Lëvizja Vetëvendosje! në Prizren, sot do të zyrtarizojë kandidatin Arbër Rexhaj për kryetar të Prizrenit. Ai të dielën e javës së kaluar, i  është nënshtruar  i vetëm votës së brendshëm zgjedhor të anëtarëve të Lëvizjes Vetëvendosje!.

Zyrtarizimi i kandidaturës së Arbër Rexhajt, do të bëhet  në ora 13:00 në restorantin “Renesanca”, lagjja “Bazhdarhane” (përballë “Katër Kullave”) në Prizren, me ç’rast do të mbahet edhe një konferencë për media.

Lëvizja Vetëvendosje! po ashtu sot, do të zyrtarizojë edhe kandidatin për kryetar të Sharrit. Në të dy konferencat do të marrë pjesë edhe lideri i VV-së, Albin Kurti./PrizrenPress.com/

Kuvendi i Kosovës nuk pritet të tregohet i efektshëm gjatë sesionit vjeshtor të punës. Kjo për faktin se një pjesë e konsiderueshme e deputetëve do të jenë të angazhuar në fushatën zgjedhore e cila parashihet të nisë më 3 tetor, apo vetëm dy javë pasi Kuvendi mund ta ketë mbajtur seancën e parë plenare të sesionit të dytë,shkruan Tribuna

Legjislativi zyrtarisht i nis punimet të hënën më 9 shtator, ndërsa seanca e parë nuk pritet të mbahet para datës 19 shtator. Edhe në proceset e kaluara zgjedhore, parlamenti është ballafaquar me vështirësi në funksionim për shkak se deputetët ishin të angazhuar në fushatë, ose kur mbaheshin seanca në raste të shumta ngriteshin debate me frymë elektorale.

E njëjta gjë pritet të ndodhë edhe në procesin e 3 nëntorit, aq më tepër kur tash ka shumë deputetë që pretendojnë të marrin udhëheqjen e komunave ku kanë kandiduar. Kjo për shoqërinë civile që monitoron punën e Kuvendit, nuk duket risi, pasi, sipas tyre, legjislatura aktuale në vazhdimësi ka treguar papërgjegjësi në raport me prezencën në seanca..

Vetëvendosje nuk e ka ndërmend të rrijë duarkryq sa i përket vendimit të fundit të Komisionit Qendror të Zgjedhjeve për dukjen e fletëvotimeve. Ata kanë paralajmëruar se do t’i shfrytëzojnë të gjitha hapësirat që këtë çështje ta zgjidhin në mënyrë ligjore.
Anëtari i KQZ-së nga ky subjekt politik, Adnan Rrustemi, gjatë një interviste për gazetën Tribuna, ka thënë se Vetëvendosje si subjekt, po i verifikon mundësitë ligjore për veprim dhe njëra nga to është dërgimi i vendimit të KQZ-së për fletëvotimet në Gjykatën Kushtetuese,shkruan Tribuna.

“Ne për këtë çështje jemi në proces të përgatitjes dhe hulumtimit të bazës ligjore që e nxjerr këtë vendim si të paligjshëm dhe jokushtetues. Natyrisht në përputhje me mundësitë por edhe pas vlerësimeve ne do ta shfrytëzojmë çdo mundësi ligjore për ta adresuar këtë vendim të KQZ-së, duke mos përjashtuar edhe Gjykatën Kushtetuese.

E përsëris se jemi në fazën fillestare të vlerësimit dhe kërkimit të zgjidhjes”, ka thënë Rrustemi. Ai e ka akuzuar kryetaren Valdete Daka, sipas të cilës tërë kjo situatë është orkestruar nga ajo pas presioneve të Qeverisë.

Komisioni Qendror i Zgjedhjeve në Kosovë ka vendosur që në fletëvotimet për zgjedhjet lokale të 3 nëntorit të jetë logoja e KQZ-së.

“KQZ-ja ka rënë dakord për dukjen e fletëvotimeve në përputhje me ligjin. Do të jetë logoja e Komisionit Qendror të Zgjedhjeve, e cila po ashtu mban logon e shtetit”, ka konfirmuar për REL, Bajram Latifi, anëtar i KQZ-së.

Vendimi i KQZ-së është mirëpritur nga Ambasada e Shteteve të Bashkuara të Amerikës në Prishtinë.

“Përshëndesim vendimet e sotme të KQZ-së, lidhur me procesin zgjedhor, te cilat paraqesin një hap të rendësishëm përpara. Qasja e KQZ-së shërben si bazament për zgjedhje gjithëperfshirëse, të cilat reflektojnë pjesëmarrjen e komuniteteve të cilat jetojnë në tërë territorin e Republikës së Kosovës”.

“Përkrahja e udhëheqjes politike të Kosovës ilustron mirëkuptimin që ata ndajnë, që zgjedhjet janë një mundësi historike për të unifikuar të gjitha komunitetet, të cilat jetojnë në Kosovë. Inkurajojmë udhëheqësit kosovarë të vazhdojnë të punojnë së bashku për të siguruar që zgjedhjet përmbushin standardet ndërkombëtare dhe janë gjithpërfshirëse për të gjitha komunitetet”, thuhet në deklaratën e ambasadës amerikane.

Zgjedhjet lokale, të parapara edhe me Marrëveshjen e Brukselit, pritet të mbahen në gjithë territorin e Republikës dhe kanë për qëllimin integrimin e serbëve të veriut në institucionet shtetërore.

(E plotësuar) Kryetari i PDK-së,Hashim Thaçi ka dështuar edhe sot në zgjedhjen e kryetarit të Degës dhe kandidatit për kryetar të Prizrenit.

