Pjetër Gaci mbylli sytë përgjithmonë 19 vjet më parë, në një fundmarsi në moshën 64-vjeçare. Dje, Ministria e Kulturës e kujtonte në faqen e saj, këtë ikonë të muzikës shqiptare. “Kompozitor i mbi 300 veprave muzikore si këngë popullore, muzikë e lehtë dhe për fëmijë, vepra simfonike dhe cantata, opera, opereta, tablo koreografike, romanca, muzikë filmash etj., Pjetër Gaci është ndër ata emra me të cilët muzika shqiptare krenohet kudo, kontributi i të cilit në muzikën shqiptare është tepër i madh dhe i pamohueshëm”, thuhet në kujtesën e Ministrisë së Kulturës.
Violinist, pedagog i muzikës klasike në Liceun Artistik dhe më pas në Institutin e Lartë të Arteve, Gaci nuk e ndau jetën e tij nga muzika. Ai u bë themelues i muzikës violinistike shqiptare. Arriti majat me kompozimin e këngës, si te “Për ty atdhe” dhe “Gryka e Kaçanikut”. Pjetër Gaci u lind në fshatin Shtiraj të rrethit të Shkodrës më 27 mars të vitit 1931. Në Shkodër kreu arsimin fillor. Studimet për violinë i nisi në Liceun Artistik “J. Misja”, në vitet 1948-1952, për t’i vazhduar në Konservatorin e Moskës “P. I. Çajkovski” në të cilin edhe u diplomua në pranverë të vitit 1967.
Në vitin 1967 bëhet drejtor i cirkut të Tiranës, i Estradës dhe i Teatrit të Kukullave të qytetit. Në vitin 1970, është kompozitor në krijimtari të lirë dhe pas vitit 1976 vendoset përfundimisht në Shkodër, ku krahas kompozimit u përkujdes edhe për klasën e violinës në shkollën e mesme artistike “P.Jakova” të këtij qyteti.
Ai ka meritën të ketë kompozuar të parin koncert për violinë në historinë e muzikës shqiptare, të parën baladë për violinë dhe piano, si dhe të jetë anëtar i Trios së parë instrumentale (pranë TOB, 1956). Prirja kryesore në krijimtarinë e tij do të mbetet muzika vokale, në të cilën ka lënë shembuj të paharruar veprash që nga kënga e deri tek opera, si opera “Toka jonë”, “Përtej mjegullës”, kantata “O moj Shqipni, e mjera Shqipni”, “Për ty Atdhe”. Në vitin 1989, Pjetër Gacit iu akordua titulli “Artist i Popullit”.