Kandidati për kryetar të Prizrenit, Beni Kizolli ka marrë mbështetjen e plotë nga Këshilli drejtues i Partisë Konservatore të Kosovës.

Në mbledhjen e fundit po ashtu ka diskutuar edhe për kriteret në bazë të cilëve duhet të përpilohet lista zgjedhore për Asamblenë Komunale të Prizrenit.

Kryetari i PK-së, Munir Basha tha se pas plotësimit dhe respektimit të të gjitha procedurave statutore dhe me mbështetjen e gjerë të Kryesisë, Beni Kizollin si kandidati më i volitshëm për kryetar të Prizrenit, fillon edhe fushata aktive elektorale e Partisë Konservatore të Kosovës për zgjedhjet komunale që do të mbahen me 3 nëntor.

’’Z. Beni Kizolli gëzon mbështetjen e gjerë të Kryesisë, Këshillit Drejtues, të anëtarëve të partisë dhe të qytetarëve të Prizrenit dhe kjo dëshmon se Partia Konservatore e Kosovës për çështje madhore me interes të veçantë merr vendime në mënyrë konsensuale dhe strategjike duke respektuar procedurat dhe organet partiake’’, tha Basha.

Kandidati për kryetar të Prizrenit, Beni Kizolli dhe Partia Konservatore e Kosovës, kanë formuar kabinetin e qeverisjes së mirë, i cili është një ekip i përbërë prej ekspertëve nga fushat e ndryshme. Ky ekip do të mbështet fuqishëm Beni Kizollin, gjatë fushatës zgjedhore duke evidentuar mangësitë e qeverisjes aktuale dhe duke ofruar alternativa të shëndosha të qeverisjes së mirë.

Beni Kizolli është një ndër themeluesit dhe aktivistët më të vjetër të Partisë Konservatore të Kosovës. /PrizrenPress.com/

Në mbledhjen e fundit të KQZ-së, përfaqësuesi i PDK-së e akuzoi Lëvizjen Vetëvendosje! që së bashku me iniciativën tjetër qytetare, JSL-në e Rada Trajkoviqit, po e shfrytëzojnë në mënyrë të paligjshme Fondin për mbështetjen e subjekteve politike.

Lëvizja për Bashkim, duke qenë edhe e dëmtuar drejtpërdrejt nga këto keqpërdorime, shkeljen e tillë ligjore e ka denoncuar shumë kohë më parë edhe publikisht përmes mediave, edhe juridikisht përmes ankesës në KQZ dhe ngritjes së padisë, përkatësisht kallëzimit penal në institucionet kompetente. Megjithëkëtë, shkelja ka vazhduar, madje, me përkrahjen edhe të vetë përfaqësuesit të PDK-së në KQZ, Betim Gjoshi.

“Ne konsiderojmë se është fakt i pakontestueshëm që ndarja e mjeteve për Lëvizjen Vetëvendosje! dhe JSL-në, të cilat nuk janë regjistruar, por vetëm janë certifikuar si iniciativa qytetare, përbën shkelje të rëndë ligjore. Konsiderojmë se është fakt i pakontestueshëm që shkelës të ligjit në këtë rast janë të gjitha palët që kanë pasur mundësi e nuk e kanë penguar këtë shkelje, duke përfshirë Lëvizjen Vetëvendosje! dhe JSL-në, si përfituese në mënyrë të paligjshme të fondit, si dhe KQZ-në dhe vetë përfaqësuesin e PDK-së, si pjesë e këtij institucioni, të cilët megjithëse kanë qenë të njoftuar me kohë për shkeljen, kanë refuzuar ta trajtojnë atë si të tillë.

Prandaj, sjellja e përfaqësuesit të PDK-së tregon qartë se motivi i denoncimit të këtij rasti nuk është evitimi i shkeljes së ligjit, por përfitimet në aspektin elektoral apo aspekte të tjera subjektive”, thuhet në kumtesën e LB-së.

