, Zafir Berisha, ka takuar qindra qytetarë të lagjes “Vëllezërit Stavileci” dhe “Lidhja e Prizrenit” në Prizren. Ai tha se Bashkimi Demokratik ka një program zgjedhorë që garanton qeverisje të suksesshme për mandatin 4 vjeçar dhe ky program do të jetë shpresë për një jetë më të mirë për qytetarët.

“Fokusi kryesor i BD-së është zbutja e papunësisë dhe krijimi i vendeve të reja të punës përmes lehtësirave që do t’i krijohen investitorëve të cilët janë të interesuar të vendosen në komunën tonë”, tha Berisha.

Sipas Berishës, qytetarët e Prizrenit të të gjitha komuniteteve nuk do të bien pre e presioneve për të mbështetur të pandehurin Muja.

“Muja është duke shpenzuar miliona euro, prejardhja e të cilave mund të dihet se prej nga është. Ai me foto gjigante dhe postera vend e pa vend po e torturon qytetarin e Prizrenit duke i trishtuar edhe fëmijët”, tha Berisha.

Ai garanton qytetarët e Prizrenit se pas 3 nëntorit me ardhjen e BD-së në pushtet, se do të marrin masa urgjente në mbrojtjen e zonës historike të qytetit, në rregullimin e trafikut urban, në krijimin e parkingjeve si dhe shumë çështjeve tjera që janë urgjente për pjesën qendrore të qytetit./PrizrenPress.com/

Mbrëmë në fshatin Lladroc, në kuadër të fushatës elektorale, Partia Demokratike e Kosovës (PDK), ka shpalosur programin e saj.

Në këtë takim, ku salla e Shtëpisë së Kulturës në këtë fshat, dukej e vogël për ti nxënë të gjithë anëtarët dhe simpatizantët e PDK-së, mori pjesë edhe zëvendës kryetari i parë i PDK-së, z.Kadri Veseli, kryetari i Malishevës, z.Isni Kilaj, bartësi i listës së kandidatëve të PDK-së për Malishevë, z.Adem Berisha, deputet e Kuvendit të Kosovës, znj.Hasime Mazreku-Krasniq dhe z.Halit Krasniqi, si dhe disa kandidat për anëtar të Asamblesë Komunale.

Me këtë rast, banorët e fshatit Lladroc, edhe njëherë treguan mbështetjen e fuqishme për Partinë Demokratike të Kosovës, pasi vet pjesëmarrja e jo vetëm anëtarëve të PDK-së, por edhe e shumë simpatizantëve dhe banorëve të këtij fshati, i dhanë mbështetje të fuqishme PDK-së dhe Isni Kilajt, për kryetar të Malishevës, sikur edhe kandidatit të tyre për Asamblenë Komunale, Ramë Bibaj.

“Isni Kilaj, si një njeri profesional e atdhetar, e ka përkrahjen e Qeverisë së Republikës së Kosovës, përkrahjen e bashkëluftëtarit tonë, z.Hashim Thaçi”, tha zv/kryetari i PDK-së, z.Kadri Veseli, duke ju drejtuar lladrocasve. Zv/kryetari Veseli, fillimisht falënderoi banorët e fshatit për bukën dhe besën e dhënë gjatë kohëve më të vështira të veprimtarisë së tij dhe të shumë bashkëluftëtarëve të UÇK-së. “Ju falënderoj shumë, në këtë natë emocionale.

Po të mos ishit ju, ne nuk do ishim këtu, e as nuk do isha as i gjallë e as i suksesshëm, sikur edhe kryeministri dhe të gjithë ne, pasi ju na keni mbajtur me bukë, me besë dhe kemi qëndruar bashkë e kemi luftuar bashkë”, tha Veseli.

“Unë dëshiroj, t’ju falënderoj për bukën e besën që na keni dhënë. Ne bijtë e juaj po kthehemi në politikë në mënyrën më njerëzore, me angazhimin tonë të fuqishëm, me tërë qenien tonë, në mënyrë që jeta jonë e përbashkët, tani të jetë më e mirë, në mënyrën që fëmijët tanë të kenë shkolla më të mira, që shëndeti i fëmijëve tanë të jetë më i mirë se dje. Në të njëjtën kohë, kemi obligime të gjithë bashkërisht, të marrin përgjegjësi aty ku jemi.

Me llogari kërkuarjen, na bëni të jemi më të përgjegjshëm, në mënyrën që të punojmë edhe më mirë se që kemi punuar dhe besoj se me përkrahjen tuaj, do vazhdojmë edhe pas 3 nëntorit. Është me rëndësi për neve që besimin tuaj, t’jua kthejmë me rrugë më të mira, me shkolla më të mira, me shërbime më të mira shëndetësore. Gjithë këto vite të qeverisjes së PDK-së, kanë treguar rezultate, që me qenë më pranë qytetarit. Identiteti i PDK-së, është vet Malisheva dhe kjo është arsyeja se PDK do të jetë prapa qytetarëve të Malishevës dhe kryetari juaj Isni Kilaj, i cili ka qenë që në fillimet e hershme të UÇK-së, do të jetë i përgjegjshëm si çdo herë në përgjegjësinë e tij si kryetar i komunës edhe për katër vitet e ardhshme dhe do ta ketë derën hapur për gjithë qytetarët e Malishevës.

Sot kam ardhur këtu ku jam në mesin e shumicës së njerëzve të mi, sepse momentet më të rënda të jetës dhe vdekjes i kemi jetuar bashkë. 3 nëntori i këtij viti është shumë përcaktues për të ardhmen e Malishevës, për të ardhmen e raporteve tona si shokë, ne ish luftëtarët e UÇK-së, nuk kemi njerëz për të humbur, duam të jemi bashkë dhe të punojmë bashkë. Pas 3 nëntorit, do të jemi bashkë përsëri, sikur kemi qenë gjithmonë”, tha zv/kryetari i PDK-së, z.Kadri Veseli duke ju drejtuar qindra banorëve të Lladrocit.

Ndërsa kryetari i tanishëm dhe i ardhshëm i Malishevës, z.Isni Kilaj, duke ju drejtuar banorëve të Lladrocit dhe pasi shpalosi programin katër vjeçar për qeverisjes së Malishevës, premtoi përfundimin e ndërtimit të të gjitha rrugicave në fshat, rritjen e kapacitetit të ujit dhe premtimi kryesor ishte ndërtimi i shkollës së re për nxënësit e këtij fshati.
Në mbështetje të kryetarit Kilaj, ishin deputetët e Kuvendit të Kosovës, z.Halit Krasniqi dhe znj.Hasime Mazreku, të cilët edhe njëherë siguruan se Kilaj dhe Malisheva, janë prioritet i Qeverisë Thaçi dhe se do të mbahet premtimi për 75 milion euro investime në katër e vitet e ardhshme për Malishevën.
Fushata e PDK-së, ka vazhduar në Bardh (ish Lladroviq), tubim i cili u pengua në fillim, por që përfundoi mirë dhe me përkrahje të fuqishme për PDK-në, ku Kilaj, premtoi se do vazhdohen investimet në këtë fshat, në të mirë rritjes së mirëqenies së banorëve të Bardhit.

Dhe në fund, të natës së mbrëmshme, PDK, e ka përfunduar fushatën me marrjen e përkrahjes në fshatin Temeqinë, ku si gjithmonë, banorët e Temeqinës, edhe kësaj radhe premtuan se do e ruajnë besimin në PDK, për të vazhduar me qeverisjen e mirë për Malishevën/PrizrenPress.com/