Niveli i arsimit në Kosovë është larg standardeve ndërkombëtare. Kështu ka thënë ministri i Arsimit, Arsim Bajrami, në mbledhjen e Komisionit për Arsim, Shkencë, Teknologji, Kulturë, Rini dhe Sport, ku është diskutuar lidhur me gjendjen në arsimin e lartë.
Ministri Bajrami ka shprehur pakënaqësi me nivelin e arsimit duke filluar nga ai parafillor e deri në atë pasuniversitar, transmeton Gazeta Tribuna.
Bajrami ka thënë se do të jetë një sfidë e madhe që të ngritët cilësia e arsimit në të gjitha nivelet.
Sipas tij, MASHT nuk do të merret shumë me infrastrukturë por do të merret me ngritjen e cilësisë.
Bajrami ka thënë se arsimi i larte është shumë i rëndësishëm për Kosovën por sipas tij, MASHT është duke punuar me të gjitha universitetet që të punohet me ngritjen e cilësisë.
“Ligji për Arsimin e Lartë është shumë i rëndësishëm, ku ligj deri ne fund të muajit maj do të vije në komision parlamentar. Tashmë edhe partitë opozitare i kanë dërguar ekspertët për krijimin e një ligji për arsimin”, ka thënë Bajrami.
Bajrami ka njoftuar se me te nisur punën ka filluar inspektimin e universiteteve private.
Ai ka thënë se ka kërkuar që të mbyllen të gjitha universitet që nuk i plotësojnë kushtet.
“Janë gjashtë institucione private në të cilat është duke u bërë vëzhgim special”, ka thënë ministri Bajrami.