Anëtari i Kryesisë së AAK-së, Pal Lekaj, ka thënë se largimi i deputetëve, Blerim Shalës dhe Melihate Tërmkollit, e vështirëson punën e Aleancës në Kuvendin e Kosovës, pasi një deputet detyrohet të jetë anëtar i disa komisioneve parlamentare.
Por, sipas tij, në aspektin e votave nuk është dëmtuar AAK-ja nga largimi i tyre. “Normalisht se largimi i këtyre dy deputetëve e ka dëmtuar AAK-në në aspektin e numrave në Kuvend, por jo edhe në aspektin e votave. Largimi i deputetëve e vështirëson punën e AAK-së në Kuvend sepse një deputet duhet ta përfaqësojë partinë në dy apo tri komisione parlamentare. Prandaj, e vështirëson punën tonë”, ka thënë Lekaj për “Epokën e re”.
Ai ka vlerësuar se largimin e këtyre deputetëve nuk e ka pritur askush por, sipas tij, këta deputetë nuk i kanë sjellë vota AAK-së.
“Është e vërtetë se nuk e ka pritur askush që mund të largohen këta dy deputetë nga Aleanca për Ardhmërinë e Kosovës, sidomos kur janë zgjedhur deputetë të Kuvendit të Kosovës. Por, mendoj se të dy deputetët, Blerim Shala dhe Melihate Tërmkolli, nuk i kanë sjell votë AAK-së edhe kur kanë qenë pjesë e saj, mirëpo kanë marrë votë nga AAK-ja dhe nuk ka qenë fortë e pranueshme. Pra, nuk ishte dashur nga ana e tyre të bëhet kjo lëvizje. Megjithatë, kjo është zgjidhja e tyre, ndërsa AAK-ja do ta vazhdojë rrugën e saj pa këta dy deputetë”, ka thënë Lekaj. Sipas tij, deputetët që po kalojnë nga një parti politike në partinë tjetër janë duke e keqpërdorur mandatin e deputetit.
“Është keqpërdorje e mandatit të deputetit, edhe pse deputeti është autonom. Mendoj se të largohesh si deputet nga një subjekt politik nuk është e ndershme. Po të kandidonin si të pavarur assesi nuk do t’i merrnin votat për t’u bërë deputetë të Kuvendit të Kosovës as Shala e as Tërmkolli. Po ashtu, partia, në këtë rast AAK-ja, ka kërkuar vota për ta, siç kam bërë edhe unë personalisht. Prandaj, ata janë bërë deputetë falë AAK-së”, është shprehur Lekaj, duke shtuar se, pavarësisht zhvillimeve të fundit, AAK-ja do të fuqizohet.
“Pavarësisht largimeve të fundit, pritet fuqizim i AAK-së. Do t’i kemi zgjedhjet e brendshme dhe jemi duke punuar në terren që të sjellim në parti personalitete me energji të reja. Besoj se AAK-ja do ta vazhdojë fuqishëm rrugëtimin e saj”, ka theksuar Lekaj. Ai ka hedhur poshtë mundësinë e largimit të deputetëve të tjerë nga AAK-ja. “Nuk ka rrezik për largime të tjera sepse i njoh mirë dhe nga afër të gjithë deputetët që janë tani në AAK, prandaj edhe nuk do të ketë largime”, ka thënë Lekaj.