Prej kur gjyqtarët e gjykatave themelore në nivel vendi kanë filluar grevën, janë anuluar gjithsej 245 seanca të parapara të natyrës penale e civile.
Në një komunikatë për media të kësaj gjykate thuhet po ashtu se gjatë kësaj periudhe kohore në Gjykatën Themelore në Mitrovicë janë mbajtur 12 seanca të natyrës emergjente.
Autoritetet nga kjo gjykatë njoftojnë opinionin publik se që nga fillimi i grevës e tutje ka vazhduar lëshimi i lejeve për vizita në burgje, ku një gjë të tillë pavarësisht grevës do të vazhdojë edhe në të ardhmen.
Kërkesat e Këshillit të Gjyqtarëve Grevistë për ndërprerjen e grevës janë: rritja e pagave prej 25% dhe një shtesë prej 200 eurove në formë lineare për të gjithë gjyqtarët në emër të rrezikshmërisë.
Derisa gjykatat janë në grevë, Agjencia për Administrimin e Pasurisë së Sekuestruar duket se po punon mjaft. 24 milionë pasuri janë sekuestruar dhe janë ngrirë gjatë vitit 2014 në Kosovë, ndërsa 700 mijë euro janë konfiskuar.
Kështu ka deklaruar Rrahim Rama, kryeshef i Agjencisë për Administrimin e Pasurisë së Sekuestruar në një debat të organizuar nga Lëvizja Fol.