Banorët e lagjes “Kurillë” të Prizrenit prej vitesh janë në pritje të realizimit të premtimeve të dhëna nga autoritetet qeveritare lokale dhe ato qendrore për ndërtimin e një qendre të mjekësisë familjare në këtë lokalitet.
Ndonëse zotimet financiare për realizimin e këtij projekti janë bërë, sipas zyrtarëve të Qeverisë lokale ende nuk është gjetur hapësira adekuate për ndërtimin e objektit të shëndetësisë.
Në këtë situatë qytetarët duhet që të frekuentojnë lagjet e tjera për të marrë shërbimet e mjekësisë primare.
Vetim Krasniqi thekson se krahas kryetarit, Ramadan Muja, edhe ish-kryeministri, Hashim Thaçi, kishte premtuar ndërtimin e një qendre të mjekësisë familjare.
“Ka disa vjet që na është thënë se do të ndërtohet ambulanca, por kjo nuk po ndodh. Detyrimisht banorëve po u duhet që të shkojmë në ambulancën e lagjes ‘Ralin’”, ka thënë ai.
Nga ana tjetër drejtori i Shëndetësisë i Prizrenit, Zyber Rizanaj, ka sqaruar se Qeveria lokale ka zotuar mjetet për ndërtimin e QMF-së në lagjen “Kurillë”, porse problem kryesor në këtë plan është mungesa e lokacionit.
Drejtori i Administratës, që përfshin edhe sektorin e pronës në Komunën e Prizrenit, Ilir Baldedaj, ka pohuar se projekti mund të realizohet vetëm në pronën e Komunës, ngase ndryshe ka kufizime ligjore.
Hartimi i projektit për QMF-në në “Kurillë” sikurse edhe shpallja e tenderit për ndërtimin e këtij objekti është shqyrtuar që në janar të vitit 2013 në mbledhjen e kryetarit Muja me drejtorët e tij. Vendimi për këtë çështje ishte shtyrë me arsyetimin se kërkohen të dhëna shtesë në lidhje me propozimin e Drejtorisë së Shëndetësisë për këtë projekt.
Ndërkaq, më 2012 pas refuzimit për të votuar buxhetin e Komunës, këshilltarët e atëhershëm të KDTP-së patën marrë premtimin nga zyrtarë të lartë të PDK-së se QMF-ja në “Kurillë” do të ndërtohet paralelisht me përmbushjen e disa kushteve të tjera./Kohanet/