Pianistja Manjola Trebicka vjen sot në një koncert recital në skenën e Teatrit të Operës dhe Baletit
Jeta e saj është e lidhur fort me pianon. Me një karrierë të suksesshme jo vetëm koncertore, por dhe akademike, Manjola Trebicka vjen nesër në orën 19:00, me një koncert recital në skenën e Teatrit të Operës dhe Baletit. Ajo ka përzgjedhur pjesë nga veprat e kompozitorit të njohur Louis Moreau Gottschalk, për t’i sjellë para publikut. Manjola Trebicka është diplomuar në Akademinë e Arteve në vitin 1992. Po këtë vit ka marrë pjesë në konkursin prestigjioz botëror të pianos “Marguerite Long” në Paris. Ajo nis studimet në Francë, ku diplomohet në Konservatorin Europian në klasën e znj. Wright me çmimin e parë dhe përgëzimet e jurisë. Është nderuar me çmimin e parë në konkursin International në Saint -Nom-la – Bretèche dhe çmimin e dytë në konkursin International në Sucy en Brie. Ka dhënë koncerte në të gjithë Francën, duke marrë pjesë në festivale të ndryshme, si në Ohër me sopranon Inva Mula dhe në Chamonix me violinistin Philippe Grafin. Luan në muzikë dhome në festivale të ndryshme dhe me kuartetin Gaudi. Është zgjedhur ambasadore e pianove “Pleyel-made in France”, duke dhënë recitale me integralen e baladave të Shopenit, të cilat i regjistron me Atelier d’Euterpe në 2004-n. Ka marrë pjesë në përhapjen e muzikës aktuale të kompozitorëve francezë, si Pierre Thilloy e Henri Nafilyan, si dhe në njohjen e kompozitorëve shqiptarë në Francë. Prej vitit 1997, ajo është profesoreshë e pianos dhe e muzikës së dhomës në Shkollën e Legjionit të Nderit. Për gjithë aktivitetin artistik, kulturor e mësimdhënës, ajo është nderuar nga Republika Franceze, në korrik të 2015-s, me Urdhrin e Legjionit të Nderit.
LOUIS MOREAU GOTTSCHALK
Pianist virtuoz dhe kompozitor, amerikani Louis Moreau Gottschalk (1829-1869) lindi në Nju Orlins, nga një baba britanik dhe një nënë kreole e bardhë. Mik i Shopenit e Berliozit gjatë kohës së qëndrimit në Paris, ai u angazhua në shumë turne në Europë, Kuba, Antile, Shtetet e Bashkuara të Amerikës. Kompozimet e tij pëlqeheshin në sallonet e Parisit, ku temës romantike i shtohej edhe ekzotizmi i origjinës dhe turneve të tij. Koncertet e tij, përveç recitaleve, përmblidhnin në skenë me qindra muzikantë dhe dhjetëra pianistë. “Muzika e tij është mjaft e vështirë nga ana teknike dhe shpesh “torturuese” nga ana fizike për pianistin që e interpreton. Ajo kërkon një teknikë perfekte, një prekje të shpejtë të tastierës, një delikatesë, të lidhura me një vrull, me një entuziazëm për jetën, me një bukuri të ndjeshme, në mënyrë që interpretimi të jetë “perfekt”. /Gazeta Shqip