Kryetari i Komunës së Dragashit, Bexhet Xheladini, ka bërë të ditur se ka dorëzuar sot në Ministrinë e Kulturës, Rinisë dhe Sportit projektin ekzekutues për ndërtimin e Qendrës Multifunksionale në këtë komunë.
Sipas tij, procedurat e tenderimit do të zhvillohen nga vetë MKRS, ndërsa vlera e projektit kap shifrën prej një milion eurosh, raporton PrizrenPress.
“Sot në Ministri të Kulturës dorëzova projektin ekzekutues të Qendrës Multifunksionale. Procedurat e tenderimit do t’i kryejë MKRS, ndërsa vlera e projektit është një milion euro,” tha Xheladini.
Gjatë kësaj vizite në Ministri, kryetari Xheladini u takua edhe me drejtorin e Departamentit të Sportit, Ibër Alaj, me të cilin diskutoi mundësinë e bashkëfinancimit për ndërtimin e stadiumit të futbollit në fshatin Pllavë.
“Në ministri takova edhe drejtorin e Departamentit të Sportit, z. Ibër Alaj, nga i cili kërkova që në bashkëfinancim me komunën të përfundojmë projektin e ndërtimit të stadiumit të futbollit të fshatit Pllavë,” shtoi ai./PrizrenPress.com
