Grupi “Asnjë cent më shumë” kanë organizuar protestë sot para objektit të Qeverisë së Kosovës, ku kanë marshuar deri tek Ministria e Ekonomisë, kundër rritjes së çmimit të rrymës.
Një numër i madh i qytetarëve i është bashkuar kësaj thirrje duke protestuar kundër shtrenjtimit të çmimit të rrymës.
Të pajisur me parulla si “Shteti hesht, qytetarët s’ndalen”, “Tarifat e reja, padrejtësi e re”, “KEDS-i t’i kthehet popullit” dhe “S’ka dritë me padrejtësi”, protestuesit shprehën pakënaqësinë ndaj kërkesës së kompanive energjetike për rritjen e tarifave për 15 për qind.
Ata kërkuan nga institucionet të ndalin këtë vendim, që sipas tyre rëndon jetën e qytetarëve dhe thellon pabarazinë ekonomike.
Organizatorët e protestës në Prishtinë paralajmëruan protestë të re më 11 prill, nëse merret vendimi për rritjen e tarifave të energjisë.
