Në njëvjetorin e ndarjes nga jeta të profesorit dhe veprimtarit të njohur Metë Shatri, është përuruar libri post-mortum i tij me titull “Arsimi fillor dhe i mesëm në komunën e Prizrenit 1945–1999, me theks të veçantë në vitet 1990–1999”.
Ngjarja u mbajt të shtunën në amfiteatrin e Universitetit “Ukshin Hoti” në Prizren, duke mbledhur familjarë, kolegë, studiues dhe dashamirë të arsimit.
Kliko videon: https://www.facebook.com/watch/?v=1746425489334258
Redaktori i librit, Skender Susuri, theksoi rëndësinë dokumentare të kësaj vepre, duke shtuar se një pjesë e madhe e të dhënave që përmban publikohen për herë të parë.
“Ky libër është dëshmi e një pune të gjatë kërkimore dhe ruan kujtesën institucionale të arsimit në Prizren gjatë dekadave më të rëndësishme të historisë sonë”, u shpreh Susuri.
Recensenti i librit, prof. dr. Fadil Kryeziu, tha se vepra e Metë Shatrit është më shumë sesa një përmbledhje historike; ajo është trashëgimi që do të mbijetojë për brezat që vijnë.
“Puna e profesorit Shatri është kontribut i jashtëzakonshëm për historiografinë arsimore. Ajo bën që historiku i arsimit në Prizren të mbijetojë për shekuj”, tha Kryeziu.
Një fjalë përshëndetëse mbajti edhe prof. Hasan Hoti, mik dhe koleg i autorit, i cili foli për jetën dhe kontributin shumëvjeçar të Metë Shatrit në fushën e arsimit dhe shërbimit publik.
Libri përfaqëson një vepër me vlerë të veçantë historike dhe edukative, duke dokumentuar zhvillimin e arsimit fillor dhe të mesëm në komunën e Prizrenit përmes të dhënave arkivore, përjetimeve personale dhe analizave të periudhës më sfiduese të viteve ’90 në Kosovë.
Metë Shatri, ish-zyrtar i Drejtorisë së Arsimit në Prizren dhe anëtar i Lidhjes Demokratike të Kosovës, ndërroi jetë më 14 qershor 2024. Ai do të kujtohet si një figurë e përkushtuar ndaj arsimit, me integritet të lartë profesional dhe njerëzor, dhe si një zë i rëndësishëm në mbrojtje të vlerave kombëtare dhe qytetare./TV Prizreni/
Marketing