Ai përkunder përpjekjeve nuk ka arritur t’i zgjidh përçarjet dhe problemet që ka PDK-ja në Prizren.

Zgjedhja e kandidatit për Prizren, ka mbetur që të negociohet edhe nesër.

Thaçi nuk po mund të zgjedh kandidatin për kryetar të Prizrenit

Kryetari i PDK-së Hashim Thaçi, në këto momente është duke i bërë të gjitha përpjekjet që të nxjerrë kandidatin e PDK-së për kryetar të Prizrenit. Ai është duke negociuar për ta zgjidhur këtë çështje.

Burimet e “PrizrenPress-it” bëjnë të ditur se brenda PDK-së në Prizren ekziston një pakënaqesi e madhe rreth mënyrës së zgjedhjes së kryetarit të Degës dhe kandidatit për kryetar të Prizrenit. “Po besojmë se sonte do të zgjidhen edhe kryetari i Degës edhe kandidati për kryetar të Prizrenit” tregon burimi i “PrizrenPress-it”.

Thaçi gjatë gjithë ditës sot ka qëndruar në Prizren. Ai ka zhvilluar disa takime edhe me partitë e minoritetve nga të cilët ka kërkuar që të mbështesin PDK-në në Prizren. /PrizrenPress.com/

Në Krushë të Madhe ka nisur të hënën ndërtimi i kompleksit përkujtimor për dëshmorët dhe martirët e këtij fshati. Në ceremoninë e rastit kanë marrë pjesë përfaqësues të institucioneve lokale dhe qendrore.

Kryetari i Komunës së Rahovecit, Rahovecit Smajl Latifi tha se, gjaku i dëshmorëve dha martirëve është faktori kryesor që përcakton vlerën e lirisë. “Prandaj edhe liria jonë ka rrënjë të thella, sepse ne marrim fuqi nga gjaku i derdhur i dëshmorëve e martirëve. Ky fshat, jo vetëm i madh me emër, por edhe me vepra, i dha lirisë tonë kuptim”, tha Latifi.

Sipas tij, përpjekjet e atdhetarëve si Ukshin Hoti dhe dhjetëra dëshmorëve e qindra martirëve, vërtetojnë dëshirën dhe etjen e madhe që populli shqiptar ka për lirinë. “Ngritja e kompleksit përkujtimor për të rënët i shërben historisë, i shërben forcimit të identitetit tonë kombëtar. Prandaj, përpjekjet institucionale në nivel lokal e qendror duhet të jenë vazhdimisht të fokusuara në ruajtjen dhe kultivimin e traditave tona”, tha Latifi.

Ai tha se hartimi dhe zbatimi i këtij projekti është vepër e përbashkët e institucioneve lokale e atyre qendrore, që dëshmon se institucionalizimi i vlerave tona kombëtare është përgjegjësi e të gjithëve. “Duke ngritur vepra të tilla monumentale i japim kuptim sakrificës së njerëzve dhe vetë vlerës së lirisë. Brezat që vijnë do të përkulen para kësaj sakrifice dhe do të dinë ta çmojnë çdo arritje. Ky projekt do të arrinte të kurorëzohej me sukses nëse familjarët e të pagjeturve do të dinin për fatin apo fatkeqësinë e më të dashurve të tyre”, theksoi Latifi.

Zëvendësministri i Ministrisë së Mjedisit dhe Planifikimit Hapësinor Ferat Shala tha ndërkaq se ndërtimi i kompleksit përkujtimor për dëshmorët në Krushë të Madhe është obligim kombëtar e institucional. Ky fshat që i dha aq shumë Kosovës meriton të ketë një vend nderimi e kujtimi për gjakun e derdhur”, tha Shala.

Edhe deputeti i Kuvendit të Kosovës Idriz Vehapi foli për sakrificën madhore të qytetarëve të këtij fshati. Ai bëri thirrje që të nderohet kujtimi për të rënët me punë e përkushtim për ndërtimin e forcimin e shtetit të Kosovës.

Rregullimi i varrezave do të zgjatë 3 vite dhe për këtë janë ndarë 450 mijë euro nga MMPH. Projekti do të realizohet në tri faza dhe pritet të përfundojë në vitin 2015. /PrizrenPress.com/

Lidhja Demokratike e Kosovës në Malishevë organizoi sot një takim me qytetarët e fshatit Carrallukë, në të cilin morën drejtuesit e kësaj dege, kandidati për kryetar të Komunës së Malishevës, deputeti i Kuvendit të Kosovës, Salih Morina, sekretari i LDK-së, deputeti Ismet Beqiri, si dhe deputeti Hashim Deshishku.

Ismet Beqiri shprehu bindjen e plotë se në Malishevë fitorja e LDK-së do të jetë e sigurt. Ai u bëri thirrje të gjithë të pranishmëve që të bashkohen me ndryshimin që po sjell LDK-ja në Malishevë.

“Kandidati i LDK-së për kryetar të Komunës së Malishevës, Salih Morina, është kandidati më i mirë për ta qeverisur Malishevën, ndërsa fitorja e tij do të jetë e pakontestueshme”, deklaroi Beqiri.

Ndërkaq, kandidati për kryetar të Komunës së Malishevës, Salih Morina u zotua se do t’u ofrojë përkrahje të plotë qytetarëve për zgjidhjen e problemeve të shumta që i kanë. Ai theksoi se do të angazhohet maksimal për përmirësimin e jetës së qytetarëve të Komunës së Malishevës.

Në këtë takim morën pjesë një numër i madh i qytetarëve të fshatit Carrallukë, të cillët shprehën përkrahjen e parezervë për kandidatin e LDK-së për kryetar të Komunës së Malishevës, Salih Morina.