Kandidati i PDK-së për kryetar të Malishevës, Isni Kilaj, ka prezantuar programin e tij qeverisës për katër vitet e ardhshme në fshatin Ballanicë dhe Gajrak .

“Tri janë shtyllat kryesore, në të cilat do të orientohemi në katër vitet e ardhshme, e para në vazhdimin e rregullimit të infrastrukturës, e dyta zhvillimi ekonomik, me theks të veçantë bujqësia dhe e treta mbrojtja e ambientit”, tha Kilaj.

Ai premtoi se në katër vitet e ardhshme, do të orientohemi në zhvillimin e bujqësisë. “Për vitin 2014, kemi planifikuar 200 mijë euro të investojmë në sektorin e bujqësisë, ndërsa në vitet tjera nga 500 mijë euro, çdo vit dhe do ta fuqizojmë këtë sektor të rëndësishëm të zhvillimit ekonomik”, premtoi Kilaj.

Para banorëve të Bellanicës, Kilaj, premtoi edhe rritjen e kapacitetit të ujësjellësit, pasi tashmë kanë gjetur burime të ujit. Për fshatin Gajrak, ndërkaq premtoi rregullimin e ujësjellësit si dhe investime në rrugët në brendi të këtyre fshatrave, pasi rrugët kryesore, tashmë i kanë si çdo fshat tjetër i Malishevës.

“Jemi alternativa më e mirë në çdo aspekt dhe kemi mbështetjen e plotë të Qeverisë së Republikës së Kosovës, për realizimin e programit tonë”, tha Kilaj.
Deputeti i Kuvendit të Kosovës, Halit Krasniqi, i ka dhënë mbështetje të fuqishme Isni Kilaj dhe kandidatëve të PDK-së për Asamblenë Komunale. “Ju duhet të zgjidhni ofertën më të mirë që dëgjoni, por oferta e Isni Kilaj dhe PDK-së për Malishevën, është më e mirë, prandaj votojeni këtë ofertë për të vazhduar me Qeverisjen e mirë për Malishevën dhe për bërjen e Malishevës evropiane”, ka porositur votuesit e këtyre dy fshatrave deputeti Krasniqi./PrizrenPresss.com/

Kandidati i PDK-së për kryetar të Prizrenit, Ramadan Muja, ka shtruar mbrëmë një darkë për të gjitha familjet e dëshmorëve, invalidëve, veteranë të luftës së UÇK-së dhe për ish të burgosurit politik.

Muja në këtë darkë para të ftuarve ka folur për kontributin,sakrificën dhe gjakun e dëshmorëve që kanë dhënë për këtë vend. “Ne gjatë gjithë këtyre viteve sa ishim në pushtet kemi bashkëpunuar me ju. Jemi munduar që me punën tonë dhe me sugjerimet tuaja ta jetësojmë amanetin e dëshmorëve për ta bërë një qytet të njohur në botë. Andaj, me të drejtë presim përkrahjen tuaj edhe më 3 nëntor, që t’i vazhdojmë projektet e nisura dhe të bëhet Prizreni shembull evropian si qytet i vlerave historike dhe i traditës”, tha Muja

Ai falënderoi edhe veteranët, invalidët dhe ish të burgosurit politik. “Edhe në mandatit e ardhshëm 4 vjeçar do të keni përkrahjen time, sepse respektimi i vlerave të luftës për ne do të thotë respektim i i një të ardhme të shëndoshë dhe të sigurt drejtë Evropës”, tha Muja.

Në këtë darkë ka qenë prezent edhe Ministri i Jashtëm i Kosovës Enver Hoxhaj.

Ai kërkoi nga të ftuarit që edhe në të ardhmen ta mbështesin PDK-në dhe Ramadan Mujën për kryetar të Komunës së Prizrenit. ” Vetëm me udhëheqjen e Prizrenit nga PDK-ja mund të realizohet vizioni për Prizrenin Europian. Prandaj, përkrahja e juaj e drejtë do ta shpie edhe Prizrenin dhe Kosovën drejtë bashkimit Evropian”, tha Hoxhaj.