Gjithashtu, LB konsideron se loja e deritashme e “qengjit të butë” nga Lëvizja Vetëvendosje! ndaj KQZ-së dhe shndërrimi në ujk tani kur pjesën dërrmuese të mjeteve i ka përvetësuar, është edhe një fakt se VV nuk është një organizatë e ndershme, siç përpiqet të paraqitet në opinion, por është një organizatë politike si shumë të tjera të cilat ajo vetë i akuzon, organizatë që për të arritur në pushtet nuk zgjedh mjete.

“Lëvizja për Bashkim e fton KQZ-në që të ndërpresë sa më parë keqpërdorimin e parasë publike dhe të sillet në përputhje me ligjin; e fton Lëvizjen Vetëvendosje! dhe JSL-në që ta ndërpresin praktikën e përfitimit të paligjshëm nga buxheti i Kosovës; dhe i fton institucionet e drejtësisë që të veprojnë me më efikasitet në lidhje me këto shkelje të denoncuara, në mënyrë që të mos vazhdojë të dëmtohet buxheti i shtetit dhe drejtësia në vend”, thuhet në kumtesën e Lëvizjes për Bashkim.

Zëdhënësi i Ministrisë së Bujqësisë, Pylltarisë dhe Zhvillimit Rural, Adil Behramaj, thotë se fushëveprimtaria e kësaj ministrie është e kufizuar në këtë aspekt.

“Kjo fushë mbulohet nga Ministria e Shëndetësisë, për sa i përket shëndetit publik dhe nga Agjencioni i Ushqimit dhe Veterinës, që funksionon në kuadër të kryeministrisë, për sa i përket mirëqenies së kafshëve. Por, licencat për dezinfektim, deratizim dhe dezinsektim lëshohen nga Ministria e Bujqësisë dhe në këtë fushë do ta mbështesim edhe zbatimin e planit strategjik të Ministrisë së Shëndetësisë për luftimin dhe parandalimin e Etheve Hemorragjike Krime-Kongo. Ky mobilizim ka qenë shumë i nevojshëm dhe duke marrë parasysh kapacitetet e limituara të institucioneve relevante që përkujdesen për shëndetin publik, ne si institucion do ta mbështesim strategjinë e Ministrisë së Shëndetësisë me të gjitha kapacitetet tona teknike dhe profesionale”, thotë  për ‘Ferma Ime’ zëdhënësi Behramaj.

Ai shton se duke u bazuar në dokumentin strategjik të Ministrisë së Shëndetësisë, është kontraktuar edhe kompaninë që do t’i ndërmarrë këto masa, konkretisht kompaninë “Truly nolen”, e cila është përfaqësuese e një kompanie amerikane dhe pjesë e ekipit punues do të jenë edhe disa ekspertë amerikan.

Por zëdhënësi i Ministrisë së Shëndetësisë, Faik Hoti, tha se fushata e dezinsektimit nuk është përfunduar që nga prilli i këtij viti kur ka filluar nga Instituti Kombëtar i Shëndetit Publik. Por, sipas Hotit, ajo do të vazhdojë deri në fund të gushtit eventualisht edhe deri në shtator atëherë edhe kur konsiderohet se mund të bie fluksi i paraqitjes së rasteve të reja.

“Është një fazë tjetër e desinsektimit selektiv që po bëhet në komunën e Malishevës, Rahovecit dhe komuna të tjera që njihen si zona endemike për ethe hemorragjike dhe kjo fazë ka për qëllim që vatrat që njihen më intensive sa i përket paraqitjes së etheve hemorragjike, të përfshihen në një dezinsektim tjetër” potencon Faik Hoti.

Dezinsektimi pritet të ndikojë pozitivisht në parandalimin e përhapjes së etheve hemorragjike-Krime Kongo, e rrjedhimisht edhe parandalimin e rasteve të mundshme të vdekjes. Vetëm gjatë këtij viti kanë vdekur 8 persona, 5 prej të cilëve nga komuna e Malishevës.