Grupi i ‘Qytetarëve Aktiv për Prizrenin’,sot 7 Marsin do ta shënojë duke protestuar në sheshin “Shatërvan”. Këtë ata do ta bëjnë si shenjë kundërshtimi ndaj shumë skandaleve që kanë ndodhur në fushën e arsimit në këtë qytet.
“Duke përcjellë me vëmendje zhvillimet e fundit në drejtorinë e Arsimit në Prizren, pas raportimeve të gazetarit Rami Berisha për shkelje të ndryshme ligjore dhe shpërfillje të procedurave të rekrutimit të mësimdhënësve, si dhe duke pasur parasysh skandalet, hetimet dhe akuzat e shumta ndaj zyrtarëve publik në qeverisjen lokale, kemi ardhur në përfundim se qëndrimi i mëtutjeshëm i këtyre njerëzve në krye të institucioneve është fyerje ndaj mësimdhënësve dhe qytetarëve të Prizrenit”, thuhet në komunikatën e tyre.
Më tutje në komunikatë thuhet se, duke e konsideruar arsimin si shtyllë kryesore të zhvillimit shoqëror, ata thanë se kanë vendosur që ta kundërshtojmë këtë gjendje të krijuar nga ky pushtet në Prizren, i cili ka degraduar dhe shkatërruar sistemin arsimor.
“Prizreni sot ndihet i ofenduar nga skandalet në Drejtorinë e Arsimit, nga akuzat dhe hetimet ndaj zyrtarëve publikë për shkelje të ligjit dhe shpërdorimit të detyrës zyrtare”, vazhdon më tej komunikata.
Qytetarët Aktivë, së bashku me Shoqatën e Veteranëve të Arsimit dhe Shoqatën e Mësimdhënësve udhëtarë, u bënë thirrje të gjithë mësimdhënësve dhe qytetarëve, që për dinjitetin e mësimdhënësve prizrenas, ditën e mësuesit ‘7 Marsin’ ta shënojnë duke protestuar paqësisht në sheshin “Shatërvan” prej orës 13:30.