Në emër të katër shoqatave të dala nga lufta ,Burim Shala ka falënderuar Mujën, për kontributin e deritashëm që ka treguar për këto kategori.”Prandaj edhe jemi të përcaktuar për PDK-në dhe Mujën”, tha  Shala. /PrizrenPress.com/

Në Prizren, gjegjësisht në rrugën “Gustav Majer”, të dielën, derisa po zhvillohej ndeshja basketbollistike në mes të BK Bashkimi nga Prizreni dhe KB Peja, ka ardhur deri tek prishja e rendit dhe qetësisë publike.

Siç raporton Policia e Kosovës, rasti ka të bëjë me prishje të rendit edhe në brendi të qytetit, me ç’rast, “tifozët kanë sulmuar njësitin policor në afërsi të Kuvendit Komunal, dhe me mjete po ashtu të forta të madhësive të ndryshme kanë dëmtuar edhe veturën zyrtare të PK-së”.

“Si pasojë e gjuajtjes nga ana e tifozëve me mjete të forta (kocka betoni), lëndime të lehta trupore ka pësuar viktima mashkull K-Shqiptar, pjesëtar i PK-së”, njofton Policia e Kosovës./PrizrenPress.com/

Bashkimi Demokratik ka hapur sot zyrtarisht fushatën zgjedhore edhe në Dragash.Kryetari i këstij subjekti politik Zafir Berisha kërkoi nga opojarët dhe të gjithë banoret e Komunës së Dragashit që të dalin në zgjedhje dhe të votojnë kandidatin e BD-së, për kryetar të Komunës, Nexhat Isufin.“Deri më tash në këtë komunë institucionet komunale kanë qenë në shërbim të klaneve të caktuara politike ku ka qenë i theksuar nepotizmi dhe keq menaxhimi i të hyrave komunale”, tha Berisha.

Kandidati i BD-së, për kryetar të Dragashit, Nexhat Isufi, iu bëri thirrje anëtarëve, simpatizantëve dhe qytetarëve të kësaj komune që të mbështesin konceptin e ri të Bashkimit Demokratik dhe numrin 74.

Ai në këtë tubim përmendi edhe prioritet e programit të Bashkimit Demokratik për Komunën e Dragashit. “Do të subvencionojmë bujqit dhe blegtorët si dhe do të përkrahim biznesin familjar dhe biznesin e mesëm duke i dhënë përparësi turizmit malorë si dhe furnizimin me ujë për të gjithë qytetarët e komunës, si dhe rregullimin e hapësirave për rekreacion të aktiviteteve sportive në Komunën e Dragashit”, tha Isufi.

Ai garantoi banorët e fshatit Bresanë se do të rregullojë shtratin e lumit që kalon përmes fshatit, i cili shkakton telashe për banorët.

Kandidati për kryetarë të Dragashit nga radhët i Bashkimit Demokratik së bashku me ekipin e tij ditët në vazhdim do të komunikojë me banorët e fshatrave te Komunës së Dragashit, banorë të komuniteti shqiptarë dhe atij Boshnjak./PrizrenPress.com/

Alternativa Demokratike e Kosovës (ADK) ka hapur fushatën zgjedhore në Prizren. Në ketë qytet, Alternativa Demokratike e Kosovës e prezantoi kandidatin për kryetar, Fadil Softa si dhe kandidatet për Asamblenë Komunale të Prizrenit.

Kryetarja e ADK-së, Edita Tahiri theksoi se sot po nis një rrugë e re, ajo e ndryshimeve për Prizrenin. “Vizioni ynë është për Prizrenin e shekullit 21. Ne do të investojmë me prioritet për zhvillim ekonomik dhe punësim për të rinjtë, sepse kjo duhet më së shumti komunës dhe qytetarëve. Ne do të krijojmë mirëqenie dhe standarde cilësore në të gjitha fushat e jetës dhe përkushtimi ynë do të jetë maksimal. Stagnimi qytetit do të mbetet në histori. Ne ju ofrojmë të ardhmen që e meritoni”, është shprehur Tahiri, duke shtruar se Prizreni historikisht është qytet i ndryshimeve dhe vendimeve të mëdha, që nga Lidhja e Prizrenit deri te lufta për liri dhe pavarësi.“Sot ju duhet të merrni vendimin për ndryshimet, ju garantojmë se ndryshimet vijnë me ADK-në. ADK është alternativa e juaj. Prandaj votoni ADK 111, sepse janë 111 arsye për fitore”, ka thënë kryetarja e ADK-së, Edita Tahiri.