Në 26-vjetorin e rënies heroike, edhe në Vraniq të Suharekës janë kujtuar ata që dhanë jetën për lirinë e Kosovës. Dëshmorët dhe martirët e luftës së fundit janë përkujtuar në këtë 5 prill edhe në fshatin Greikoc.
Në fundvitet e 90-ta historia e lavdishme e popullit shqiptarë, u pasurua edhe me heroizmin e bijve të Kosovës, që rrokën armët kundër Serbisë, që vriste e masakronte popullatën. Kësaj lufte iu bashkuan edhe bijtë e Vraniqit të Suharekës dhe fshatrave të tjera.
“U arrestuan dhe përjetuan tortura nga më të ndryshme, nëpër kazamatet serbe 48 banorë, nga fshati Vraniq e me shumë sakrifica u liruan pas përfundimit të luftës, gjaku i dëshmorëve të kombit dhe martirëve të lirisë, vuri gurthemelet e lirisë, shtetësisë, pavarësisë së Kosovës që ne sot po e shijojmë”, tha Tahir Kolgeci, përfaqësues i fshatit Vraniq.
“Sot më shumë se asnjëherë tjetër, është detyre morale e kombëtare i gjithë qytetarëve të këtij vendi, veqanërisht e drejtuesve politik të shtetit tonë, që të vihen në mbrojtje të vlerave të luftës së UÇK”, tha Bislim Muça, bashkëluftëtar
“Të mësohet më shumë për luftën, të mësohet për ata që ranë gurthemel i shtetit të Kosovës. Për arsye se, gjeneratat që vijnë pas nesh, duhet të dijnë se, në këtë vend ka pas njerëz që kanë luftuar, dhe kanë kontribuar për të ardhur deri tek pavarësia e Kosovës”, tha Bali Muharremaj, kryetar i Suharekës.
E në ditë të tilla historike, organizatat e dala nga lufta, vazhdojnë të kritikojnë gjyqin e padrejtë, siç shprehen ata nga udhëheqësve të UÇK-së
“Me këtë gjyq të padrejtë që po i bëhet luftës sonë, në kryq e kanë vënë edhe ndërgjegjien e një pjese të madhe të botës së lirë dhe demokratike, liridashëse perëndimore, e cila në vitin 1999, në mënyrë të natyrshme ishte bërë aleate e luftës sonë çlirimtare” , tha Sejdi Elezi nga OVL.
“Jam i sigurtë që në prillin e ardhshëm, në pesë prillin e ardhshëm, këtij manifestimi do ti bashkohet edhe presidenti Thaqi, kryetari Veseli, Rexhep Selimi, edhe Jakup Krasniqi, të cilët në mënyrë të padrejtë po mbahen në Hagë”, tha Enver Hoxha nga PDK
Dëshmorët dhe martirët e luftës së fundit janë përkujtuar në këtë 5 prill edhe në fshatin Greikoc./rtk
