Në muajin qershor do të rikthehet në gjykatë kryetari i Komunës së Prizrenit, Ramadan Muja, raporton KTV.
Gjykata e Apelit më në fund ka arritur të caktonte nisjen e shqyrtimit të ankesës së mbrojtjes së Mujës, që e kishin bërë për vendimin e shkallës së parë.
Në mars të 2014-s, kryetari Muja qe dënuar me 2 vjet burgim me kusht, për veprën penale – keqpërdorim të detyrës zyrtare.
Mujës, nga tabori i PDK-së, i ishte ndaluar edhe ushtrimi i funksioneve publike 30 muaj.
Por, për krejt këto dhe në fakt anulimin e vendimit të shkallës së parë, ishte ankuar kryetari i Prizrenit, çfarë e ka shtyrë vendimin që të bëhej i plotfuqishëm, rrjedhimisht edhe shtyrjen e zgjedhjeve në qytetin e dytë më të madh të Kosovës.
Me kusht në këtë proces janë dënuar edhe 5 zyrtarë të tjerë të Komunës së Prizrenit.
Vonesat në caktim të kësaj seance ishin shkaktuar për shkak të mosfunksionimit të Këshillit Gjyqësor të Kosovës gjatë kohës së bllokadës institucionale.
Ruzhdi Berisha, që mbron Ramadan Mujën, i ka thënë KTV-së se në fakt kjo vonesë nuk u ka shkaktuar atyre asnjë problem.