Sulmuesi i stacionit policer në Prizren, Shefki Hallaqi, sot pranoi kushtet e marrëveshjes për pranimin e fajësisë të cilën kishin filluar më herët ta negociojnë me Prokurorinë e Shtetit.
Më 24 tetor të vitit të kaluar, Hallaqi kishte hyrë i armatosur në stacionin policor “Alfa” në Prizren duke shtënë me armë zjarri brenda tij.
Gjashtë policët që kishin qenë në ndërrim, ishin suspenduar për shkak të paaftësisë për ta parandaluar sulmin.
Në seancën e shqyrtimit fillestar që u mbajt sot në Gjykatën themelore në Prizren, ende pa u lëshuar në gjykim, Hallaqi kërkoi konsultim me avokatin e tij Naim Qelaj dhe pas dorëzimit me shkrim të draftit për pranim të fajësisë nga Prokurorja, mbrojtësi i tij u pajtua se do ta pranojë marrëveshjen.
Marrëveshja pritet të nënshkruhet më 6 shkurt, ndërsa avokati Qelaj tha për KALLXO.com se ajo parasheh që i akuzuari Shefki Hallaqi të dënohet me 2 vjet burg efektiv dhe 3 mijë euro gjobë.