Ministria e Shëndetësisë ka bërë ndarje joprofesionale dhe joadekuate të specializimeve në fushat ku ka nevojë për mjekë specialistë, shkruan sot Koha Ditore.
Këtë ndarje joprofesionale e ka pranuar edhe vetë ministri i Shëndetësisë, Imet Rrahmani, por më vonë e ka mohuar zyra për medie e Ministrisë së Shëndetësisë.
Burime të “Kohës Ditore” në Qendrën Klinike Universitare të Kosovës (QKUK) kanë treguar se në konkursin e vitit të kaluar janë pranuar specializantë në klinikat ku nuk ka pasur nevojë, ndërsa nuk janë pranuar në ato ku nevoja për ta ka qenë më e madhe. Për këtë QKUK-ja ia hedh përgjegjësinë Ministrisë së Shëndetësisë, por pa dhënë shpjegime se në cilat prej klinikave nevoja për specializantët është më e madhe.
“Gjatë vitit të kaluar janë pranuar specializantë që janë internistë, në pozitën e kardiologut në Klinikën e Kardiologjisë dhe në Qendrën Emergjente pa e përfunduar stazhin e kardiologjisë. Po ashtu janë pranuar në Reumatologji, në Endokrinologji pa e përfunduar stazhin, si dhe pa pasur nevojë për staf shtesë”, ka thënë burimi.